មន្ទីរព័ត៌មានខេត្តកំពង់ឆ្នាំង ដង្ហែក្បួនយុទ្ធនាការប្រឆាំងព័ត៌មានក្លែងក្លាយ ក្រោមទិសស្លោក «និយាយថាទេចំពោះព័ត៌មានក្លែងក្លាយ»

កំពង់ឆ្នាំង៖ មន្ទីរព័ត៌មានខេត្តកំពង់ឆ្នាំង នាថ្ងៃទី៣១ ខែឧសភា ឆ្នាំ២០២៥នេះ បាន​ដង្ហែ​ក្បួន​យុទ្ធនាការ​ប្រឆាំងព័ត៌មានក្លែងក្លាយ ក្រោមទិសស្លោក «និយាយថាទេចំពោះព័ត៌មានក្លែងក្លាយ។ យុទ្ធនាការនេះ បានអនុវត្តនៅក្នុងខេត្តកំពង់ឆ្នាំង និងនៅទូទាំងប្រទេស ក្នុងរយៈពេល១២ខែ គឺ​ចាប់​ផ្តើម​ពី​ថ្ងៃទី១ ខែមេសា ឆ្នាំ២០២៥ ដល់ថ្ងៃទី៣១ ខែមីនា ឆ្នាំ២០២៦។ ចូលរួម​អនុវត្ត​យុទ្ធនាការ​ក្នុង​ព្រឹកនេះ ដឹកនាំដោយលោក ឈឹម វុទ្ធា អភិបាលរងខេត្ត លោក ឈៀង វណ្ណៈ ប្រធាន​មន្ទីរព័ត៌មានស្តីទី អាជ្ញាធរក្រុងកំពង់ឆ្នាំង សិស្សានុសិស្ស និងអង្គភាពពាក់ព័ន្ធទាំងអស់ ក្នុង​គោលបំណងលើកកម្ពស់ការយល់ដឹងសាធារណៈ អំពីគ្រោះថ្នាក់ និង​ផល​វិបាក​នៃ​ព័ត៌មាន​ក្លែង​ក្លាយ​។

លោក ឈឹម វុទ្ធា អភិបាលរងខេត្តបានថ្លែងថា៖ ការបញ្ជ្រាបការយល់ដឹង ឱ្យដល់​ប្រជាពលរដ្ឋ​ក្នុង​សហគមន៍​មូលដ្ឋាន និងពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយ ជាកត្តាដ៏សំខាន់មួយ ដើម្បី​ផ្លាស់​ប្តូរ​ឥរិយាបទរបស់ប្រជាពលរដ្ឋ ដែលជាអ្នកប្រើប្រាស់បណ្តាញទំនាក់ទំនងសង្គម និង​ប្រព័ន្ធ​ផ្សព្វ​ផ្សាយ​ទំនើប ឱ្យមកចូលរួមទប់ស្កាត់ការរីកសាយភាយនូវព័ត៌មានក្លែងក្លាយ។ គ្រប់ប្រភេទ​នៃ​ព័ត៌មាន​ក្លែង​ក្លាយសុទ្ធតែមានឥទ្ធិពលអវិជ្ជមានមកលើផ្នែកសន្តិសុខ សណ្តាប់ធ្នាប់ សង្គម សេដ្ឋកិច្ច និងនយោបាយ ពោលគឺព័ត៌មានក្លែងក្លាយអាចបង្កអស្ថិរភាព បង្កើត​អំពើ​ហិង្សា​ដែល​បណ្តាល​ឱ្យ​កើតមានអរិភាពសង្គម ប្រជាពលរដ្ឋបាត់ទំនុកចិត្តលើការដឹកនាំ និង​នាំ​ឱ្យ​មាន​ការ​បែក​បាក់​សាមគ្គីភាព ក្នុងសង្គម។ មនុស្សម្នាក់ គឺជាជនបង្គោលម្នាក់ ក្នុង​ការ​ប្រឆាំង​ព័ត៌មា​ន​ក្លែង​ក្លាយ​ ដូច្នេះសូមប្រជាពលរដ្ឋគ្រប់រូបចូលរួមក្នុងយុទ្ធនាការជាមួយក្រសួងព័ត៌មាន និងតួអង្គ​ពាក់ព័ន្ធ​ទាំង​ក្នុងវិស័យរដ្ឋ និងឯកជន ដើម្បីរួមគ្នាធានាបរិយាកាសសង្គមឌីជីថលមានសុវត្ថិភាព ការ​ទទួល​ព័ត៌មានប្រកបដោយគុណភាពសម្រាប់បម្រើដល់ប្រយោជន៍សាធារណៈ ការពារ​ស្ថិរភាព​សង្គម និងរួមចំណែកដល់ការអភិវឌ្ឍដោយនិរន្តរភាព។

លោក ឈៀង វណ្ណៈ ប្រធានមន្ទីរព័ត៌មានបានបញ្ជាក់ថា៖ យុទ្ធនាការ​នេះ​លើក​កម្ពស់​ការ​យល់​ដឹង​ប្រជា​ពលរដ្ឋ ក្នុងសហគមន៍ក្នុងការបង្អាក់ការចែករំលែកព័ត៌មានលើបណ្តាញសង្គម ដោយ​មិន​មាន​ការ​ផ្ទៀង​ផ្ទាត់ជាមុន ជាពិសេសរបៀបក្នុងការកំណត់អត្តសញ្ញាណព័ត៌មានក្លែងក្លាយ វិធាន​ការ​ទប់​ស្កាត់​ការ​រីកសាយភាយ និងការបន្សាបព័ត៌មានក្លែងក្លាយ ព្រមទាំងបំផុសការ​បង្កើត​ទម្លាប់​ប្រើ​ប្រាស់​បណ្តាញសង្គមដោយការទទួលខុសត្រូវ តាមរយៈការអនុវត្តវិធានការសុវត្ថិភាព ការ​បង្ការ​ហានិភ័យ និងសកម្មភាពនានាចាំបាច់ក្នុងការធានាសុវត្ថិភាពព័ត៌មានក្នុងសង្គម៕ កាំង ហុងវាស្នា