CCIED គ្រោងយកខេត្តកំពង់ធំអនុវត្តគម្រោងកែលម្អស្តង់ដារ អនាម័យ នៃអាជីវកម្មម្ហូប​អាហារ​តាម​ដង​ផ្លូវ

គណៈកម្មាធិការសម្របសម្រួលការអភិវឌ្ឍន៍សេដ្ឋកិច្ចក្រៅប្រព័ន្ធ (CCIED) នឹង​ជ្រើស​រើស​យក​ខេត្ត​កំពង់ធំ ជាខេត្តទី១ ក្នុងការសាកល្បង អនុវត្តគម្រោងកែលម្អស្តង់ដារ អនាម័យ នៃ​អាជីវកម្ម​ម្ហូប​អាហារ​តាមដងផ្លូវ ដើម្បីជំរុញការលក់ដូរឱ្យមានរបៀបរៀបរយ មានអនាម័យ ខ្ពស់ និង​បរិស្ថាន​​ល្អ ដើម្បីលើកកម្ពស់អ្នកសេដ្ឋកិច្ចក្រៅប្រព័ន្ធ និងការទាក់ទាញវិស័យទេសចរណ៍ជាដើម។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង​ជា​ប្រធាន​គណៈកម្មាធិការ សម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ លើកឡើង​ក្នុង​យុទ្ធនាការ​ផ្សព្វ​ផ្សាយ​ការចុះឈ្មោះតាមថ្នាលឌីជីថល ចុះឈ្មោះអ្នកសេដ្ឋ កិច្ចក្រៅប្រព័ន្ធ និងប្រកាស​ដាក់​ឱ្យ​ដំ​ណើរការអនុវត្តគម្រោងកែលម្អស្តង់ដារ អនាម័យ នៃអាជីវកម្មម្ហូបអាហារតាមដងផ្លូវ នៅខេត្ត កំពង់ធំ នៅថ្ងៃទី២៤ ខែឧសភា ឆ្នាំ២០២៥ ថា ទាក់ទិនការងារអាជីវកម្មតាមដងផ្លូវនេះ បើយោង​តាម​យុទ្ធសាស្រ្តជាតិ ស្តីពីការអភិវឌ្ឍ សេដ្ឋកិច្ចក្រៅប្រព័ន្ធ គឺបានចែងយ៉ាងច្បាស់ គឺមាន​ប្រជាជន​រាប់​លាន​នាក់ធ្វើការក្នុងវិស័យក្រៅប្រព័ន្ធ ដែលបញ្ហានេះរាជរដ្ឋាភិបាល បានគិតគូរ​ក្នុង​ក្រប​ខណ្ឌ​ទូទាំង​ប្រទេស។

ឯកឧត្តមរដ្ឋមន្ត្រី បន្តលើកឡើងថា ជុំវិញអាជីវកម្មតាមដងផ្លូវនេះ, ឯកឧត្តម នួន ផារ័ត្ន អភិបាល​នៃ​គណៈអភិបាលខេត្ត កំពង់ធំ គឺជាអភិបាលខេត្តទី១ ដែលបានធ្វើលិខិតមកកាន់ឯកឧត្តមផ្ទាល់ ក្នុង​នាមជាប្រធានប្រធានគណៈកម្មាធិការសម្របសម្រួល ការអភិវឌ្ឍសេដ្ឋកិច្ចក្រៅប្រព័ន្ធ សូម​ឱ្យ​ជួយ​ខេត្ត​កំពង់ធំ លើការអនុវត្តគម្រោងកែលម្អស្តង់ដារ អនាម័យ នៃអាជីវកម្មម្ហូបអាហារតាមដង ផ្លូវ ដើម្បីជំរុញឱ្យខេត្តនេះក្លាយជាតំបន់ទេសចរណ៍ ខេត្តដែលគេចង់មកលេង ជាពិសេស​ភ្ញៀវ​ទេសចរ​ដែលធ្វើដំណើរឆ្លងកាត់ ជាដើម។

ឯកឧត្តម នួន ផារ័ត្ន អភិបាលនិងគណៈអភិបាលខេត្តកំពង់ធំ បាន​ថ្លែង​អំណរ​គុណ​ចំពោះ​ប្រធាន​គណៈកម្មាធិការ​សម្រប សម្រួលការអភិវឌ្ឍសេដ្ឋកិច្ចក្រៅប្រព័ន្ធ ដែលបានជ្រើសរើស​យក​ខេត្ត​កំពង់ធំ អនុវត្តគម្រោងសាកល្បង លើការកែលម្អស្តង់ដារ អនាម័យ នៃអាជីវកម្ម​ម្ហូប​អាហារ​តាម​ដង​ផ្លូវ ដើម្បីជួយដល់ការរៀបរយលើបញ្ហាអនាម័យ និងបរិស្ថានល្អ ដែលនេះគឺជាការលើកកម្ពស់ អ្នក​សេដ្ឋកិច្ចក្រៅប្រព័ន្ធក្នុងខេត្ត មានមុខរបរកាន់តែរីកចម្រើន ជាពិសេស​ការ​ចូល​រួម​ទាក់​ទាញ​ភ្ញៀវទេសចរ​ជាដើម ខណៈបច្ចុប្បន្ន ប្រមុខរាជរដ្ឋាភិបាលបា​ន​កំពុង​គិត​គូរ​ជួយ​លើក​កម្ពស់​ខេត្ត​កំពង់​ធំដូចជា ការអភិវឌ្ឍក្រុងស្ទឹងសែន, ការអភិវឌ្ឍគម្រោងវារីប្បកម្មនៅក្នុង ស្រុកស្ទោង, ការ​បង្កើត​សួន​កសិឧស្សាកម្មកែច្នៃគ្រាប់ស្វាយចន្ទីនៅកំពង់ស្វាយ, ការជំរុញបង្កើត​រោង​ចក្រ​នៅ​បារាយណ៍-​តាំងគោក និង ការអភិវឌ្ឍផ្លូវថ្នល់ជាដើម ដើម្បីស្រូបយកភ្ញៀវ​ទេសចរ​មិន​ឱ្យ​ទៅ​ហួស​មក​ហួស​ទៀតឡើយ៕ អត្ថបទ៖ សុន រ៉ាឌី