រដ្ឋមន្រ្តីក្រសួងសុខាភិបាល៖ «សុខភាពដូចនឹងសុភមង្គល យើងត្រូវមានការចាប់អារម្មណ៍ ដោយ​ត្រូវ​រស់នៅ​ប្រកប​ដោយសុខភាពល្អ»

នាព្រឹកថ្ងៃទី១៦ ខែឧសភា ឆ្នាំ២០២៥នេះ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តី​ក្រសួង​សុខាភិបាល ​បានអញ្ជើញជាអធិបតីភាពក្នុងពិធីប្រគល់-ទទួលឧបករណ៍អេឡិចត្រូនិក សរុប​ចំនួន​ ៣,៤២៣ គ្រឿង ដែលជាអំណោយដ៏ថ្លៃថ្លារបស់រាជរដ្ឋាភិបាល ជូនដល់​អង្គភាព​សុខាភិបាល​ថ្នាក់​ជាតិ និងថ្នាក់ក្រោមជាតិ ដើម្បីលើកកម្ពស់​ប្រសិទ្ធភាព​នៃ​ការ​បម្រើ​សេវា​សុខាភិបាល​កាន់​តែរហ័ស និងមានប្រសិទ្ធភាព។

ឯកឧត្តមសាស្រ្តាចារ្យ ឈាង រ៉ា បានថ្លែងថា ឧបករណ៍អេឡិចត្រូនិច​ទាំង​នេះ​គឺ​សម្រាប់​ប្រើ​ប្រាស់​ជា​ពហុ​បំណង និងពហុមុខងារ ដើម្បីជួយសម្រួល​ដល់​ការងារ​បម្រើ​សេវា​សុខាភិល​នៅតាម​មូល​ដ្ឋាន​ឱ្យ​កាន់តែមានប្រសិទ្ធភាពខ្ពស់ និងដើម្បីលើកកម្ពស់ការអភិវឌ្ឍប្រព័ន្ធសុខាភិបាល តាម​រយៈ​ការ​ប្រើប្រា​ស់បច្ចេកវិទ្យា ក្នុងការធ្វើទំនើបកម្មប្រព័ន្ធព័ត៌មានសុខាភិបាល ដែលឆ្លើយ​តប​នឹង​គោល​នយោបាយរដ្ឋាភិបាលឌីជីថលកម្ពុជា ២០២២-២០៣៥ និងក្របខណ្ឌ​គោល​នយោបាយ​សេដ្ឋ​កិច្ច និងសង្គមឌីជីថលកម្ពុជា ២០២១-២០៣៥ ក៏ដូចជាយុទ្ធសាស្រ្តបញ្ចកោណ ដំណា​ក់​កាល​ទី១ របស់រាជរដ្ឋាភិបាល។

ឆ្លៀតក្នុងឱកាសនេះ ឯកឧត្តមសាស្ត្រាចារ្យរដ្ឋមន្ត្រី បានផ្តល់អនុសាសន៍បន្ថែមដល់ថ្នាក់ដឹកនាំ និង​មន្ត្រីសុខាភិបាលទាំងអស់ត្រូវ ប្តេជ្ញាពង្រឹងកិច្ចសហការគ្នាបន្ថែមទៀត ដើម្បីចាប់​យក​បច្ចេក​វិទ្យា​ឌីជីថល ក្នុងការបម្រើសេវាសុខាភិបាលឱ្យកាន់តែប្រសើរឡើង និងត្រូវ​យក​ចិត្ត​ទុក​ដាក់​បន្ថែម​លើ​ចំណុចសំខាន់ៗដូចខាងក្រោម៖

១. បន្តប្តេជ្ញាចិត្តក្នុងការបម្រើសុខភាពជូនប្រជាជន ពិសេសសុខភាពសាធារណៈដោយផ្តល់អាទិភាព លើការថែទាំ និងធានាសេវាថែទាំសុខភាពអាចងាយទទួលយកបានសម្រាប់ប្រជាជនគ្រប់រូប

២. បន្តប្រកាន់ខ្ជាប់នូវសុច្ចរិតភាព និងគណនេយ្យភាព ដោយលើកកម្ពស់ស្តង់ដាក្រមសីលធម៌វិជ្ជាជីវៈ មានការទទួលខុសត្រូវខ្ពស់លើការបម្រើសេវា

៣. បន្តចាប់យកបច្ចេកវិទ្យា ដោយប្រើប្រាស់ដំណោះស្រាយបច្ចេកវិទ្យាឌីជីថលសុខាភិបាល ដើម្បី លើកកម្ពស់ប្រសិទ្ធភាព និងលទ្ធផលអ្នកជំងឺ

៤. បន្តការសិក្សារៀនសូត្រជាប្រចាំ ទាំងផ្នែកវិជ្ជាជីវៈ បទពិសោធន៍ល្អ និងបច្ចេកវិទ្យាវេជ្ជសាស្រ្តថ្មីៗ

៥. បន្តកិច្ចសហការ និងបំពេញការងារជាក្រុមជាមួយសហភាតរៈ និងតួអង្គពាក់ព័ន្ធនានាក្នុងការលើកកម្ពស់គុណភាពសេវាជាអតិបរមា

៦. អនុវត្តការងារប្រកបដោយភាពបុរេសកម្ម ដោយត្រូវដោះស្រាយបញ្ហាប្រឈមនានាប្រកបដោយ នវានុវត្តន៍ និងមានភាពសម្រប

៧. យកចិត្តទុកដាក់លើការគ្រប់គ្រង ការប្រើប្រាស់ និងការថែទាំឧបករណ៍អេឡិចត្រូនិកទាំងនេះ និងពង្រឹងការគ្រប់គ្រង ការប្រើប្រាស់ និងការថែទាំសម្ភារៈ ឧបករណ៍ពេទ្យ ហេដ្ឋារចនាសម្ព័ន្ធរូបវន្ត និងមធ្យោបាយដឹកជញ្ជូន ដែលផ្គត់ផ្គង់ ពីប្រភពថវិកាជាតិ ឬពីគម្រោងនានាឱ្យបានល្អ។

ជាចុងបញ្ចប់ ឯកឧត្តមសាស្រ្តាចារ្យរដ្ឋមន្រ្តី សូមថ្លែងអំណរគុណយ៉ាងជ្រាលជ្រៅ ចំពោះរាជរដ្ឋាភិបាលកម្ពុជា ដែលតែងតែផ្តល់អាទិភាពខ្ពស់ដល់ វិស័យសុខាភិបាល និងនាឱកាសនេះបានផ្តល់នូវឧបករណ៍អេឡិចត្រូនិកទាំងនេះ តាមរយៈក្រសួងប្រៃសណីយ៍និងទូរគមនាគមន៍ ដែលពិតជាមានតម្លៃ សម្រាប់ផ្តល់ដល់មន្ត្រី បុគ្គលិក បម្រើសេវាសុខាភិបាលជូនដល់ប្រជាជន និងអ្នកជំងឺ៕ អត្ថបទ រដ្ឋា