កម្ពុជា-អូស្រ្តាលី ឯកភាពគ្នាពង្រឹងកិច្ចសហប្រតិបត្តិការលើវិស័យបណ្តុះបណ្តាលជំនាញ TVET

ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បាន​ទទួល​ជួប​សម្តែង​ការ​គួរសម និងពិភាក្សាការងារជាមួយ លោក Cameron Baker ប្រធានគណៈ​កម្មការ​ជំនាញ​នៃ​រដ្ឋអូស្ត្រាលីខាងត្បូង ប្រទេសអូស្រ្តាលី ដើម្បីពង្រឹងកិច្ច​សហប្រតិបត្តិ​ការ​លើ​វិស័យ​បណ្តុះ​បណ្តាល​បច្ចេកទេស និងវិជ្ជាជីវៈ (TVET) ការផ្ដល់ឱកាសការងារ និងការចុះកម្មសិក្សា​ជំនាញ​ដល់​យុវជនកម្ពុជា។

ក្រោយចប់ជំនួបការងារ កាលពីរសៀលថ្ងៃទី១៩ ឧសភា ឆ្នាំ២០២៥នេះ ក្រសួងការងារ និង​បណ្តុះ​បណ្តាល​វិជ្ជាជីវៈ បានលើកឡើងឱ្យដឹងថា ក្នុងឱកាសនោះ ឯកឧត្តមរដ្ឋមន្ត្រី បាន​ជំរាប​ជូន​ភ្ញៀវ​អំពី​ការ​ដាក់ចេញនូវយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកម្ពុជា ដោយ​យក​ចិត្តទុកដាក់ខ្ពស់ចំពោះការអភិវឌ្ឍន៍សមត្ថភាពធនធានមនុស្ស និងការធ្វើ​ទំនើប​កម្ម​ប្រព័ន្ធ​បណ្ដុះ​បណ្ដាលបច្ចេកទេស និងវិជ្ជាជីវៈ ដើម្បីឆ្លើយតប​ទៅ​នឹង​តម្រូវ​ការ​ទីផ្សារ​ការងារ​ដែល​កំពុ​ង​មាន​សក្តានុពលនៅកម្ពុជា។

ឯកឧត្តមរដ្ឋមន្ត្រី បានបញ្ជាក់ថា ក្រសួងការងារ និងបណ្ដុះបណ្ដាលវិជ្ជាជីវៈ ស្វាគមន៍រាល់​កិច្ច​សហ​ប្រតិបត្តិការជាមួយដៃគូជាតិ និងអន្តរជាតិ ដើម្បីពង្រីងវិស័យបណ្តុះបណ្តាលបច្ចេកទេស និង​វិជ្ជាជីវៈនៅកម្ពុជាឱ្យកាន់តែរីកចម្រើនថែមទៀត ដែលឆ្លើយតបតាមតម្រូវការទីផ្សារការងារ និង​ការ​រីកចម្រើននៃវិស័យបច្ចេកវិទ្យានៅលើសកលលោកផងដែរ។

បើតាម​ក្រសួងការងារ នៅក្នុងកិច្ចប្រជុំនេះ ភាគីទាំង​ពីរ​បាន​លើក​ឡើង​អំពី​ការ​បន្ត​ពង្រីក​កិច្ច​សហ​ប្រតិបត្តិការ រវាងកម្ពុជាជាមួយរដ្ឋអូស្រ្តាលីខាងត្បូង ដើម្បី​ផ្លាស់​ប្ដូរ​បទ​ពិសោធន៍​ទាក់​ទង​នឹង​ការ​បណ្ដុះ​បណ្ដាល​ជំនាញផលិតរថយន្តដើរដោយថាមពលអគ្គិសនី និងការបង្កើនផលិត​ភាព​ដោយ​ប្រើ​ប្រាស់​ប្រព័ន្ធបច្ចេកវិទ្យាឆ្លាតវៃ និងហេដ្ឋារចនាសម្ព័ន្ធបៃតង ជាពិសេសការ​កសាង​សមត្ថភាព​ជន​បង្គោល​លើការបណ្តុះបណ្តាលបច្ចេកទេស និងវិជ្ជាជីវៈ រួមទាំងការផ្ដល់​អាហារូបករណ៍​ដល់​សិក្ខា​កាម និងនិស្សិតកម្ពុជាដើម្បីដកស្រង់បច្ចេកទេស និងបទពិសោធន៍ពីអូស្ត្រាលីបន្ថែម។

ជាការឆ្លើយតប ភាគីអូស្រា្តលី បានស្វាគមន៍ចំពោះការពង្រឹង និងពង្រីកកិច្ចសហប្រតិបត្តិការ រវាង​ប្រទេសទាំងពីរបន្ថែមទៀត ដើម្បីចូលរួម​ជាមួយ​រដ្ឋាភិបាល​កម្ពុជា​ក្នុង​ការ​អភិវឌ្ឍន៍​ធន​ធាន​មនុស្ស​។

មុននឹងបញ្ចប់ ឯកឧត្តមរដ្ឋមន្រ្តី និងលោក Cameron Baker បានកោត​សរសើរ​ចំពោះ​ទំនាក់​ទំនង​កម្ពុជា និងអូស្រ្តាលី ដែលបានគាំទ្រគ្នាទៅវិញទៅមកជាច្រើនឆ្នាំមកហើយ ខណៈ​ដែល​ភាគី​ទាំង​ពីរ​បាន​ប្ដេជ្ញាបង្កើនកិច្ចសហប្រតិបត្តិការលើវិស័យបណ្តុះបណ្តាលបច្ចេកទេស និងវិជ្ជាជីវៈ និង​ការ​ផ្ដល់ឱកាសការងារសម្រាប់ពលរដ្ឋកម្ពុជា៕ អត្ថបទ៖ ឈិត បូរ៉ាវី