ប្រធានក្រុមការងារថ្នាក់កណ្តាលចុះមូលដ្ឋានខេត្តកំពង់ឆ្នាំង ចុះជួបសំណេះសំណាលជាមួយមេឃុំ ក្រុមប្រឹក្សាឃុំ ទាំង១៤ក្នុងស្រុករលាប្អៀរ ខេត្តកំពង់ឆ្នាំង

កំពង់ឆ្នាំង៖ ឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងារថ្នាក់កណ្តាលចុះមូលដ្ឋានខេត្តកំពង់ឆ្នាំង នៅថ្ងៃទី២២ ខែឧសភា ឆ្នាំ២០២៥នេះ បានជំរុញអោយមេឃុំ ក្រុមប្រឹក្សាឃុំ ត្រូវដឹងអោយច្បាស់ពីសុខទុក្ខ តំរូវការរបស់ប្រជាពលរដ្ឋនៅតាមមូលដ្ឋានរបស់ខ្លួន និងដោះស្រាយអោយបានឆាប់មានតម្លាភាព កុំធ្វើអោយប្រជាពលរដ្ឋមានការថ្នាំងថ្នាក់ចំពោះថ្នាក់នាំភូមិឃុំ នាំអោយមានផលលំបាកនៅពេលឃោសនារកសំឡេងឆ្នោត។ ពិធីនេះ មានការចូលរួមពីក្រុមការងារថ្នាក់កណ្តាលចុះខេត្តកំពង់ឆ្នាំង អាជ្ញាធរខេត្តកំពង់ឆ្នាំង អាជ្ញាធរស្រុករលាប្អៀរ ក្រុមប្រឹក្សាស្រុក ឃុំ និងក្រុមប្រឹក្សាឃុំទាំង១៤ផងដែរ។

បន្ទាប់ពីលោក សេង វិចិត្រ អភិបាលស្រុករលាប្អៀរ បានថ្លែងមតិស្វាគមន៍ និងធ្វើរបាយការណ៍សង្ខេបពីស្ថានភាពទូទៅនៃភូមិសាស្រ្តសង្គម និងសេដ្ឋកិច្ចរបស់ស្រុករលាប្អៀរ ខេត្តកំពង់ឆ្នាំងរួចមក ឯកឧត្តមបណ្ឌិតសភាចារ្យ អ៊ុក រ៉ាប៊ុន បានមានប្រសាសន៍ថា៖ ដោយសារកត្តាសុខសន្តិភាព ស្ថិរភាពនយោបាយ និងការអភិវឌ្ឍរីកចម្រើនលើគ្រប់វិស័យ ក្រោមមគ្គុទ្ទេសដឹកនាំប្រកបដោយគតិបណ្ឌិត និងបញ្ញាញាណឈ្លាសវៃរបស់ សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានបន្តសម្រេចបានសមិទ្ធផលសង្គមជាតិដ៏ធំធេងជូនជាតិមាតុភូមិ និងកំពុងបន្តទៅអនាគត។ ឯកឧត្តមបណ្ឌិតសភាចារ្យ បានសំណូមពរដល់អាជ្ញាធរឃុំ ក្រុមប្រឹក្សាឃុំទាំង១៤ ក្នុងស្រុករលាប្អៀរ ត្រូវបន្តពុះពារសម្រេចភារកិច្ចបម្រើប្រជាពលរដ្ឋអោយបានល្អ សំដៅដណ្តើមទឹកចិត្ត និងការគាំទ្រដោយបេះដូងស្មោះពិតប្រាកដយូរអង្វែងរបស់ប្រជាពលរដ្ឋ បង្កើនស្នូល និងកំលាំងសាមគ្គីរឹងមាំ ដើម្បីពង្រឹងប្រៀបឈ្នះរបស់គណបក្សប្រជាជនកម្ពុជា ឈានទៅសម្រេចជោគជ័យសារជាថ្មីសម្រាប់ការបោះឆ្នោតនាពេលខាងមុខនេះ។

ក្នុងនាមអាជ្ញាធរមូលដ្ឋាន ត្រូវបន្តយកចិត្តទុកដាក់លើការបម្រើ ពង្រឹងសេវាសាធារណៈជូនបងប្អូនប្រជាពលរដ្ឋឱ្យកាន់តែប្រសើរឡើង លឿន ឆាប់រហ័ស និងមានទំនួលខុសត្រូវខ្ពស់។ ពង្រឹងការងារសន្តិសុខសណ្តាប់ធ្នាប់នៅក្នុងមូលដ្ឋានភូមិឃុំរបស់ខ្លួនឱ្យបានល្អ ក្លាយជាភូមិឃុំមានសុវត្ថិភាពជាពិសេសពង្រឹង បង្ការ បង្រ្កាបក្រុមក្មេងទំនើង នឹងរាល់បទល្មើសនានានៅតាមមូលដ្ឋាន ពោលធានាសុខសុវត្ថិភាពជូនបងប្អូនប្រជាពលរដ្ឋ។ យកចិត្តទុកដាក់ឱ្យបានខ្ពស់ចំពោះការយកចិត្តទុកដាក់ការព្យាបាលសុខភាពរបស់បងប្អូនប្រជាពលរដ្ឋ និងត្រូវមានក្រមសីលធម៌ វិជ្ជាជីវៈខ្ពស់ និងមានអកប្បកិរិយាល្អចំពោះអ្នកជំងឺផងដែរ។ យុវជនឃុំនឹងភូមិ ត្រូវបង្កើនសកម្មភាពឱ្យសកម្មលើការងាររបស់ខ្លួននៅក្នុងមូលដ្ឋាន ពិសេសត្រូវធ្វើកិច្ចការងារជាមួយចាស់ព្រឹទ្ធាចារ្យក្នុងមូលដ្ឋានដោយសហការគ្នាឱ្យបានល្អប្រសើរឡើង។ ពន្យល់ប្រជាពលរដ្ឋ ត្រូវធ្វើការអប់រំទូន្មានកូនរបស់ខ្លួន ធ្វើយ៉ាងណាឱ្យពួកគាត់ក្លាយទៅជាកូនល្អ សិស្សល្អ និងមិត្តល្អ ត្រូវខិតខំប្រឹងប្រែងរៀនសូត្រ ក្លាយជាធនធានមនុស្សសម្រាប់បន្តវេណនាថ្ងៃអនាគត៕ កាំង ហុងវាស្នា