UNAIDS កោតសរសើរជោគជ័យនៃការប្រយុទ្ធនឹងមេរោគអេដស៍ និងជំងឺអេដស៍ នៅកម្ពុជា

លោកជំទាវ Winnie Byanyima អគ្គលេខាធិការរងអង្គការសហប្រជាជាតិ និង​ជា​នាយិកា​ប្រតិបត្តិ​អង្គការ UNAIDS កោតសរសើរចំពោះជោគជ័យនៃការប្រយុទ្ធ នឹងមេរោគ​អេដស៍ និង​ជំងឺ​អេដស៍​នៅ​កម្ពុជា។ កម្ពុជាបាននាំយកនូវទស្សនវិស័យយ៉ាងសំខាន់ក្នុងការឆ្លើយតបនឹងជំងឺអេដស៍ និង​ជា​ប្រទេស​ឈាន​មុខ​ដោយបានធ្វើការជាមួយគ្រប់អ្នកពាក់ព័ន្ធនិងគ្មានការរើសអើង។ កិច្ចការនេះ​បង្ហាញ​ឱ្យ​ពិភព​លោក​មើលឃើញយ៉ាងច្បាស់។

ការថ្លែង​របស់លោកជំទាវ Winnie Byanyima នាយិកាប្រតិបត្តិ អង្គការUNAIDS យ៉ាងដូច្នេះ នា​ឱកាសដែលឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និង​ឯកឧត្តម ឈាង រ៉ា រដ្ឋមន្រ្តីក្រសួងសុខាភិបាល បានទទួល​ជួប​ពិភាក្សា​ការងារ​អំពី​ការ​ឆ្លើយ​តប​នឹង​មេ​រោគ​អេដស៍ និងជំងឺអេដស៍ នៅក្នុងដំណាក់កាលឈានទៅបញ្ចប់អេដស៍ និង​ថវិកា​ជំនួយ​ពី​ខាង​ក្រៅ​មានការធ្លាក់ចុះ, ក្នុងកិច្ចប្រជុំនេះមានការចូលរួមពី ថ្នាក់ដឹកនាំក្រសួងសុខាភិបាល ថ្នាក់​ដឹក​នាំ​អង្គការUNAIDS ប្រចាំកម្ពុជា និងថ្នាក់ដឹកនាំអាជ្ញាធរជាតិប្រយុទ្ធ នឹងជំងឺអេដស៍, នា​ល្ងាច​ថ្ងៃ​ទី​១២ ខែឧសភា ឆ្នាំ២០២៥។

មានប្រសាសន៍បើកកិច្ចប្រជុំ ឯកឧត្តមទេសរដ្ឋមន្រ្តីបានស្វាគមន៍លោកជំទាវនាយិកា និង​បាន​ស្នើសុំ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល មានប្រសាសន៍។ ឯកឧត្តម​រដ្ឋ​មន្រ្តី​ បានមានប្រសាសន៍អំពីកិច្ចខិតខំប្រឹងប្រែងរបស់ក្រសួងសុខាភិបាល ក្នុង​ការ​ឆ្លើយ​តប​នឹង​មេរោគ​អេដស៍និងជំងឺអេដស៍ ឈានទៅសម្រេចគោលដៅរួមក្នុងការបញ្ចប់អេដស៍នៅកម្ពុជា។ ទន្ទឹម​នឹងនោះ ក្រសួងក៏រៀបចំសមាហរណកម្មការងារអេដស៍ទៅក្នុងប្រព័ន្ធសុខាភិបាល ពង្រឹង​កម្លាំង​ការងារ ផ្តល់សេវាអេដស៍ប្រកបដោយប្រសិទ្ធភាព ព្រមទាំងវិនិយោគ​លើអ​ង្គ​ភាព​ផ្អែក​លើ​សហគមន៍​ផងដែរ។

បន្ទាប់មក ឯកឧត្តមទេសរដ្ឋមន្រ្តី បានជម្រាបជូនលោកជំទាវ Winnie Byanyima អំពីការ​អនុម័ត​គោល​នយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨​ ក្នុងកិច្ចប្រជុំពេញអង្គគណៈរដ្ឋមន្រ្តី កាលពីថ្ងៃទី១៥ ខែមីនា ឆ្នាំ២០២៤ ក្រោម​អធិបតី​ភាព​ដ៏​ខ្ពង់​ខ្ពស់បំផុតសម្តេចមហាបវរធិបតី ហ៊ុន ម៉ាណែត នាយករដ្ឋ​មន្រ្តី នៃ​ព្រះ​រា​ជា​ណា​ចក្រ​កម្ពុជា​។ ឯកឧត្តមទេសរដ្ឋមន្រ្តីបានសង្កត់ធ្ងន់ថាតាមទិន្នន័យថ្មីបំផុតនេះ គោលដៅ៩៥-៩៥-៩៥ កម្ពុជា សម្រេចបាន៩២-១០០-៩៩។ ទន្ទឹមនឹងនេះ យើងមានក្តីបារម្ភយុវវ័យ វ័យ​ក្មេង​អាយុ​ពី​១៥​ទៅ​២៤​ឆ្នាំ មិនទទួលបានការអប់រំសមស្របអំពីសុវត្ថិភាពផ្លូវភេទ។

ជាការ​ឆ្លើយតប លោកជំទាវ Winnie Byanyima  បានសង្កត់ធ្ងន់ថា បច្ចុប្បន្ន យើង​កំពុង​នៅ​ក្នុង​រយៈ​ពេល​ផ្ទេរដំណាក់កាលយ៉ាងធំធេង។ យើងត្រូវ​ពិនិត្យ​មើល​យុទ្ធ​សាស្រ្ត​ក្នុង​ការ​បញ្ចប់​អេដស៍​នៅ​ឆ្នាំ​២០៣០។ ក្នុងនោះ ប្រទេសមួយចំនួនបានដកខ្លួនថយ ហើយមានការ រើសអើង​ចំពោះ​ប្រជាជន​គន្លឹះ។ ទន្ទឹមនឹងនេះ លោកជំទាវបានសរសើរថាកម្ពុជា បើកចំហចំពោះគំនិតច្នៃប្រឌិតថ្មី ព្រម​ទាំងស្វាគមន៍ចំពោះការប្តេជ្ញាចិត្តក្នុងការពង្រីកសេវាថែទាំសុខភាព។ បន្ថែមលើនេះ កម្ពុជា ជា​ប្រទេសដំបូងគេដែលបានរៀបចំផែនទីបង្ហាញផ្លូវ ទៅកាន់ចីរភាព​ក្នុង​ការ​ឆ្លើយ​តប​នឹង​មេ​រោគ​អេដស៍ និងជំងឺអេដស៍។ មុននឹងបញ្ចប់លោកជំទាវបានស្នើថា កម្ពុជា គួរ​ពិចារណា​ផ្តល់​ការ​គាំទ្រ​ឱ្យ​អង្គការ​សង្គមស៊ីវិល ចូលរួមក្នុងការឆ្លើយតបនឹងមេរោគអេដស៍ និងជំងឺអេដស៍ និង​សន្យា​ថា​នឹង​ជួយ​ស្វែង​រកទម្រង់ល្អមួយសម្រាប់កម្ពុជា។

ជាកិច្ចបញ្ចប់ ឯកឧត្តមទេសរដ្ឋមន្រ្តីបានបន្ថែមថា ក្តីបារម្ភរបស់យើងមួយទៀតគឺបញ្ហាថវិកា។ បច្ចុប្បន្ន រាជរដ្ឋាភិបាលបានចូលរួមថវិកាយ៉ាងច្រើន និងត្រៀមខ្លួនឆ្លើយតបនឹងបញ្ហា។ ប្រសិន​បើ​យើង​អនុវត្តគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍បានល្អ នឹង​អាច​ជួយ​កាត់​បន្ថយ​ការចំណាយ និងពង្រឹងប្រសិទ្ធភាពក្នុងការចំណាយ។ ឯកឧត្តមទេសរដ្ឋមន្រ្តីបានបន្តថា នឹងធ្វើការឱ្យបាន​ជិត​ស្និទ្ធ​ជាមួយ​ការិយាល័យ​អង្គការ UNAIDS ប្រចាំ​កម្ពុជា ដើម្បីវាយតម្លៃលើការចំណាយក្នុងការពង្រឹងការងារឆ្ពោះទៅបញ្ចប់អេដស៍៕ អត្ថបទ រដ្ឋា