មន្ត្រីនគរបាល ក្នុងអធិការដ្ឋាននគរបាលស្រុកស្វាយជ្រំ ខេត្តស្វាយរៀងបានចាក់វ៉ាក់សាំងការពារជំងឺ covid១៩ដូសទី៧

ស្វាយរៀង ៖ អនុវត្តតាមការណែនាំរបស់ក្រសួងសុខាភិបាល និងការណែនាំបន្ថែមរបស់លោកឧត្តមសេនីយ៍ទោពេជ្រ វីរៈ ស្នងការនគរបាលខេត្ត ស្ដីពី បង្ការចម្លងជំងឺ covid ១៩ នៅថ្ងៃទី២៣ ខែឧសភា ឆ្នាំ២០២៥នេះ មន្ត្រីនគរបាលស្ថិតក្នុងអធិការដ្ឋាននគរបាលស្រុកស្វាយជ្រំ ខេត្តស្វាយរៀង ដឹកនាំដោយ លោកវរសេនីយ៍ឯក សោម សុភ័ណ្ឌ អធិការនគរបាលស្រុកស្វាយជ្រំ បានអញ្ជើញ ទៅចាក់វ៉ាក់សាំងការពារនិងបង្ការចម្លងជំងឺកូវីដ១៩ មកលើរាងកាយរបស់មន្ត្រី នៅតាមមណ្ឌលសុខភាព ជាបន្តបន្ទាប់ហើយ។

ឆ្លៀតក្នុងឱកាសដឹកនាំមន្ត្រីនគរបាលចាក់វ៉ាក់សាំងនៅតាមមណ្ឌលសុខភាពនានាក្នុងស្រុក លោកវរសេនីយ៍ឯក សោម សុភ័ណ្ឌ បានណែនាំដល់មន្ត្រីប៉ុស្តិ៍នគរបាលរដ្ឋបាលទាំង ១៦ ក្នុងស្រុក ត្រូវចុះចលនាដឹកនាំពលរដ្ឋនៅតាមមូលដ្ឋាន ឲ្យពួកគាត់ទៅចាក់វ៉ាក់សាំងបង្ការជំងឺកូវីដ១៩ឲ្យបានគ្រប់ៗគ្នា ខណៈដែលមន្ទីរសុខាភិបាលខេត្តបានរៀបចំទីតាំង ទទួលចាក់វ៉ាក់សាំងជូនពលរដ្ឋនៅគ្រប់មណ្ឌលសុខភាពនិងមន្ទីរពេទ្យ

បង្អែកគ្រប់ពេលវេលាក្នុងម៉ោងបម្រើការងារ។

ទន្ទឹមនិងនោះដែរលោកវរសេនីយ៍ឯកអធិការនគរបាលស្រុកក៏បានណែនាំដល់ថ្នាក់ដឹកនាំមន្ត្រីនគរបាលប៉ុស្តិ៍រដ្ឋបាល ត្រូវដឹកនាំពលរដ្ឋ និងមន្ត្រីក្រោមឱវាទធ្វើអនាម័យ សំអាតបរិស្ថានភូមិ និងកន្លែងបម្រើការងារ ឲ្យបានល្អស្អាត ហូបចុកឲ្យមានអនាម័យ រស់នៅនិងប្រាស្រ័យទំនាក់ទំនងឲ្យមានគម្លាត ក្នុងករណីពលរដ្ឋ ឬមន្ត្រីរបស់យើងមានបញ្ហាសុខភាពប្រញាប់នាំគ្នាទៅប្រឹក្សានិងទទួលយកការព្យាបាលពីក្រុមគ្រូពេទ្យឲ្យបានទាន់ពេលវេលាដើម្បីបញ្ជៀសការគ្រោះថ្នាក់ដល់អាយុជីវិតជាយថាហេតុណាមួយ ។