នាយកអង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច កោតសរសើរ​ដល់​សុខាភិបាល​កម្ពុជា ចំពោះវឌ្ឍនភាពធំៗ

លោកវេជ្ជបណ្ឌិត Saia Ma’u Piukala នាយកអង្គការ​សុខភាព​ពិភពលោក​ប្រចាំ​តំបន់​ប៉ាស៊ីហ្វិក​ខាង​លិច ទទួលស្វាគមន៍ និងជួបសំណេះសំណាល ជាមួយឯកឧត្តមសាស្រ្តាចារ្យ ឈាង រ៉ា រដ្ឋ​មន្រ្តី​ក្រសួងសុខាភិបាលនៃព្រះរាជាណាចក្រកម្ពុជា និងប្រតិភូ នារសៀលថ្ងៃទី២២ ខែឧសភា ឆ្នាំ​២០២៥ ក្រុងហ្សឺណែវ។

ក្នុងជំនួបសំណេះសំណាល ពិភាក្សាការងារ លោក​នាយកអង្គការ​សុខភាពពិភពលោក​ប្រចាំ​តំបន់​ប៉ាស៊ីហ្វិក​ខាង​លិច (the Western Pacific Region, WPRO) បានបញ្ជាក់ពីការ​កោត​សរសើរ​ដល់​សុខាភិបាល​កម្ពុជា ចំពោះវឌ្ឍនភាពធំៗ ទាំងការដាក់ចេញផែនទី​ចង្អុល​បង្ហាញ​ការ​គ្រប​ដណ្តប់​សុខ​ភាពសាកល (Universal Health Coverage Roadmap) ការផ្តល់ជាអា​ទិភាព​ចម្បង​លើ​សុខភាពបឋម (Primary Health Care) ជាមួយសកម្មភាព​ជា​លទ្ធផល​ជាក់​ស្តែង​ជា​ច្រើន​ក្នុង​សហគមន៍ មណ្ឌលសុខភាព មន្ទីរពេទ្យបង្អែក សកម្មភាពអប់រំសុខភាព ការរៀបចំផែន​ការ​យុទ្ធ​សាស្រ្តសុខាភិបាលដំណាក់កាលទី៤ ឆ្នាំ២០២៥-២០៣៣ ការដាក់អោយ​ដំណើរកា​រ​ផែន​ការ​សក​ម្មភាពប្រយុទ្ធ បង្ការជំងឺមិនឆ្លង និងជំងឺមហារីក ជាដើម។

លោកវេជ្ជបណ្ឌិត Saia Ma’u Piukala នាយកអង្គការសុខភា​ពពិភពលោក​ប្រចាំ​តំបន់​ប៉ាស៊ីហ្វិក​ខាង​លិច ឆ្លៀតក្នុងឱកាសសំណេះសំណាលនេះ បានថ្លែងអំណរ​គុណ​ដល់​រាជ​រដ្ឋាភិបាល​កម្ពុជា​ដែល​បាន​ផ្តល់​វិភាគ​ទាន​រួម​ចំណែក​សម្រាប់​យុទ្ធនាការកៀរគរមូលនិធិទ្រទ្រង់​សកម្មភាព​មនុស្ស​ធម៌​របស់​អង្គការសុខភាពពិភពលោក (Investment Round) ដែលនេះ​គឺ​ជាកា​យ​វិការ​ដ៏​ល្អ​ប្រពៃ​នៃ​កម្ពុជា​។ លោកនាយកប្រចាំតំបន់ ក៏បានជម្រាបអំពី​ស្ថានភាព​របស់​អង្គការ​សុខ​ភាព​ពិភព​លោក ដូចជាការកាត់បន្ថយថវិកាចំណាយ ដោយត្រូវធ្វើអាទិភាពកម្មវិធី ការកែស​ម្រួល​រចនា​សម្ព័ន្ធ តែទោះជាយ៉ាងណាក៏ដោយ អង្គការសុខភាពពិភពលោក ប្តេជ្ញាចិត្ត​បន្ត​គាំទ្រ​សកម្មភាព​សុខាភិបាល​កម្ពុជា​។

ជាការឆ្លើយតប ឯកឧត្តមសាស្រ្តាចារ្យ ឈាង រ៉ា បានថ្លែងអំណរគុណ​យ៉ាង​ជ្រាល​ជ្រៅ​ចំពោះ​អង្គការ​សុខភាពពិភពលោក ដែលនៅតែបន្តចូលរួមជាមួយកម្ពុជា ឧបត្ថម្ភគាំទ្រទាំងបច្ចេកទេស និង​ថវិកា ជូនដល់វិស័យសុខាភិបាល ជាពិសេសកម្មវិធីសំខាន់ៗ ដូចជា ការថែទាំសុភាពបឋម ការ​លុបបំបាត់ជំងឺគ្រុនចាញ់ ជំងឺអេដស៍ ជំងឺរបេង ការប្រយុទ្ធនឹងជំងឺមិនឆ្លង ជាដើម។ ឯកឧត្តមសាស្រ្តាចារ្យរដ្ឋមន្រ្តី ក៏បានស្វាគមន៍ដំណើរទស្សនកិច្ចនៅកម្ពុជា ម្តងទៀត របស់លោ​ក​នាយក​ប្រចាំ​តំបន់ក្នុងឆ្នាំនេះ៕ អត្ថបទ រដ្ឋា