ពលរដ្ឋ និងកុមារ បន្តមកចាក់វ៉ាក់សាំងកូវីដ-១៩ដូសជំរុញ នៅមណ្ឌលសុខភាពក្រាំងធ្នង់ ទប់ស្កាត់ការរីករាលដាល

ភ្នំពេញ ៖ បងប្អូនប្រជាពលរដ្ឋ មកចាក់វ៉ាក់សាំងកូវីដ-១៩ ដូសជំរុញ ប្រភេទ ភីហ្វាយហ្សឺ(Pfizer) ដើម្បីទប់ស្កាត់ការឆ្លងរីករាលដាលក្នុងសហគមន៍ និងកុមារ-ស្រី្ត ចាក់វ៉ាក់សាំងបង្ការជំងឺ១១មុខ ថ្នាំគ្រាប់ជីវជាតិអា(A) ថ្នាំគ្រាប់ទម្លាក់សត្វល្អិត ពីក្រុមការងារគ្រូពេទ្យនៃមណ្ឌលសុខភាពក្រាំងធ្នង់ ស្ថិតក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

​លោកស្រី សំ ម៉ាឡៃ ប្រធានមណ្ឌលសុខភាពក្រាំងធ្នង់ នៃការិយាល័យសុខាភិបាលស្រុកប្រតិបតិ្តសែនសុខ (OD សែនសុខ) មន្ទីរសុខាភិបាល នៃរដ្ឋបាលរាជធានីភ្នំពេញ បានថ្លែងប្រាប់ BTV ព័ត៌មាន នាព្រឹកថ្ងៃទី២៦ ខែឧសភា ឆ្នាំ២០២៥នេះថា បច្ចុប្បន្នមន្រី្តសុខាភិបាល នៃមណ្ឌលសុខភាពក្រាំងធ្នង់ បានផ្តល់សេវាសុខាភិបាល ជូនបងប្អូនប្រជាពលរដ្ឋ ក្មេង ចាស់ ប្រុស ស្រី ២៤ម៉ោង ក្នុងមួយថ្ងៃ និង៧ថ្ងៃ ក្នុងមួយសប្តាហ៍។ ជាពិសេសបន្ទាប់ពីរកឃើញមានការឆ្លងដោយកន្លែងនៃជំងឺកូវីដ-១៩ ថ្មី JN.1 ព្រមទាំងទទួលបានការណែនាំភ្លាមៗពីក្រសួងសុខាភិបាល ក៏ដូចជាមន្ទីរសុខាភិបាល នៃរដ្ឋបាលរាជធានីភ្នំពេញ និងការិយាល័យសុខាភិបាលស្រុកប្រតិបតិ្តសែនសុខ ក្រុមគ្រូពេទ្យយើង បានរៀបចំទីកន្លែងចាក់វ៉ាក់សាំងការពារជំងឺកូវីដ-១៩ ក្នុងមណ្ឌលសុខភាព និងចុះចាក់វ៉ាក់សាំងកូវីដ-១៩ តាមខ្នងផ្ទះរស់នៅរបស់បងប្អូនប្រជាពលរដ្ឋ និងផ្តល់វ៉ាក់សាំងបង្ការជំងឺ១១មុខជូនកុមារ និងស្រី្តផងដែរ។

ចំណែកមន្រី្តរាជការ បងប្អូនប្រជាពលរដ្ឋ រស់នៅក្នុងមូលដ្ឋានខណ្ឌសែនសុខ បានអញ្ជើញមកចូលរួមចាក់វ៉ាក់សាំងការពារជំងឺកូវីដ-១៩ បានលើកឡើងរួមគ្នាថា ថ្ងៃនេះពួកគាត់បានមកចាក់វ៉ាក់សាំងកូវីដ-១៩ គឺទី១. ដើម្បីការពារសុខភាព ទី២.ដើម្បីទប់ស្កាត់ការឆ្លងរីករាលដាលក្នុងសហគមន៍ ហើយការចាក់វ៉ាក់សាំងចាប់តាំងពីដូសទី១ រហូតដល់ដូសទី៥ និងដូសទី៦នេះ មានសុខភាពល្អ ទាក់ទងបញ្ហាជំងឺផ្តាសាយកន្លងមកធ្លាប់មានជំងឺផ្តាសាយញឹកញាប់។ ដោយឡែកនៅពេលចាក់វ៉ាក់សាំងកូវីដ-១៩ គឺជំងឺផ្តាសាយ ត្រូវបានកាត់បន្ថយច្រើន និងធ្វើឲ្យសុខភាពរបស់ពួកគាត់ មានភាពល្អប្រសើរ។

សូមរំលឹកថា បើយោងទៅតាមផេកផ្លូវការរបស់ក្រសួងសុខាភិបាល បានបញ្ជាក់នាព្រឹកថ្ងៃទី២៦ ខែឧសភានេះថា វីរុសកូវីដ-១៩ អូមីក្រុងបំប្លែងថ្មី ជេអិន១ (JN.1) ជាប្រភេទវីរុស ដែលឆ្លងរីករាលដាលយ៉ាងឆាប់រហ័ស សូមអនុវត្តវិធានការ លាងដៃ ពាក់ម៉ាស់ក្នុងពេលចាំបាច់ ខ្ទប់មាត់ ច្រមុះ ពេលក្អក កណ្តាស់ ដោយប្រើផ្នត់កែងដៃកន្សែង ឬ ក្រដាសអនាម័យ រក្សាគម្លាតជាមួយបុគ្គលមានរោគសញ្ញាផ្តាសាយ។ សូមទៅចាក់វ៉ាក់សាំង កូវីដ-១៩ រាល់ ៦ខែម្តង ជាពិសេស ជនវ័យចាស់ ជនចាស់ជរា អ្នកមានជំងឺរ៉ាំរ៉ៃ និងមានភាពសាំថយចុះ៕

អត្ថបទ រដ្ឋា