កម្ពុជា-ម៉ាឡេឯកភាពគ្នាបន្ដពង្រឹងកិច្ចសហការល្អ ដើម្បីផលប្រយោជន៍ជាតិ និងប្រជាជនប្រទេសទាំងពីរ

ភ្នំពេញ ៖ ឯកឧត្តមសន្ដិបណ្ឌិត នេត សាវឿន នាយករដ្ឋមន្ដ្រីស្ដីទីនៃកម្ពុជា នៅព្រឹកថ្ងៃទី២៨ ខែឧសភា ឆ្នាំ២០២៥នេះ បានទទួលជួបសម្ដែងការគួរសម និងពិភាក្សាការងារជាមួយលោក SHAHARUDDIN BIN ONN ឯកអគ្គរាជទូតម៉ាឡេស៊ីប្រចាំកម្ពុជា ដោយកិច្ចជំនួបនេះតបានធ្វើឡើងនៅទីស្តីការគណៈរដ្ឋមន្ដ្រី។

ថ្លែងនៅក្នុងកិច្ចជំនួបនោះ ឯកឧត្តមសន្ដិបណ្ឌិត នេត សាវឿន បានស្វាគមន៍ដោយរំលឹកអំពីប្រវត្តិ នៃទំនាក់ទំនងការទូតទ្វេភាគីរវាងកម្ពុជា និងម៉ាឡេស៊ី ដែលមានអាយុកាលជាង៧០ឆ្នាំមកនេះ បានវាយតម្លៃខ្ពស់ និងកោតសរសើរចំពោះការបំពេញបេសកកម្មការទូតនៅកម្ពុជា របស់លោក SHAHARUDDIN BIN ONN ក្នុងរយៈពេលមួយឆ្នាំមកនេះ ដែលបន្ដរក្សាបានយ៉ាងល្អ នូវទំនាក់ទំនងមិត្តភាព និងកិច្ចសហប្រតិបត្តិការលើវិស័យជាច្រើន ជាពិសេសលលើវិស័យសេដ្ឋកិច្ច ពាណិជ្ជកម្ម វិនិយោគ និងទេសចរណ៍ជាដើម។

ឯកឧត្តមនាយករដ្ឋមន្រ្តីស្តីទីក៏បានលើកឡើងអំពីស្នាដៃមួយចំនួនរបស់រាជរដ្ឋាភិបាលកម្ពុជា លើការងារធានាសន្ដិសុខ សណ្ដាប់ធ្នាប់ ពិសេសលើការងារប្រយុទ្ធប្រឆាំងគ្រឿងញៀន ដែលបានដាក់ចេញនូវយន្ដការច្រើនសំដៅទប់ស្កាត់ បង្ក្រាបគ្រឿងញៀន ហើយទទួលបានលទ្ធផលល្អជាបន្ដបន្ទាប់។ ប៉ុន្ដែអ្វីដែលជាចំណុចប្រឈមរបស់កម្ពុជាលើការងារនេះ គឺការលួចនាំចូលឆ្លងកាត់ប្រទេសកម្ពុជាចេញទៅប្រទេសទី៣ ដោយសារតែកម្ពុជា មានភូមិសាស្ដ្រនៅជិតតំបន់ត្រីកោណមាស ហើយរាជរដ្ឋាភិបាលកម្ពុជា បន្ដខិតខំប្រឹងប្រែងលើការងារនេះបន្ថែមទៀត និងស្នើសុំភាគីម៉ាឡេស៊ីបន្តកិច្ចសហប្រតិបត្តិការលើការងារនេះផងដែរ។

ជាមួយគ្នានេះ ឯកឧត្តមសន្ដិបណ្ឌិត នាយករដ្ឋមន្ដ្រីស្ដីទី ក៏បានថ្លែងអំណរគុណដល់រដ្ឋាភិបាលម៉ាឡេស៊ី ដែលបានជួយគាំទ្រគ្រប់មធ្យោបាយ និងលទ្ធភាពដល់ពលករខ្មែរដែលកំពុងបម្រើការនៅទីនោះ ខណៈរាជរដ្ឋាភិបាលកម្ពុជា ក៏ធានាបានយ៉ាងគត់មុតចំពោះវិនិយោគិន ភ្ញៀវទេសចរ ធុរជន និងប្រជាជនម៉ាឡេស៊ីនៅកម្ពុជាផងដែរ។

ថ្លែងនៅក្នុងកិច្ចជំនួបនោះដែរ លោក SHAHARUDDIN BIN ONN បានថ្លែងអំណរគុណដល់រាជរដ្ឋាភិបាលកម្ពុជា ចំពោះការជួយយកចិត្តទុកដាក់គាំពារពលរដ្ឋម៉ាឡេស៊ី ធុរកិច្ចជន និងភ្ញៀវទេសចរ ដែលមកប្រទេសកម្ពុជា។ លោកក៏ស្ញប់ស្ញែងចំពោះគោលនយោបាយរបស់រាជរដ្ឋាភិបាលកម្ពុជា ក្នុងការបង្កបរិយាកាសអំណោយផលលើវិស័យធុរកិច្ច ដោយបានផ្ដល់ឱកាស និងអត្ថប្រយោជន៍ជាច្រើនដល់ធុរជន ដែលកំពុងស្វែងរកឱកាសវិនិយោគ និងបន្ដការវិនិយោគនៅកម្ពុជា។ ទន្ទឹមនឹងនេះ លោកឯកអគ្គរាជទូតនឹងចូលរួមពង្រឹង និងពង្រីកកិច្ចសហប្រតិបត្តិការលើវិស័យទូរគមនាគម ធនាគារ ធនារ៉ាប់រង និងពង្រីកវិស័យជាច្រើនទៀតនៅពេលអនាគតនៅប្រទេសកម្ពុជា។

ចំពោះការងារប្រយុទ្ធប្រឆាំងគ្រឿងញៀនរបស់កម្ពុជា លោកទូតបានកោតសរសើរចំពោះប្រទេសកម្ពុជា គឺមានភាពរឹងមាំ ទាំងក្នុងកិច្ចសហប្រតិបត្តិការទ្វេភាគី និងក្នុងយន្តការរបស់អាស៊ាន។ លោកឯកអគ្គរាជទូតក៏បានបញ្ជាក់ជំហរក្នុងការជួយគាំទ្រដល់កម្ពុជា លើការងារប្រយុទ្ធប្រឆាំងគ្រឿងញៀន ហើយម៉ាឡេស៊ីរង់ចាំសហការ និងផ្ដល់ការគាំទ្រតាមលទ្ធភាពរបស់ខ្លួន ចំពោះអ្វីដែលជាតម្រូវការរបស់កម្ពុជា ដោយយល់ឃើញថា គ្រឿងញៀន គឺពិតជាបញ្ហាលំបាកមួយដែលត្រូវរួមគ្នាដោះស្រាយដោយខានមិនបាន៕

អត្ថបទ ៖ បាន ចក់