ក្រុមការងារចុះមូលដ្ឋានឃុំពេជចង្វារ លើកទឹកចិត្តដល់ប្រជាការពារទាំង៦ភូមិ ក្នុងឃុំពេជចង្វារ បន្តជួយថែរក្សាភូមិឃុំអោយមានសុវត្ថិភាព

កំពង់ឆ្នាំង៖ នៅថ្ងៃទី១៧ ខែឧសភា ឆ្នាំ២០២៥នេះ ឯកឧត្តម កុល ប៊ុនលី ប្រធានក្រុមការងារចុះមូលដ្ឋានឃុំពេជចង្វារ ឯកឧត្តម សំ ប្រជាមានិត អនុប្រធានក្រុមការងារចុះជួយឃុំពេជចង្វារ បានជួបសំណេះសំណាលជាមួយបងប្អូនប្រជាការពារភូមិទាំង៦របស់ឃុំពេជចង្វារ ស្រុកបរិបូណ៌ ខេត្តកំពង់ឆ្នាំង ដើម្បីពង្រឹងសន្តិសុខសណ្តាប់ធ្នាប់ក្នុងភូមិនីមួយៗ នាំក្តីសុខសាន្តជួនប្រជាពលរដ្ឋ និងបង្រ្កាបរាល់បទល្មើសនានា។

ឯកឧត្តម កុល ប៊ុនលី បានថ្លែងថា៖ ថ្ងៃនេះខ្ញុំមានសេចក្ដីសោមនស្សរីករាយ ដោយបានចុះជួបសំណេះសំណាលជាមួយបង ប្អូនប្រជាការពារទាំង ៦ភូមិ ដែលស្ថិតនៅក្នុងឃុំពេជចង្វារ ស្រុកបរិបូណ៌។ ប្រជាការពារភូមិ គឺជាកម្លាំងសន្ដិសុខដែលស្ម័គ្រចិត្តនៅក្នុងមូលដ្ឋាន ដើម្បីចូលរួមបំពេញការងារការពារសន្ដិសុខ សុវត្ថិភាព ជូនប្រជាពលរដ្ឋ។ ត្បិតតែប្រជាការពារភូមិពុំទទួលបានប្រាក់ខែពីរដ្ឋក៏ពិតមែន ក៏ប៉ុន្ដែបងប្អូនបានសប្បាយរីករាយយ៉ាងខ្លាំង ដោយបងប្អូនគិតថា ខ្លួនអាចចូលរួមជួយបម្រើប្រទេសជាតិបាននៅតាមភូមិនីមួយៗ។ តួនាទីភារកិច្ចរបស់ប្រជាការពារភូមិ គឺចូលរួមអនុវត្តគោលនយោបាយភូមិឃុំមានសុវត្ថិភាព របស់រាជរដ្ឋាភិបាល ជាពិសេសការចូលរួមទាំងអស់គ្នា ដើម្បីបង្រ្កាបរាល់បទល្មើសនានា ពីព្រោះកម្លាំងប្រជាការពារ ក៏ជាអ្នកការពារសុខសុវត្ថិភាព និងផ្ដល់ភាពកក់ក្ដៅបន្ថែមទៀតក្នុងការរស់នៅដល់ប្រជាជនក្នុងម្លប់សន្ដិភាព ។

ឯកឧត្តមបានកោតសរសើរ និងលើកទឹកចិត្តដល់ប្រជាការពារទាំងអស់ ចំពោះការលះបង់ពេលវេលា កម្លាំងកាយចិត្ត ដើម្បីការពារសន្ដិសុខសណ្ដាប់ធ្នាប់សុវត្ថិភាព ជូនប្រជាជនក្នុងភូមិរបស់ខ្លួន ព្រោះប្រជាការពារភូមិ មានតួនាទីដ៏សំខាន់ក្នុងកិច្ចការពារ ថែរក្សា សន្ដិសុខ សុវត្ថិភាព សណ្ដាប់ធ្នាប់សាធារណៈ ជាពិសេសការចូលរួមអនុវត្តវិធានការណ៍ទប់ស្កាត់អំពើប្លន់ លួចឆក់ និងបទល្មើសផ្សេងៗ ដើម្បីភូមិឃុំមានសុវត្ថិភាព និងភាពសុខសាន្ត ជូនប្រជាជន សហគមន៍ ក៏ដូចជាសង្គមជាតិទាំងមូល ។

នៅក្នុងឱកាសនោះ ឯកឧត្តមបានប្រគល់ជូននូវឯកសណ្ឋានប្រជាការពារ ក្នុងម្នាក់១ឈុត ថវិកា និងវិទ្យុសម្រាប់ទាក់ទងក្នុង មួយភូមិ២គ្រឿងងាយស្រួលធ្វើការងារ៕ កាំង ហុងវាស្នា