គម្រោងកែលម្អបណ្តាញតភ្ជាប់ផ្លូវថ្នល់កម្ពុជា “RCIP” ស្ថាបនាផ្លូវក្រួសក្រហម ១ខ្សែប្រវែងជាង៨ គីឡូម៉ែត្រ ក្រាលកៅស៊ូ DBST សម្រេចបានជាង២៨ ភាគរយ

តាមការឲ្យដឹងពីលោក កៅ វិបុល មន្រ្តីបច្ចេកទេសនៃមន្ទីរអភិវឌ្ឍន៍ជនបទខេត្តក្រចេះ នៅរសៀលថ្ងៃទី២២ ខែឧសភា ឆ្នាំ២០២៥ នេះថា ផ្លូវលំក្រាលក្រួសក្រហម ១ខ្សែ មានប្រវែង ៨១០០ ម៉ែត្រ ស្ថិតក្នុងគម្រោងកែលម្អបណ្តាញតភ្ជាប់ផ្លូវថ្នល់កម្ពុជា”RCIP” បច្ចុប្បន្ន សម្រេចការសាងសង់បានប្រមាណជា ២៨,២២ ភាគរយ ស្ថិតនៅក្នុងឃុំគោលាប់ ស្រុកចិត្របុរី ខេត្តក្រចេះ ។

លោក កៅ វិបុល បានឲ្យដឹងបន្ថែមថា ក្នុងគម្រោងសាងសង់ផ្លូវប្រវែង ៨១០០ ម៉ែត្រខាងលើនេះ ក្នុងនោះ មានផ្លូវបេតុង ប្រវែង ៥០ ម៉ែត្រ លូប្រអប់ ១កន្លែង លូមូល មានចំនួន ១១កន្លែង និងលូរំដោះទឹកតាមបណ្តោយផ្លូវមានប្រវែង ៣០៩ ម៉ែត្រ ។

លោកបានបញ្ជាក់ថា មានប្រជាពលរដ្ឋដែលរស់នៅតាមបណ្តោយខ្សែផ្លូវនេះ ប្រមាណជា ៩០០គ្រួសារ ទទួលអត្ថប្រយោជន៍ផ្ទាល់លើប្រើប្រាស់លើផ្លូវមួយនេះ ហើយជាប្រជាពលរដ្ឋ ២០០គ្រួសារបន្ថែមទៀត អាចទទួលបាន និងការប្រើប្រាស់ផ្លូវដោយប្រយោល ព្រមទាំងបម្រើឱ្យការធ្វើដំណើរទៅមក ការដឹកជញ្ជូនកសិផលផ្សេងរបស់បងប្អូនប្រជាកសិករផងដែរ ។

ជាក់ស្ដែង ផ្លូវមួយខ្សែខាងលើ ក្រុមហ៊ុនទទួលការសាង់សង់ក្នុងកំឡុងខែកុម្ភៈ ឆ្នាំ២០២៥ នឹងកំពុងកែលម្អស្រទាប់គ្រឹះសម្រេចបានប្រមាណជា ៧៧ ភាគរយ ហើយបើគ្មានអ្វីប្រែប្រួលក្រុមហ៊ុនគ្រោងនឹងបញ្ចប់គម្រោងសាងសង់នៅក្នុងឆ្នាំ ២០២៥ ខាងមុខនេះ ។

គួររំលឹកថា សម្រាប់ខេត្តក្រចេះ មានខ្សែផ្លូវចំនួន ១៤ខ្សែ ស្មើនឹងប្រវែងសរុប ១៣៤.៤ គីឡូម៉ែត្រ ត្រូវបានជ្រើសរើសសម្រាប់ការកែលម្អ លើកកម្ពស់កម្រិតគុណភាពផ្លូវ នឹងត្រូវអនុវត្តដោយក្រសួងអភិវឌ្ឍន៍ជនបទ ឆ្លងកាត់ភូមិចំនួន ៣៥ ភូមិ ស្ថិតនៅក្នុងឃុំ ចំនួន ១០ ឃុំ សង្កាត់ចំនួន ១ និងស្រុកចំនួន ៣ ក្រុងចំនួន ១ ៕ ដោយ សេង ម័រ