ពលរដ្ឋកំពុងទទួលសេវាថា មន្ទីរពេទ្យគន្ធបុប្ផាជាកន្លែងជួយសង្គ្រោះអាយុជីវិតកូនៗរបស់ពួកគាត់

ក្នុងគោលបំណងដើម្បីជួយដល់កុមារកម្ពុជា លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែល​ជា​ភរិយារបស់សម្តេចនាយករដ្ឋមន្រ្តី ហ៊ុន ម៉ាណែត បានបន្តបើកយុទ្ធនាការ “១ម៉ឺនរៀល ១​ម៉ឺន​នាក់​” រយៈពេល ១ខែពេញ ដែលនឹងចាប់ផ្ដើមពីថ្ងៃទី១ ដល់ថ្ងៃទី៣០ ខែមិថុនា ឆ្នាំ​២០២៥​ខាង​មុខ​នេះ ​តាមរយៈមូលនិធិគន្ធបុប្ផាកម្ពុជា ខណៈពលរដ្ឋដែលកំពុងទទួលបានសេវាថា មន្ទីរ​ពេទ្យ​គន្ធ​បុប្ផា​ជាក​ន្លែងជួយសង្គ្រោះអាយុជីវិតកូនៗរបស់ពួកគាត់។

យុទ្ធ​នាការ “១ម៉ឺនរៀល ១ម៉ឺននាក់” ជាយុទ្ធនាការ​ប្រចាំ​ឆ្នាំ​ដ៏​សំខាន់​មួយរ​បស់​មូល​និធិ​គន្ធ​បុប្ផា​កម្ពុជា​ រៀបចំឡើងដើម្បីចូលរួមអបអរសាទរ ទិវាកុមារអន្តរជាតិ ១មិថុនា និងបំផុសស្មារតី “ខ្មែរ​ជួយ​ខ្មែរ” ក៏ដូចជាការរម្លឹកឱ្យមានការចូលរួមបរិច្ចាគជូនមូលនិធិគន្ធបុប្ផាកម្ពុជា ព្រមទាំង​ដើម្បី​ផ្សារ​ភ្ជាប់ ក៏ដូចជាបង្កើនសកម្មភាពកាន់តែជិតស្និតជាមួយក្រសួង-ស្ថាប័ន និងរដ្ឋបាលរាជធានី-ខេត្ត ដែលបានបង្កើតគណៈកម្មការទ្រទ្រង់មូលនិធិគន្ធបុប្ផាកម្ពុជា, ក្រុមហ៊ុន-សហគ្រាស​ដែល​បា​ន​ចុះ​អនុស្សរណៈយោគយល់គ្នា ជាមួយមូលនិធិគន្ធបុប្ផាកម្ពុជា, ព្រមទាំងភាគីពាក់ព័ន្ធនានា ក្នុង​គោល​បំណងនាំភាពញញឹម និងក្ដីសង្ឃឹមដល់ទារក និងកុមារនៅកម្ពុជា។

ពាក់ព័ន្ធយុទ្ធនាការនេះ ប្រជាពលរដ្ឋរស់នៅតំបន់ផ្សេងៗគ្នា ដែល​បាន​ទទួល​សេវា​ពិនិត្យ​ព្យាបាល​កូន និងចៅៗ នៅមន្ទីរពេទ្យកុមារគន្ធបុប្ជា បានបង្ហាញអារម្មណ៍សប្បាយរីករាយ និង​សម្តែង​ការ​អរគុណ​ជូន​ចំពោះសប្បុរសជននានា ទាំងទីជិត ទីឆ្ងាយ និងនៅក្រៅ​ប្រទេស​ផង​ដែរ​ដែល​បាន​រួម​គ្នា​ជួយ​ដល់ក្មេងៗ ជាពិសេសគឺជួយដល់ជនខ្វះខាត និងទីទាល់ ដែលគ្មាន​លទ្ធភាព​ក្នុង​ការ​ព្យាបាល​កូន​នៅពេលមានបញ្ហាសុខភាព។  ក្រុមប្រជាពលរដ្ឋ បានលើកឡើងស្រដៀងគ្នាថា រាល់​ថ្ងៃ​នេះ បើគ្មានមន្ទីរពេទ្យកុមារគន្ធបុប្ជាទេ នោះកុមារ ពិសេសក្មេងៗមកគ្រួសារក្រីក្រ ក៏​គ្មាន​សង្ឃឹម​ក្នុងការរស់នៅដែរ ដោយសារមិនមានលទ្ធភាពគ្រប់គ្រាន់ក្នុងការពិនិត្យ និងព្យាបាល​សុខភាព ខណៈជីវភាពមានខ្វះខាត។

ដើម្បីចូលរួមគាំទ្រ យុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៥ សប្បុរជន​ទាំង​អស់​អាច​បរិច្ចាគ​បាន តាមរយៈលេខគណនីរបស់មូលនិធិនៅគ្រឹះស្ថានហិរញ្ញវត្ថុចំនួន១៦ ដែលជាដៃគូរ ឬ​តាមរយៈគណនីរបស់មូលនិធិគន្ធបុប្ផាកម្ពុជា ឬតាមរយៈ QR Code ដែលមានភ្ជាប់ក្នុងរូបភាព។ យោង​តាម​លទ្ធផលនៃយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៤កន្លងទៅ របស់មូល​និធិ​គន្ធ​បុប្ជា​កម្ពុជា មានការចូលរួមគាំទ្ររបស់សប្បុរសជនទាំងក្នុង និងក្រៅប្រទេស សរុបចំនួនជាង ២៤​ម៉ឺននាក់ ជាមួយនឹងថវិកាបរិច្ចាគសរុបសមមូលជាប្រាក់ដុល្លារអាម៉េរិក ចំនួនជាង ៣,៣ លាន​ដុល្លារ​។ ការបរិច្ចាគនេះពិតជាមានតម្លៃណាស់ ក្នុងជួយសង្រ្គោះជីវិត ទារក និងកុមារនៅកម្ពុជា៕ អត្ថបទ៖ ឈិត បូរ៉ាវី