មន្ទីរសុខាភិបាលខេត្តឧត្តរមានជ័យ អំពាវនាវដល់ពលរដ្ឋត្រូវមកទទួលការចាក់វ៉ាក់សាំងការពារជំងឺកូវីដ១៩ ឲ្យបានគ្រប់គ្នា ខណៈមានឆ្លងកើតមានសារជាថ្មី នៅប្រទេសជិតខាង

ឧត្តរមានជ័យ៖ នៅព្រឹកថ្ងៃទី២១ ខែឧសភា ឆ្នាំ២០២៥នេះ លោកវេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្តឧត្តរមានជ័យ បានអំពាវនាវស្នើដល់បងប្អូនប្រជាពលរដ្ឋគ្រប់រូប ដែលរស់នៅក្នុងភូមិសាស្រ្តខេត្តឧត្តរមានជ័យ ពិសេសក្មេងៗ ដែលមានអាយុចាប់ពី១២ឆ្នាំឡើង ត្រូវនាំគ្នាមកទទួលសេវាការចាក់វ៉ាក់សាំងការពារជំងឺកូវីដ១៩ឲ្យបានគ្រប់ៗគ្នា នៅតាមមន្ទីរពេទ្យបង្អែកខេត្ត និងតាមមណ្ឌលសុខភាព ដែលនៅជិតមូលដ្ឋានរស់នៅរបស់បងប្អូន ខណៈថ្មីៗនេះ មានការឆ្លងកើតឡើងនូវជំងឺកូវីដ១៩ សារជាថ្មី ប្រភេទ ( JN 1 Lineages ) នោះ ។

លោកវេជ្ជបណ្ឌិត ឃ្លោក ហួត បានឲ្យដឹងថា តាមការជូនដំណឹងរបស់ក្រសួងសុខាភិបាលពាក់ព័ន្ធ​ទៅការឆ្លងវីរុសកូវីដ១៩ថ្មីនេះ ដែលសូមបងប្អូនប្រជាពលរដ្ឋគ្រប់រូបត្រូវមានការប្រុងប្រយ័ត្ន​ឲ្យ​បានខ្ពស់ ចំពោះបញ្ហាសុខភាព និងនាំកូនៗ ដែលមានអាយុចាប់១២ឆ្នាំឡើង មក​ទទួល​ការចាក់វ៉ាក់​បន្តទៀត​ឲ្យបានគ្រប់ៗគ្នារួមទាំង ​ជនចាស់ជរា អ្នកមានជំងឺ​រ៉ាំរ៉ៃ រាល់​៦ខែម្តង​ដើម្បីបង្ការទប់ស្កាត់​ការឆ្លងជំងឺកូវីដ១៩ថ្មីនេះ ផងដែរ។ បច្ចប្បន្នកំពុងមានការឆ្លងជំងឺកូវីដ១៩ថ្មី បានកើតមានឡើង​នៅឯប្រទេសជិតខាងហើយនោះ។

លោកវេជ្ជបណ្ឌិត ​បានបន្តថា បើទោះបីជាបច្ចុប្បន្ននេះនៅប្រទេសកម្ពុជាពុំទាន់មានការឆ្លង​រាលដាល​ជំងឺកូវីដ១៩ថ្មីនេះច្រើនយ៉ាងណាក្តី ក៏យើងគ្រប់រូបត្រូវតែបន្តការប្រុងប្រយ័ត្នឲ្យបាន​ខ្ជាប់ខ្ជួន​​ដោយត្រូវមានអនាម័យ ល្អ ហូបស្អាត និងត្រូវលាងដៃ និងសាប៊ូឲ្យបាន​ញឹកញាប់​មុនទទួល​ទានអាហារ ការធ្វើបែបនេះ គឺដើម្បីសុខភាពរបស់បងប្អូន​ប្រជាពលរដ្ឋ និង​អាច​កាត់បន្ថយ​ចៀសវាង​ពីការឆ្លងជំងឺកូវីដ១៩ថ្មីនេះ បានផងដែរ៕ ដោយឃិនសារិទ្ធ