អតីតអ្នកឧកញ៉ា ហេង សិទ្ធី ត្រូវបាននាំខ្លួនមកដល់តុលាការកម្ពុជាហើយ

អតីតអ្នកឧកញ៉ា ហេង សិទ្ធី ត្រូវបានសមត្ថកិច្ច INTERPOL ចាប់ខ្លួននៅប្រទេសរុស្ស៉ី និងបានបញ្ជូនមកដល់កម្ពុជាហើយ ហើយព្រឹកនេះ នគរបាលបាននាំខ្លួនអតីតអ្នកឧកញ៉ាទៅកាន់សាលាដំបូងរាជធានីភ្នំពេញ។

នាយឧត្តមសេនីយ៍ ស ថេត អគ្គស្នងការនគរបាលជាតិ បានប្រាប់ប្រព័ន្ធផ្សព្វផ្សាយឲ្យដឹងថា នៅយប់ថ្ងៃទី២៤ ខែឧសភា ឆ្នាំ២០២៥ អតីតអ្នកឧកញ៉ា ហេង សិទ្ធី បាននាំខ្លួនមកដល់កម្ពុជាហើយ ដើម្បីបន្តនីតិវិធី។

អតីតឧកញ៉ា ហេង សិទ្ធិ ត្រូវបានចាប់ខ្លួនកាលពីថ្ងៃទី១៣ ខែមករា ឆ្នាំ២០២៥ វេលាម៉ោងប្រហែល១៩:០០នាទី ម៉ោងនៅកម្ពុជា នៅចំណុចស្ថានីយ៍រថភ្លើង នៃទីក្រុង St. Petersburg ខណៈដែលបុគ្គល ហេង សិទ្ធី មានបំណងធ្វើដំណើរទៅទីក្រុងម៉ូស្គូ។ បន្ទាប់ពីចាប់ខ្លួន សមត្ថកិច្ច INTERPOL បានបញ្ជូនមកប្រទេសកម្ពុជានៅយប់ថ្ងៃទី២៤ ខែឧសភា ឆ្នាំ២០២៥ ក្រោមការធ្វើបត្យាប័ន ដែលជាការអនុវត្តតាមដីកាបង្គាប់ឲ្យចាប់ខ្លួន របស់ចៅក្រមស៊ើបសួរសាលាដំបូងរាជធានីភ្នំពេញ ដោយឈ្មោះ ហេង សិទ្ធី ត្រូវបានចោទប្រកាន់ពីបទ «គំរាមកំហែងហែកកេរ្តិ៍មានស្ថានទម្ងន់ទោស» ប្រព្រឹត្តនៅប្រទេសកម្ពុជា ក្នុងខែវិច្ឆិកា ឆ្នាំ២០២៤ បទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញត្តិមាត្រា ៣៧២ និងមាត្រា ៣៧៤ នៃក្រមព្រហ្មទណ្ឌ។ មកដល់ព្រឹកថ្ងៃទី២៥ ខែឧសភា ឆ្នាំ២០២៥ ឈ្មោះ ហេង សិទ្ធី កំពុងស្ថិតក្នុងដែនសមត្ថកិច្ចរបស់សាលាដំបូងរាជធានីភ្នំពេញ ដើម្បីបន្តនីតិវិធីច្បាប់នៃព្រះរាជាណាចក្រកម្ពុជា៕