យោធបរិក្ខារ និងអាវភ្លៀងដែលជាអំណោយសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវបានផ្តល់ជូនយោធិនគ្រប់រូប ក្នុងតំបន់ប្រតិបត្តិការសឹករងកំពង់ឆ្នាំង

កំពង់ឆ្នាំង ៖ នៅថ្ងៃទី២០ ខែឧសភា ឆ្នាំ២០២៥ លោកឧត្តមសេនីយ៍ត្រី អ៊ុ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំង បានផ្តល់ជូននូវ យោធបរិក្ខារ និងអាវភ្លៀង ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ដល់គ្រប់បណ្ដាការិយាល័យ ផ្នែកចំណុះ ទីបញ្ជាការទាំងអស់ ដើម្បីយកទៅប្រគល់ជូនដល់យោធិនគ្រប់រូបក្នុងអង្គភាពរបស់ខ្លួន ។

លោកឧត្តមសេនីយ៍ត្រី អ៊ុ សុភាបានថ្លែងថា៖ តាមរយៈអំណោយដ៏ថ្លៃថ្លារបស់សម្តេចនាពេលនេះ បានបញ្ជាក់ឱ្យយើងទាំងអស់គ្នាមើលឃើញនូវគ្រប់កាលៈទេសៈ សម្ដេចទាំងទ្វេ ព្រមទាំងសម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី តែងតែយកចិត្តទុកដាក់ខ្ពស់ដល់សុខភាពរស់នៅរបស់យោធិន នៃកងយោធពលខេមរភូមិន្ទគ្រប់ៗរូប ដែលកំពុងមានតួនាទី និងភារកិច្ចការពារជាតិមាតុភូមិ ។ ក្នុងនាមមេបញ្ជាការ មេបញ្ជាការរង ព្រមទាំងនាយទាហាន នាយទាហានរង និងពលទាហានទាំងអស់ ទូទាំងតំបន់ប្រតិបត្តិការសឹករងកំពង់ឆ្នាំង សូមគោរព និងថ្លែងអំណរគុណយ៉ាងជ្រាលជ្រៅជាទីបំផុត ជូនចំពោះសម្ដេចតេជោ សម្តេចកិត្តិព្រឹទ្ធបណ្ឌិត សម្តេចធិបតី និងលោកជំទាវបណ្ឌិត៕ កាំង ហុងវាស្នា