កម្ពុជា-ឥណ្ឌាបន្ដពង្រឹងកិច្ចសហការបន្ថែមទៀតពិសេសការប្រយុទ្ធប្រឆាំងគ្រឿងញៀន និងបទល្មើសតាមអនឡាញ

ភ្នំពេញ ៖ នាយករដ្ឋមន្រ្តីស្តីទី ឯកឧត្តម សន្តិបណ្ឌិត នេត សាវឿន លោក VANLALVAWNA BAWITLUNG ឯកអគ្គរដ្ឋទូត នៃសាធារណរដ្ឋឥណ្ឌាប្រចាំកម្ពុជា នៅព្រឹកថ្ងៃទី២៨ ខែឧសភា ឆ្នាំ២០២៥នេះ បានជួបពិភាក្សាជាមួយគ្នា ដោយក្នុងកិច្ចជំនួបនោះភាគីទាំងពីរបានសន្យា បន្តពង្រឹងកិច្ចសហប្រតិបត្តិការទ្វេភាគីឲ្យកាន់តែល្អប្រសើរ បន្ថែមទៀត ជាពិសេសការប្រយុទ្ធប្រឆាំងបទល្មើសគ្រឿងញៀន និងបទល្មើសតាមអនឡាញជាដើម។

នៅក្នុងកិច្ចជំនួបនោះ ឯកឧត្តម នាយករដ្ឋមន្រ្តីស្តីទី បានរំលឹកថា ប្រទេសឥណ្ឌា បានចូលរួមចំណែកកសាងអភិវឌ្ឍន៍ក្នុងប្រទេសកម្ពុជាយ៉ាងសកម្ម និងជួយពង្រឹងកិច្ចសហប្រតិបត្តិការលើគ្រប់វិស័យ ខណៈ កម្ពុជា និងឥណ្ឌា ជាគោលដៅទេសចរណ៍ទៅវិញទៅមក ហើយជាពិសេសប្រទេសឥណ្ឌា ក៏ជាគោលដៅសេវាសុខភិបាលសម្រាប់ប្រជាជនកម្ពុជាផងដែរ។ ឯកឧត្តមក៏បានលើកឡើងអំពីកិច្ចការដែលទទួលភារកិច្ចក្នុងអាណត្តិនេះ រួមមាន ទទួលបន្ទុកវិស័យសន្តិសុខជាតិ, ទទួលបន្ទុកជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន, គណៈកម្មាធិការសន្តិសុខឌីជីថល និងគណៈកម្មការជាតិសន្តិសុខអាកាសចរណ៍ស៊ីវិល។ ដោយឡែក ចំពោះបញ្ហាគ្រឿងញៀន ទាមទារឲ្យកិច្ចសហការបន្ថែមរវាងប្រទេសឥណ្ឌា និងប្រទេសកម្ពុជា។

ថ្លែងនៅក្នុងកិច្ចជំនួបនោះដែរ លោក ឯកអគ្គរដ្ឋទូតនៃសាធារណរដ្ឋឥណ្ឌាប្រចាំកម្ពុជា បានយល់ឃើញថា ថ្នាក់ដឹកនាំកម្ពុជាជាបុគ្គលវិជ្ជមាន និងសកម្មក្នុងការជំរុញកិច្ចសហប្រតិបត្តិការ និងពង្រឹងទំនាក់ទំនងកាន់តែប្រសើរ ដោយលោកបានទទួលការកោតសរសើរយ៉ាងខ្លាំង ពីសហការីថា ថ្នាក់ដឹកនាំកម្ពុជា គឺជាមិត្តដ៏ល្អ។ លោកបានបង្ហាញនូវការគាំទ្រ ចំពោះការផ្លាស់ប្តូរទំនាក់ទំនងរវាងប្រជាជន និងប្រជាជន ជាក់ស្តែងបច្ចុប្បន្នឥណ្ឌាមានប្រជាជនជាង១,៤០០លាននាក់ ហើយលោកជឿជាក់ថា ប្រាកដជាមានវត្តមានជនជាតិឥណ្ឌាមកកម្ពុជាកាន់តែច្រើន សម្រាប់បេសកកម្ម ឬមកវិនិយោគ។ លោកជឿជាក់ដែរថា តាមរយៈភារកិច្ចដែលឯកឧត្តមនាយករដ្ឋមន្រ្តីស្តីទីទទួលបន្ទុក នឹងជួយពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរកាន់តែល្អប្រសើរបន្ថែមទៀតផងដែរ៕

អត្ថបទ ៖ បាន ចក់