សាធារណជនផុលផុសចូលរួមក្នុងយុទ្ធនាការ «១ម៉ឺនរៀល ១ម៉ឺននាក់» គាំទ្រមន្ទីរពេទ្យគន្ធបុប្ផា

បន្ទាប់ពីមានការជូនដំណឹងស្ដីពីការរៀបចំយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៥ របស់​មូល​និធិ​គន្ធបុប្ផាកម្ពុជា,សាធារណជនផុលផុសបានចូលរួមបរិច្ចាគថវិការក្នុងយុទ្ធនាការនេះ ដើម្បី​រួម​គ្នា​ជួយគាំទ្រសកម្មភាពមនុស្សធម៌របស់មន្ទីរពេទ្យគន្ធបុប្ផា។

សាធារណជន នៅថ្ងៃទី២១ខែឧសភានេះ បានប្រាប់BTVឲ្យដឹងថា ក្នុងនាមប្រជាពលរដ្ឋខ្មែរ និង​ធ្លាប់​មានកូនចៅចូលសម្រាកព្យាលបាលនៅមន្ទីរពេទ្យគន្ធបុប្ផា គឺមិន​អាច​ភ្លេច​គុណ​ឡើយ​ចំពោះ​មន្ទីរ​ពេទ្យនេះ ដែលបានជួយស្រោចស្រង់អាយុជីវិតសាច់ញាត្តិរបស់ពួកគេ។ លើសពីនេះ សាធារណៈបា​នគាំទ្រ និងពេញចិត្តបរិច្ចាគថវិកាក្នុងយុទ្ធនាការ «១ម៉ឺនរៀល ១ម៉ឺននាក់» ដើម្បី​រួម​គ្នា​ជួយគាំទ្រមន្ទីរពេទ្យគន្ធបុប្ផាឱ្យដំណើរជារៀងរហូត។

នៅក្នុងបណ្តាញ​ហ្វេសប៊ុកវិញ សាធារណជនផុលផុសក៍បានចូលរួមផ្សព្វផ្សាយ និងបរិច្ចាគ​ថវិកា​តាម​​លទ្ធភាពរៀងៗខ្លួនក្នុងយុទ្ធនាការ «១ម៉ឺនរៀល ១ម៉ឺននាក់» ដោយក្នុង​នោះ​មាន​គណនី​ហ្វេសប៊ុក​ជា​ច្រើន​ដូចជា៖ តារាចម្រៀង លោក ម៉ាន់ វណ្ណដា បានបរិច្ចាគថវិកា១០លានរៀល ឧញ៉ា នឹម វណ្ណៈ ១ពាន់ដុល្លា វ៉ាន់ណារី សេង ២៤ម៉ឺនរៀល និង បូរ៉ាវី លក្ខណ៍ ១ម៉ឺន​រៀល​ជា​ដើម។

បើ​តាមសេចក្តី​ជូន​ដំណឹងរបស់មូលនិធិគន្ធបុប្ផាកម្ពុជាចេញផ្សាយនៅពេលថ្មីៗនេះ បានឲ្យដឹងថា ក្រោម​គំនិតផ្តួចផ្តើមដ៍ខ្ពង់ខ្ពស់របស់លោកជំទាវ បណ្ឌិត ពេជ ចន្ទមុន្នី ហ៊ុន ម៉ាណែត ប្រធាន​កិត្តិយស​នៃ​មូលនិធិគន្ធបុប្ផាកម្ពុជា,មូលនិធិនឹងរៀបចំយុទ្ធនាការ «១ម៉ឺនរៀល ១ម៉ឺននាក់» ដែល​មាន​រយៈ​ពេល១ខែពេញ ពោលចាប់ពីថ្ងៃទី១ដល់ថ្ងៃទី៣០ខែមិថុនា ឆ្នាំ២០២៥ ដើម្បីចូលរួម​អបអរ​សាទរ ទិវាកុមារអន្តរជាតិ១មិថុនា និងជាការរម្លឹក​ឱ្យ​មាន​ការ​បន្ត​ចូល​រួម​បរិច្ចាគ​ជូន​មូល​និធិ​គន្ធ​បុប្ផា​កម្ពុជា ដើម្បីរួមគ្នានាំភាពញញឹម និងក្តីសង្ឃឹមដល់ទារក និងកុមារ ព្រមទាំង​ស្រ្តី​មាន​ផ្ទៃ​ពោះ នៅកម្ពុជា ក្នុងស្មារតី«ខ្មែរជួយខ្មែរ»។

ពិធីបើកយុទ្ធនាការនេះ នឹងរៀបចំធ្វើឡើងនៅថ្ងៃទី១ខែមិថុនា ឆ្នាំ២០២៥ ស្ថិតនៅមន្ទីរ​ពេទ្យ​គន្ធ​បុប្ផា រាជធានីភ្នំពេញ ក្រោមអធិបតីភាពដ៍ខ្ពង់ខ្ពស់ពីលោកជំទាវ បណ្ឌិត ពេជ ចន្ទមុន្នី ហ៊ុន ម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា៕ អត្ថបទ៖ទូច សោភ័ណ