វេទិកាការងារសប្តាហ៍នេះ នឹងដាក់តាំងបង្ហាញតម្រូវការកម្លាំងពលកម្មប្រមាណជិត ៦០០កន្លែង

ភ្នំពេញ៖ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៩ ខែឧសភាខាងមុខនេះ នឹងរៀបចំវេទិកាការងារ ដោយនាំឱកាសការងារថ្មីៗយ៉ាងតិចប្រមាណជិត ៦០០កន្លែង នឹងផ្តល់ជូនយុវជន សិស្ស និស្សិត និងអ្នកកំពុងស្វែរការងារ ព្រមទាំងឱកាសកម្មសិក្សាការងារនៅមជ្ឈមណ្ឌលការងាររាជធានីភ្នំពេញ។

ទីភ្នាក់ងារជាតិមុខរបរ និងការងារ បានសសេរឱ្យដឹងថា ក្រុមហ៊ុនធំៗចំនួន១០ ដែលចូលរួមក្នុងវេទិកាការងារនេះ មកពីវិស័យមីក្រូហិរញ្ញវត្ថុ , កាហ្វេ , ភោជនីយដ្ឋាន , ធានារ៉ាប់រង និងវិស័យធនាគារជាដើម ដែលនឹងជ្រើសរើសបុគ្គលិកភ្លាមៗនៅវេទិកាការងារផ្ទាល់តែម្ដង ដែលនឹងប្រព្រឹត្តទៅចាប់ពីព្រឹកម៉ោង៨ រហូតដល់ម៉ោង៥ល្ងាច នៅបរិវេណក្រសួងការងារ និងបណ្តុះបណ្តាលវិជ្ជាជីវៈ។

ទីភ្នាក់ងារជាតិមុខរបរ និងការងារ បានបញ្ជាក់ដល់យុវជន សិស្ស/និស្សិត និងអ្នកកំពុងស្វែងរកការងារធ្វើ ឬចង់ផ្លាស់ប្តូរការងារទាំងអស់ អាចយកប្រវត្តិរូបសង្ខេប (CV) ដើម្បីចូលរួមដាក់ពាក្យ និងសម្ភាសផ្ទាល់ជាមួយអ្នកតំណាងក្រុមហ៊ុនទាំងនោះ ពោល គឺដាក់ភ្លាមសម្ភាសភ្លាមតែម្ដង។

សូមបញ្ជាក់ថា វេទិកាការងារនេះ ត្រូវបានរៀបចំឡើងដោយទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយសហភាពសហព័ន្ធយុវជនកម្ពុជា វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ដើម្បីផ្តល់ភាពងាយស្រួលដល់យុវជន សិស្ស/និស្សិត ក្នុងការដាក់ពាក្យស្វែងរកការងារ និងសម្ភាសការងារជាមួយតំណាងក្រុមហ៊ុនធំៗនៅមួយកន្លែងភ្លាមៗតែម្តង៕

អត្ថបទ៖ ឈិត បូរ៉ាវី