ឯកឧត្តម គួច ចំរើន៖ មន្ត្រីទាំងអស់ត្រូវកែទម្លាប់មិនល្អ និងរួមគ្នា​បម្រើ​ពលរដ្ឋ​ឲ្យ​បាន​ល្អ​នៅ​ក្នុង​មូលដ្ឋាន

មន្ត្រីរាជការតាមមូលដ្ឋាន ឃុំ សង្កាត់ ក្រុង ស្រុកនានាដែលមានឥរិយាបថ ទម្លាប់​មិន​ល្អ​ចាំបាច់​ត្រូវ​កែ​ប្រែទ​ម្លាប់ ឥរិយាបថមិនល្អទាំងនោះចេញបន្ទាន់ ក្នុងទិសដៅរួមគ្នាក៏សាងអភិវឌ្ឍន៍ បម្រើ​ពលរដ្ឋ​ឲ្យ​បានល្អ រីឯកងកម្លាំងទាំងបី ក៏ត្រូវសហការគ្នាល្អ ជាមួយ​គណៈ​អភិបាល​ស្រុក​ ដើម្បីចូ​ល​រួ​ម​ដោះស្រាយ បញ្ហាសន្តិសុខ សុវត្ថិភាព សណ្តាប់ធ្នាប់សាធារណៈ និង​លុប​បំបាត់​ឱ្យ​បាន​ជា​អតិបរមា​នូវ​បទល្មើសគ្រប់ប្រភេទនៅក្នុងមូលដ្ឋាន។

ថ្លែងក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលស្រុកខ្សាច់​កណ្ដាល​នា​ព្រឹក​ម៉ិញ​នេះ នៅសាលាស្រុកខ្សាច់កណ្ដាល ខេត្តកណ្ដាល ឯកឧត្តម គួច ចំរើន អភិបាល​ខេត្ត​កណ្ដាលបា​ន​ឲ្យដឹងថា ចំណុចសំខាន់នៃឥរិយាបថ ទម្លាប់មិនល្អរបស់​មន្ត្រីរា​ជ​ការ​ដែល​ចាំ​បាច់​ត្រូវ​កែ​ប្រែទម្លាប់ ឥរិយាបថមិនល្អទាំងនោះចេញបន្ទាន់ ក្នុងទិសដៅរួមគ្នាកសាងអភិវឌ្ឍន៍ បម្រើ​ពលរដ្ឋ​ឲ្យ​បាន​ល្អ។ ត្រូវមានភាពស្មោះត្រង់ជាមួយមន្ត្រីក្រោមឱវាទ និងថ្នាក់លើ​ជា​ពិសេស​ជាមួយ​រាជ​រដ្ឋាភិបាល បន្ថែមពីនេះអភិបាលស្រុកថ្មីត្រូវស្វែងយល់អំពីច្បាប់នានា ត្រូវរៀន​សូត្រ​ពី​ការ​ងារ​ជា​​​ក់ស្ដែងរៀនសូត្រពីចាស់ទុំដើម្បីធ្វើឱ្យការងារទទួលបានជោគជ័យកាន់តែប្រសើឡើង។ និង​ដើម្បី​ធ្វើ​ឱ្យស្រុកល្វាឯម មានសណ្តាប់ធ្នាប់សង្គម រក្សាបាននូវសន្តិសុខល្អជូនប្រជាពលរដ្ឋ មាន​ការ​អភិវឌ្ឍរីកចម្រើនលើគ្រប់វិស័យជាបន្តបន្ទាប់ទៀត។

ឯកឧត្តមអភិបាលបានលើកទឹកចិត្ត និងជំរុញដល់ក្រុមប្រឹក្សាស្រុក អភិបាលរងស្រុក មន្ត្រីរាជការ កង​កម្លាំង​ប្រដាប់អាវុធ និងប្រជាពលរដ្ឋទាំងអស់ ក្នុងស្រុកខ្សាច់កណ្ដាល សូមផ្តល់ការគាំទ្រ និង​រួម​សហការជាមួយ អភិបាលរងស្រុកថ្មីឱ្យអស់ពីកម្លាំងកាយចិត្ត សំដៅធ្វើ​ឱ្យ​ស្រុក​ខ្សាច់​កណ្ដាល​អាច​សម្រេច​បាននូវសមិទ្ធផលធំៗជាច្រើនបន្ថែមទៀតជូនប្រជាពលរដ្ឋនៅក្នុងមូលដ្ឋានផងដែរ។ ឯកឧត្តមក៏បានជំរុញ និងលើកទឹកចិត្តដល់អភិបាលស្រុកថ្មី ត្រូវបន្តរឹតបន្តឹងបញ្ហាសន្តិសុខ សុវត្ថិភាព សណ្តាប់ធ្នាប់សាធារណៈ លុបបំបាត់ឱ្យបានជាអតិបរមានូវបទល្មើសគ្រប់ប្រភេទ ជា​ពិសេស​បញ្ហា​ល្បែងស៊ីសង បទល្មើសនេសាទ និងបញ្ហាគ្រឿងញៀន ក្មេងទំនើង បញ្ហាគ្រោះថ្នាក់ ចរាចរណ៍ និងបន្តការអនុវត្តឱ្យបានម៉ឺងម៉ាត់ នូវគោលនយោបាយភូមិឃុំមាន សុវត្ថិភាព​របស់​រាជ​រដ្ឋាភិបាល​។ ត្រូវបន្តពង្រឹងនូវរបបប្រជុំឱ្យបានទៀងទាត់ ជាពិសេសគឺកិច្ចប្រជុំគណៈអភិបាល និង​កិច្ច​ប្រជុំគណៈបញ្ជាការឯកភាព ដើម្បីធ្វើត្រួតពិនិត្យតាមដាន និងធ្វើកា​រ​ដោះ​ស្រាយ​បញ្ហា​ទាន់​ពេល​វេលា​។ បន្តពង្រឹងការគ្រប់គ្រង និងការអភិវឌ្ឍន៍សមត្ថភាពមន្ត្រី ដើម្បីឱ្យស្រប​ទៅ​តាម​ការ​វិវត្ត​នៃ​សភាពការណ៍ប្រទេសជាតិ និងទំហំការងារ ព្រមទាំង​ត្រៀម​ទទួល​ការ​ផ្ទេរ​មុខ​ងារ​ពី​ថ្នាក់​ជាតិ​។ ​ជាពិសេសគណៈអភិបាលស្រុកថ្មី ត្រូវរៀបចំសេចក្តីសម្រេចស្តីពីការ បែងចែកតួនាទីភារកិច្ច និង​របៀប​របបធ្វើការការងារជូនគណៈអភិបាលស្រុករបស់ខ្លួន ដើម្បីបំពេញភារកិច្ច បម្រើសេវា​សាធារណៈ​ និងដោះស្រាយបញ្ហាប្រឈមនានារបស់ប្រជាពលរដ្ឋនៅមូលដ្ឋាន ឱ្យប្រសិទ្ធ​ភាព​ខ្ពស់​៕​ អត្ថបទ៖ សៅ យ៉ាម៉ង់