អភិបាលស្រុកកំពង់រោទិ៍ខេត្តស្វាយរៀង ណែនាំពលរដ្ឋ​​ត្រូវនាំគ្នាទៅចាក់វ៉ាក់សាំងដើម្បីបង្ការចម្លងជំងឺកូវីដ១៩

ស្វាយរៀង ៖ លោកសុច ពិសី អភិបាលស្រុកកំពង់រោទិ៍ ខេត្តស្វាយរៀង ក្នុងពិធីបើកការដ្ឋានស្ថាបនាផ្លូវចាក់បេតុង នៅឃុំត្នោតថ្ងៃទី២១ ខែឧសភា ឆ្នាំ២០២៥ ម្សិលមិញនេះ បានចលនាពលរដ្ឋនៅក្នុងឃុំ ត្រូវដឹកនាំគ្នាទៅចាក់វ៉ាក់សាំង ឲ្យបានគ្រប់ៗគ្នាបន្ថែមទៀត ដើម្បីបង្ការចម្លងជំងឺ covid១៩ ខណៈដែលជម្ងឺមួយនេះបានផ្ទុះសារជាថ្មីនៅប្រទេសជិតខាងយើង ។

លោកបានបញ្ជាក់ថាជំងឺ covid ១៩ គឺជាជំងឺថ្មីដែលពលរដ្ឋនៅក្នុងសកលលោក បានរងឥទ្ធិពលជំងឺឈឺស្លាប់មនុស្សអស់រាប់សិបពាន់ ម៉ឺននាក់ ហើយជំងឺនេះបច្ចប្បន្នបានកើតសារជាថ្មីនៅប្រទេសជិតខាង ដូច្នេះបងប្អូនត្រូវរៀបចំសំអាតបរិស្ថាន ភូមិករអោយបានស្អាត ហូបចុកឱ្យមានអនាម័យ រស់នៅឲ្យមានគម្លាត ករណីខ្លួនឯងនិងគ្រួសារសង្ស័យមានជំងឺក្តៅផ្ដាសាយប្រញាប់រួសរាន់ ទៅប្រឹក្សាជាមួយក្រុមគ្រូពេទ្យដើម្បីទទួលយកការព្យាបាលពីក្រុមគ្រូពេទ្យពិសេសដឹកនាំគ្នាទៅចាក់វ៉ាក់សាំងបង្ការជំងឺបន្តនៅចាំមណ្ឌលសុខភាពដែលក្រុមគ្រូពេទ្យរង់ចាំទទួលចាក់គ្រប់ពេលវេលារាល់ម៉ោងធ្វើការ។

លោកវេជ្ជបណ្ឌិតគុជ ស៊ីថា ប្រធានមន្ទីរសុខាភិបាលនៃរដ្ឋបាលខេត្តស្វាយរៀង បានប្រាប់ទូរទស្សន៍ BTV តាមរយៈទូរសព្ទ ថ្ងៃទី២២ ខែឧសភា ឆ្នាំ២០២៥នេះថា អនុវត្តតាមការណែនាំរបស់លោកជំទាវឱ  វ៉ាន់ឌីន រដ្ឋលេខាធិការក្រសួងសុខាភិបាលស្ដីពីជំរុញការងារចាក់វ៉ាក់សាំងបង្ការជំងឺកូវីន១៩ រហូតមកដល់ថ្ងៃនេះមន្ទីរ បានប្រជុំដាក់ផែនការជូនដល់មន្ទីរពេទ្យបង្អែកមណ្ឌលសុខភាព ដើម្បីរៀបចំចាក់វ៉ាក់សាំងបង្ការជំងឺកូវីដ១៩ហើយដូច្នេះក្នុងនាមមន្ទីរលោកក៏បានអំពាវនាវដល់ពលរដ្ឋសូមអញ្ជើញទៅចាក់វ៉ាក់សាំងការពារជំងឺកូវីន១៩នៅតាមមន្ទីរពេទ្យនិងមណ្ឌលសុខភាពដែលនៅជិតភូមិឋានរបស់បងប្អូ​ន៕ ដោយ ៖ ភា សារិទ្ធ