មន្រ្តី ក.ប.ប.៖ រហូតមកដល់ពេលនេះកម្ពុជាពុំទាន់រកឃើញសារធាតុគីមីនៅលើផ្លែទុរេនស្រស់ទេ

មន្រ្តីជាន់ខ្ពស់នៃអគ្គនាយកដ្ឋាន ក.ប.ប. បានឱ្យដឹងថា គិតមកដល់ពេលនេះ ករណីផ្លែឈើទុរេន បន្ទាប់​ពីបានយកគំរូ និងសំណាកចំនួនប្រមាណជាង ៣០ សំណាក មកពីទីតាំងផ្សេងៗគ្នា ដើម្បី​ធ្វើ​ការ​វិភាគ គឺមិនទាន់រកឃើញមានសារធាតុគីមីហាមឃាត់ណាមួយនៅឡើយទេ ​ខណៈ​មន្រ្តី​ជំនាញ​បាន​កំពុងបន្តធ្វើការតាមដានយ៉ាងយកចិត្តទុកដាក់លើករណីនេះ។

មានប្រសាសន៍ប្រាប់ព័ត៌មាន ប៊ីធីវី តាមប្រព័ន្ធតេឡេក្រាម កាលពីរសៀលថ្ងៃទី២៥ ខែ​ឧសភា​កន្លង​ទៅ ​ឯកឧត្ដម គឹម មាសសុខសីហា អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ច​ការ​ប្រកួត​ប្រជែង និងបង្រ្កាបការក្លែងបន្លំ ហៅកាត់ ក.ប.ប. នៃក្រសួងពាណិជ្ជកម្ម បានមាន​ប្រសាសន៍​ប្រាប់​ព័ត៌មាន ប៊ីធីវី ឱ្យដឹងថា មកដល់ថ្ងៃនេះ ក.ប.ប. បានទទួលគំរូ​ពី​អគ្គ​នាយកដ្ឋាន​គយ​ និងរដ្ឋាករកម្ពុជា បានចំនួន ៣គោលដៅ ហើយបានធ្វើតេស្តជាង ៣០សំណាក គឺអត់​មាន​វត្ត​មាន​សារធាតុគីមីហាមឃាត់ប្រភេទ អូរ៉ាមីន អូ (Auramine O) ឬ ប៊ីវ៉ាយធូ នោះទេ (Basic Yellow 2)។

ឯកឧត្តម បានបន្តថា ចំពោះការងារនេះ នឹងធ្វើបន្ត​ទៀត​ដោយ​សហការ​ជាមួយ​អាជ្ញាធរ​គយ​តាម​មាត់​ច្រក​ទាំងអស់ សូមឱ្យគាត់ពិនិត្យការងារឱ្យបានម៉ត់ចត់ និងផ្ញើរគំរូមកឱ្យ ក.ប.ប. ដើម្បីធ្វើ​ការ​វិភាគ​។ ឯកឧត្តមបានបន្ថែមថា ចំពោះលើទីផ្សារ លើកន្លែងប្រមូលផ្តុំ ក៏ដូចជាតាមកសិដ្ឋាន និង​ទី​កន្លែង​ចំការ​ជាដើម យើងសុំឱ្យទាំងម្ចាស់ចំការ ទាំងអ្នករកស៊ីលក់ដូរ ករណីមានការសង្ស័យ ឬ​ចង់​ដឹង​ ក៏អាចផ្ញើរគំរូមកកាន់ ក.ប.ប. បាន ដើម្បីធ្វើតេស្តជូន។

ឯកឧត្តម អគ្គនាយក បានគូសបញ្ជាក់ទៀតថា ចំពោះបញ្ហាទុរេននេះ គឺចង់ពង្រឹង​ការងារ​ឱ្យ​បាន​គត់​ម៉ត់ ពីព្រោះមិនមែនត្រឹមតែយកចិត្តទុកដាក់ទៅលើការនាំចូលប៉ុណ្ណោះទេ ប៉ុន្តែយើង​ក៏​គិត​ទៅ​ដល់​ការ​នាំចេញ​ផងដែរ ព្រោះខ្លាចនៅពេលឃើញមានវត្តមានសារធាតុគីមីហាមឃាត់ទាំងនោះ ខាង​ភាគី​អ្នកបញ្ជាទិញ គេនឹងបដិសេធ ដោយគយ ដោយអាជ្ញាធរមានសមត្ថកិច្ចរបស់គេ វា​នាំ​ឱ្យ​ប៉ះ​ពាល់​ទៅដល់ផលិតផលពីកម្ពុជារបស់យើងទាំងមូល។

នៅក្នុងកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី២៣ ខែឧសភា ឆ្នាំ២០២៥កន្លងទៅ សម្តេច​ធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំ​ឱ្យ​អាជ្ញាធរ​ពាក់​ព័ន្ធ​បង្កើន​ការ​យក​ចិត្ត​ទុក​ដាក់​ខ្ពស់ក្នុងការត្រួតពិនិត្យ និងទប់ស្កាត់ ចំពោះការនាំចូលចំណីអាហារដែលមានជាតិគីមី ពិសេស​ធុរេន និងសាច់គោ ដែលត្រូវបានផ្អាកការនាំចូលជាបណ្តោះអាសន្នដោយសារជំងឺឆ្លង។ ចំណាត់​ការ​នេះ គឺដើម្បីការពារសុខភាពប្រជាពលរដ្ឋ៕ អត្ថបទ៖ ឈិត បូរ៉ាវី