រដ្ឋសភា បើកសម័យប្រជុំរដ្ឋសភាលើកទី៤ នីតិកាលទី៧ លើរបៀបវារៈចំនួន ២៩

រដ្ឋសភានៃព្រះរាជាណាចក្រកម្ពុជានៅព្រឹកថ្ងៃទី២២ ខែឧសភាឆ្នាំ២០២៥ បាន​បើក​សម័យ​ប្រជុំ​រដ្ឋសភា​ លើកទី៤ នីតិកាលទី៧ ក្រោមអធិបតីភាពដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ដោយមានរបៀបវារៈចំនួន២៩។

បន្ទាប់ពីស្តាប់ព្រះរាជសារ ព្រះរាជសារព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជូនសម័យប្រជុំរដ្ឋសភាលើកទី៤ នីតិកាលទី៧ និង របាយ​ការណ៍សង្ខេបស្ដីពី សកម្មភាពការងាររបស់រដ្ឋសភា ចម្លោះសម័យប្រជុំរដ្ឋសភាលើកទី៣ និង​លើកទី៤ នីតិកាលទី៧ រួចមកអង្គ​រដ្ឋសភា​បាន​ដំណើរ​ការ​នីតិ​វិធី និង​ធ្វើ​ការ​ពិភាក្សា​សេចក្តី​ព្រាង​ច្បាប់ ដែលមានក្នុងរបៀបវារៈម្តងមួយៗ តាមនីតិវិធី។

សម័យប្រជុំនេះរដ្ឋសភាបានប្រជុំពិភាក្សាពេញមួយថ្ងៃតែម្តង លើរបៀបវា ចំនួន២៩ ក្នុងនោះ BTV សូមលើកយកនូវរបៀបវារៈសំខាន់ៗមួយចំនួនរួមមាន៖

របៀបវារៈ​ទី១. ការបោះឆ្នោតជ្រើសតាំងឯកឧត្តម យក់ ង៉ុយ ជាសមាជិក ក្រុមប្រឹក្សា​ធម្មនុញ្ញ​អាណត្តិ​ថ្មី សម្រាប់អាណត្តិ ៩ឆ្នាំ ជ្រើសតាំងដោយរដ្ឋសភា នីតិកាលទី៧។ ទី២.ការពិភាក្សា និង​អនុម័តសេចក្ដីព្រាងច្បាប់ស្ដីពី ការអនុម័តយល់ព្រមលើការធានាទូទាត់របស់រាជរដ្ឋាភិបាល នៃ​ព្រះរាជា​ណាចក្រកម្ពុជា ឱ្យក្រុមហ៊ុន បានយ៉ាន អេនើជី ឯ.ក សម្រាប់គម្រោង​វិនិយោគ​ស្ថានីយ​ផលិត​អគ្គិសនី ដើរដោយថាមពលពន្លឺព្រះអាទិត្យ អានុភាព ៣០០មេហ្គាវ៉ាត់ នៅខេត្តកំពង់ឆ្នាំង។ ទី៣.ការពិភាក្សា និងអនុម័តសេចក្ដីព្រាងច្បាប់ស្ដីពី ការអនុម័ត​យល់​ព្រមលើ​ការ​ធានា​ទូទាត់​របស់​រាជ​រដ្ឋាភិបាល នៃព្រះរាជាណាចក្រកម្ពុជា ឱ្យក្រុមហ៊ុន វេ សាន់ ស៊ី.អេ.ភី យូណាយធីត អ៊ិន​វេស​ម៉ិន ឯ.ក សម្រាប់គម្រោងវិនិយោគស្ថានីយផលិតអគ្គិសនី ដើរដោយថាមពលពន្លឺព្រះអាទិត្យ អានុភាព ១០០មេហ្គាវ៉ាត់ នៅខេត្តបាត់ដំបង។

ចំពោះរបៀបវារៈផ្សេងទៀតដែលរដ្ឋសភា ពិភាក្សា និង​អនុម័តព្រឹកនេះ ភាគ​ច្រើន​គឺ​សេចក្ដី​ព្រាង​ច្បាប់​ស្ដីពី​ការ​អនុម័ត ពាក់ព័ន្ធនឹងគម្រោងវិនិយោគ នានា​នៅ​កម្ពុជា ដែលរាជរដ្ឋាភិបាល​បាន​ស្នើឡើង​មក​ផងដែរ៕ អត្ថបទ៖ វ៉ន ដារ៉ា