សមត្ថកិច្ចចម្រុះខេត្តបន្ទាយមានជ័យឃាត់រថយន្ត២គ្រឿងដឹកសាច់ជ្រូកបង្កក ខូចគុណភាព ២៣កេស

នៅរសៀល​ថ្ងៃទី២០ឧសភាម្សិលមិញនេះ កំលាំងការិយាល័យផលិតកម្ម និង បសុព្យាបាល ខេត្ត​បន្ទាយ​មានជ័យ បានសហការជាមួយសមត្ថកិច្ច ការិយាល័យស្រាវជ្រាវ និងបង្ក្រាបអំពើ រត់​ពន្ធ​តំបន់​៥ គយខេត្តបបន្ទាយមានជ័យ ចុះចាប់រថយន្ត តាក់ស៊ីបានចំនួន ២គ្រឿង ដែលលួច​ដឹក​សាច់​ជ្រូក បង្កក ខូចគុណភាពខុសច្បាប់ចំនួន ២៣កេស ស្មើ នឹង ១.១៥០គីឡូក្រាម បាន​នៅ​ចំណុច​ភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។

លោក ហ៊ុយ ទូច ប្រធាន ការិយាល័យផលិតកម្ម និង បសុព្យាបាល នៃមន្ទីរកសិកម្មរុក្ខាប្រមាញ់ និងនេសាទ ខេត្តបន្ទាយមានជ័យ បានឲ្យដឹងថា ផលិតផលសាច់ជ្រូក បង្កកដែល​កំលាំង​ចម្រុះ​បង្រ្កា​ប​បាន​ដឹកតាមរថយន្តតាក់ស៊ី២គ្រឿង មានម៉ាក ស៊ីណា និង លុចស៊ីស៣០០ ដឹក​ចេញ​ពី​ក្រុង​ប៉ោយ​ប៉ែត​ឆ្ពោះ​ទៅក្រុងភ្នំពេញដើម្បីលក់ចែកចាយបន្តតាមទីផ្សារ។

លោក ហ៊ុយ ទូច បានឲ្យដឹងបន្តទៀតដឹងថា ផលិតផល សាច់ជ្រូក បង្កកដែល បង្រ្កាប​បាន​ខាង​លើក្រោមការ​សហការយ៉ាងល្អរវាងគយចល័តក្រសួង បន្ទាប់ពីទទួលបានព័ត៌មាន ពីការលួច​នាំ​ចូល​ដោយ​ខុសច្បាប់​នូវ​សាច់ជ្រូកពី​ក្រៅប្រទេស តាមរថយន្តតាក់ស៊ីពីរគ្រឿងក្នុង​គោលដៅនាំពី​ក្រុង​ប៉ោយ​ប៉ែតឆ្ពោះទៅលក់នៅក្រុងភ្នំពេញ។

ក្រោយពីកំលាំង​ចម្រុះបង្ក្រាបបានហើយតាមការត្រួកពិនិត្យសាច់ជ្រូកទាំងនោះ រួមមានគ្រឿងក្នុង និងបំណែកសាច់បង្កកខូចគុណភាព​ខុសច្បាប់ចំនួន ២៣កេស ស្មើនឹង ១.១៥០គីឡូក្រាម ។ ផលិត​ផល​ទាំងនោះ ភាគច្រើនបានខូចគុណភាពអស់ហើយ ព្រោះតែរក្សាទុកក្នុងសីតុណ្ហភាព ការ​វេចខ្ចប់មិនសមស្របនិងមានរយ:ពេលច្រើនថ្ងៃទៀតផង។

ចំណែក​ម្ចាស់​រថយន្តដែលទទួលដឹកទំនិញក៏គ្មានការអនុញាតច្បាប់អ្វីនោះដែរ ហើយក្នុង​ការ​បង្ក្រាប​នោះ​សមត្ថកិច្ចចម្រុះបានដកហូតផលិតផលសាច់បង្កកដែលមានសាធាតុគីមីខាងលើ ត្រូវ​សមត្ថកិច្ចចម្រុះបានធ្វើកំណត់ហេតុដកហូត និងដុតកម្ទេចចោលភ្លាមៗ ផងដែរ៕