មន្រ្តីនគរបាល២នាក់ ត្រូវតំណាងអយ្យការបើកការស៊ើបសួរពីបទ ប៉ុនប៉ង សូកប៉ាន់ និងបទ សម្អាតប្រាក់

ភ្នំពេញ៖ លោក ប្លង់ សុផល ព្រះរាជ​អាជ្ញារង និង​ជា​អ្នក​នាំពា​ក្យ​អយ្យការ​អម​សាលា​ដំបូង​រាជ​ធានី​ភ្នំពេញ​ បានបញ្ជាក់ប្រាប់នៅរសៀលថ្ងៃទី២៦ ខែឧសភា ឆ្នាំ២០២៥នេះ ពាក់ព័ន្ធ​មន្រ្តី​នគរបាល​២​នាក់ ម្នាក់ជា​អធិការរងនគរបាលស្រុកបវេល ត្រូវបានតំណាង​អយ្យ​ការ​បើកការស៊ើប​សួរពីបទ៖ ប៉ុនប៉ង សូកប៉ាន់ និងបទសម្អាតប្រាក់ តាមមាត្រា ៣២ នៃច្បាប់ស្តីពីការប្រឆាំងអំពើពុករលួយ មាត្រា ២៧ មាត្រា ៦០៥ នៃក្រមព្រហ្មទណ្ឌ និងមាត្រា ៣៨ នៃច្បាប់ស្តីពី​ការ​ប្រឆាំង​ការ​សម្អាត​ប្រាក់ និ​ងហិរញ្ញប្បទានភេរវកម្ម ។

មន្រ្តីនគរបាលទាំង០២នាក់ មានឈ្មោះ ទី១៖ ឈ្មោះ វ៉ន វាសនា អាយុ៣៨ឆ្នាំ មានតួនាទី​ជា​អធិការ​រង​នគរបាលស្រុកបវេល ខេត្តបាត់ដំបង (ពាក់ស័ក្តិ៤កន្លះ) និងទី២៖ ឈ្មោះ តាំង សំណាង (ហៅ សុខ ច័ន្ទសំណាង) អាយុ៤៣ឆ្នាំ ជាមន្រ្តីនគរបាល៕

តាមមន្រ្តីជំនាញ បានឲ្យដឹងថា មន្រ្តីនគរបាល២នាក់ ម្នាក់ជាអធិការរងនគរបាលស្រុកបវេល ត្រូវ​បាន​អង្គ​ភាព​ប្រឆាំងអំពើពុករលួយ (ACU) បានសម្រេចឃាត់ខ្លួន ហើយបានបញ្ជូន​ទៅ​កាន់​សាលា​ដំបូង​រាជ​ធានីភ្នំពេញ ដើម្បីចាត់ការតាមច្បាប់ ពាក់ព័ន្ធករណីលួចដោះលែងជនជាតិថៃ ក្នុង​រឿង​បទ​ល្មើស ជាថ្នូរលុយរាប់ម៉ឺនដុល្លារ។

សេចក្តីរាយការណ៍ បានបញ្ជាក់ថា ក្រោយបញ្ចប់បើកការស៊ើបសួរលើជនត្រូវចោទទាំង២នាក់ ពី​តំណាង​អយ្យ​ការលោក ទុង រតនា, លោក ហុក ពៅ អនុប្រធានសាលាដំបូងរាជធានីភ្នំពេញ និង​ជា​ចៅ​ក្រម​ស៊ើបសួរបានសម្រេចឃុំខ្លួន​ជន​ជាប់ចោទដាក់ពន្ធនាគារព្រៃសនៅថ្ងៃទី២៦ ខែឧសភា ឆ្នាំ២០២៥នេះ៕ អត្ថបទ៖ កុម្ភៈ