សម្ដេចធិបតី៖ ការចរចាជុំទី១ ជាមួយអាមេរិកលើការអនុវត្តពន្ធថ្មីគ្រាន់តែជាការជួបគ្នាបង្ហាញពីជំហរដោយសម្ដេចសង្ឃឹមថា ការចរចានៅជុំទី២ នៅខែមិថុនាខាងមុខ នឹងមានលទ្ធផលមួយចំនួន

នៅក្នុងឱកាសដឹកនាំកិច្ចប្រជុំពេញអង្គគណៈរដ្ឋមន្រ្ដី នៅព្រឹកថ្ងៃទី២៣ ខែឧសភាឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី បានមានប្រសាសន៍បញ្ជាក់ថា ការចរចានៅជុំទី១របស់កម្ពុជា ជាមួយភាគីអាមេរិកលើកិច្ចព្រមព្រៀងពាណិជ្ជកម្ម និងការអនុវត្តពន្ធថ្មីរបស់អាមេរិកកាលពីថ្ងៃទី១៣ដល់ថ្ងៃទី១៥ ខែឧសភាកន្លងទៅ គឺគ្រាន់តែជាការជួបគ្នាដើម្បីបង្ហាញពីជំហរ និងក្ដាប់នូវការពន្យល់បន្ថែមទៅលើលក្ខខណ្ឌនៅជុំទី២ ខណៈសម្ដេចសង្ឃឹមថា ការចរចានៅជុំទី២នៅខែមិថុនាខាងមុខនឹងមានលទ្ធផលមួយចំនួន។

ក្នុងឱកាសកិច្ចប្រជុំនេះ សម្ដេចធិបតីមានប្រសាសន៍ថា រាជរដ្ឋាភិបាលអាណត្តិទី៧បានដំណើរការក្នុងរយៈពេលជិត២ឆ្នាំកន្លងមកនេះបានរួមគ្នាដោះស្រាយវិញ្ញាសាចាស់ និងថ្មីៗប្រកបដោយភាពម្ចាស់ការ ដោយភាពស្វាហាប់ឈរលើគោលការណ៍សកម្ម។ សម្ដេចធិបតីបានសម្ដែងនូវការកោតសរសើរចំពោះស្ថាប័ន ក្រសួងគណៈកម្មការ និងក្រុមការងារទាំងអស់ដែលបានធ្វើការងារយ៉ាងសកម្ម ប្រកបដោយចីរភាពទទួលខុសត្រូវ ជាពិសេសក្នុងការងាររៀបចំអនុវត្តគោលនយោបាយ វិធានការ និងកម្មវិធីពិសេសចាំបាច់នានាក្នុងគោលដៅឆ្លើយតបអោយបានទាន់ពេលវេលានិងប្រើប្រាស់កម្លាំងសរុប។

សម្ដេចបានបញ្ជាក់ថា ជាក់ស្តែងរាជរដ្ឋាភិបាលអាចទប់ទល់ និងដោះស្រាយបាននូវបញ្ហានានាក្នុងស្ថានភាពដ៏លំបាកដែលបាននឹងកំពុងជួបប្រទះក្នុង និងក្រៅប្រទេសដែលមានការវិវត្តន៍ស្មុគស្មាញ និងពិបាកប៉ាន់ស្មាននៃសភាពការណ៍វិវត្តន៍អន្តរជាតិទាំងមូលរួមទាំងការកើនឡើង ការប្រកួតប្រជែងភូមិសាស្ត្រនយោបាយសេដ្ឋកិច្ចបច្ចេកវិទ្យាទំនើបៗរវាងប្រទេសមហាអំណាចសង្រ្គាមពាណិជ្ជកម្ម ជាពិសេសការអនុវត្តពន្ធគយបរិការរបស់សហរដ្ឋអាមេរិកនៅក្នុងរដ្ឋបាលប្រធានាធិបតីដូណាល់ត្រាំ, ជម្លោះប្រដាប់អាវុធមានការកើនឡើងបញ្ហាសន្តិសុខមិនប្រពៃណីដែលសុទ្ធជាវិញ្ញាសាដែលត្រូវរួមគ្នា ខិតខំជម្នះឆ្លងដំណោះស្រាយជាបន្តបន្ទាប់។

ក្នុងឱកាសនោះសម្តេចបានកោតសរសើរក្រុមការងារចរចាដែលដឹកនាំដោយ ឯកឧត្ដមឧបនាយករដ្ឋមន្ត្រី ស៊ុន ចាន់ថុល និងលោកជំទាវចម និមល និងក្រុមការងារគាំទ្រ ដឹកនាំដោយ ឯកឧត្ដម អគ្គបណ្ឌិតសភាចារ្យ អូនព័ន្ធមុនីរ័ត្ន និងបណ្ដាអ្នកពាក់ព័ន្ធទាំងអស់ ដែលបានខិតខំធ្វើការងារចរចាពាណិជ្ជពន្ធគយបរិការ ជាមួយសហរដ្ឋអាមេរិកនៅជុំទី១ ខណៈសម្ដេចសង្ឃឹមថា ការចរចានៅជុំទី២នៅខែ មិថុនាខាងមុខនេះនឹង មានលទ្ធផលមួយចំនួន។

សម្ដេចធិបតីបានបញ្ជាក់ថា ពិតណាស់គ្មានកិច្ចការចរចាណាជាមួយសហរដ្ឋអាមេរិកធ្វើឡើងទោះបីជាមួយប្រទេសសម្ព័ន្ធមិត្តក៏គេមិនអាចធ្វើឡើងក្នុងជុំទី១នោះដែរ។ កន្លងមកមានអ្នកអធិប្បាយមិនយល់ពីនីតិវិធីនៃការចរចា សម្ដេចបានបញ្ជាក់ថា ការចរចានៅជុំទី១នេះ គ្រាន់តែជាការជួបគ្នាដើម្បីបង្ហាញពីជំហរនិងក្ដាប់នូវការពន្យល់បន្ថែមទៅលើលក្ខខណ្ឌនៅជុំទី២យើងនឹងធ្វើការងារបន្តសង្ឃឹមថាយើងនឹងអាចបញ្ចប់នៅពេលខាងមុខជាពិសេសមុនពេលកំណត់៩០ថ្ងៃរបស់សហរដ្ឋអាមេរិកពន្យាពេលនោះត្រូវបានបញ្ចប់។ សម្ដេចថ្លែងថា ទោះបីយ៉ាងណាក៏រាជរដ្ឋាភិបាលនឹងខិតខំការពារឱ្យអស់លទ្ធភាពដើម្បីផលប្រយោជន៍ជាតិរបស់យើង៕