ក្រោយផុតឱសានវាទ អតីតសណ្ឋាគារអង្គរមានជ័យ ត្រូវបានគណៈកម្មការចម្រុះចុះហ៊ុំព័ទ្ធ នៅ​ថ្ងៃនេះ ដោយសារអគារមានសភាពចាស់ទ្រុឌទ្រោម

ភ្នំពេញ៖ ក្រោយរយៈពេល១៥ថ្ងៃ នៃថ្ងៃឱសានវាទ ក្រុមការងារគណះកម្មការចម្រុះ បាន​ចុះ​ទៅ​ហ៊ុំព័ទ្ធ​​អគារស​ហកម្មសិទ្ធ ( អតីតសណ្ឋាគារអង្គរមានជ័យ ) ស្ថិតតាមបណ្តោយ​មហា​វិថី​ព្រះ​មុន្នីវង្ស ក្នុងសង្កាត់មនោរម្យ ខណ្ឌ៧មករា រាជធានីភ្នំពេញ ។

ការចុះហ៊ុំព័ទ្ធនេះធ្វើឡើង នាព្រឹកថ្ងៃទី២១ ខែឧសភា ឆ្នាំ២០២៥នេះ ដោយ​ក្រុម​ការងារ​បច្ចេក​ទេស​ជំនាញ នៃក្រសួងរៀបចំដែនដីនគររូបនីយ៍កម្ម និងសំណង់ សហការជាមួយ​អាជ្ញាធរ​មូល​ដ្ឋាន​រដ្ឋបាល​ខណ្ឌ៧មករា ដឹកនាំដោយលោកថេង សុថុល អភិបាលខណ្ឌ។

ឯកឧត្តម ខៀវ ប៊ូរិន អនុរដ្ឋលេខាធិការក្រសួងរៀបចំដែនដីនគររូបនីយ៍កម្ម និងសំណង់ ដែល​ជា​ប្រធាន​ក្រុមការងារក្រសួងទទួលដោះស្រាយការសម្របសម្រួលការងារ បានប្រាប់ឱ្យដឹងថា ការងារ​នេះ ក្រុមជំនាញបានចំណាយពេលជិត៩ខែមកហើយ ក្នុងការដោះ​ស្រាយ​គោល​នយោបាយ​សម្រប​សម្រួល ជូនពលរដ្ឋ៦៥គ្រួសារ ដែលរស់នៅក្នុងអគារសហកម្មសិទ្ធិនេះ ខណៈបច្ចុប្បន្នមាន៦១គ្រួសារ បានទទួលយកការដោះស្រាយ និង០៤​គ្រួសារ​ទៀត​ពុំ​ទាន់​សម្រប​សម្រួល​ត្រូវ​នៅឡើយ ។

ដោយកត្តាព្រួយបារម្ភខ្ពស់ ពីគុណភាពសំណង់មានសភាពចាស់ទ្រុឌទ្រោម ដែលអាច​ប្រឈម​នឹង​ការ​បាក់​រលំជាយថាហេតុបានគ្រប់ពេល ទើបក្រសួងរៀបចំដែនដី ដែលជាក្រសួងជំនាញ លើ​ការ​គ្រប់​គ្រង​សំណង់ ត្រូវចាំបាច់គិតគូរ និងដោះស្រាយកិច្ចការងារនេះឱ្យបានលឿន និងរហ័សបំផុត ។

លោក ថេង សុថុល អភិបាលខណ្ឌ៧មករា ឱ្យដឹងថា ៖ ក្នុងនាមអាជ្ញាធរដែនដី លោក​បាន​ណែ​នាំ​ឱ្យ​មន្ត្រី​ចុះផ្សព្វផ្សាយឱ្យបានទូលំទូលាយទៅកាន់ពលរដ្ឋទាំងអស់ដែលរស់នៅជុំវិញតំបន់នោះ ឱ្យ​បង្កើន​ស្មារតីប្រុងប្រយ័ត្នខ្ពស់ ព្រោះស្ថានភាពអគារ អាចប្រឈម​នឹង​ការ​បាក់​រលំ​បាន​ដោយ​មិន​កំណត់​​ពេល​វេលានោះឡើយ ។

សូមបញ្ជាក់ថា អគារសហកម្មសិទ្ធិ (អតីតសណ្ឋាគារអង្គរមានជ័យ) មានក្រឡាផ្ទៃបាតទំហំសរុប ៥៩០​ម៉ែត្រការ៉េ មានកម្ពស់ ៦ជាន់ ស្មើនឹង ១០៧បន្ទប់ ។ អាគារនេះ មានទីតាំង​ស្ថិត​នៅ​លើ​ផ្លូវ​កែង​រវាង​មហាវិថីព្រះមុនីវង្សនិង មហាវិថីកម្ពុជាក្រោម ស្ថិតនៅក្នុងភូមិ១ សង្កាត់មនោរម្យ ខណ្ឌ​៧មករា រាជធានីភ្នំពេញ ត្រូវបានសាងសង់ឡើងតាំង ពីអំឡុងឆ្នាំ១៩៥០ គិតមកដល់បច្ចុប្បន្ន សំណង់​អគារនេះមានអាយុ ៧៥ឆ្នាំហើយ ៕ អត្ថបទ ៖ កុម្ភះ