ពលរដ្ឋកំពុងផុសផុល នាំយកថវិកាផ្ដល់ជូនមន្ទីរពេទ្យគន្ធបុប្ផា

ភ្នំពេញ៖ ប្រជាពលរដ្ឋ យុវជន វិស័យឯកជន រួមទាំងអ្នកបង្កើតមាតិកាក្នុងបណ្ដាញសង្គមកំពុងផុសផុល នាំយកថវិកាទៅផ្ដល់ជូនមន្ទីរពេទ្យកុមារ ក៏ដូចជាចូលរួមក្នុងយុទ្ធនាការ១ម៉ឺនរៀល ១ម៉ឺននាក់ ដែលថវិកាទាំងអស់នោះ បានរួមចំណែកសង្គ្រោះអាយុជីវិតកុមារកម្ពុជា ដែលបានទៅរកសេវាសុខាភិបាលនៅទីនោះ ។

ក្នុងពេលទទួលថវិកាពីសប្បុរសជន នៅថ្ងៃទី២ ខែមិថុនា ឆ្នាំ២០២៥ តំណាងមន្ទីរពេទ្យគន្ធបុប្ផា បានឲ្យដឹងថា ក្នុងមួយថ្ងៃៗ មន្ទីរពេទ្យទទួលកុមារមករកសេវាសុខាភិបាល មិនក្រោម ២ពាន់នាក់នោះទេ ខណៈដែលមន្ទីរពេទ្យក៏មានការខ្វះខាត ពិសេសកន្លែងសម្រាកព្យាបាល ។

តំណាងដដែលបានបន្តថា យ៉ាងណាក៏សូមអរគុណប្រជាពលរដ្ឋខ្មែរ នាពេលបច្ចុប្បន្ននេះ កំពុងសស្រាក់សស្រាំ បានចូលរួមថវិកាជាបន្តបន្ទាប់ និងហូរហែរ ហើយសម្រាប់ខែមិថុនានេះ ក៏មានយុទ្ធនាការ ១ម៉ឺនរៀល ១ម៉ឺននាក់ ដើម្បីស្វែងរកថវិកាជួយមន្ទីរពេទ្យគន្ធបុប្ផា គឺជាសកម្មភាពល្អប្រពៃ នៃការជួយគាំទ្រសុខុមាលភាពសង្គម ជាពិសេសជួយសង្គ្រោះកុមារកម្ពុជាឲ្យមានសុខភាពល្អ ។

លោក កែវ ស៊ាងលី ប្រធានមូលនិធិ វី អា វ័ន ធីម បានឲ្យដឹងថា សម្រាប់សកម្មកម្មភាពនៃការនាំយកវិកាមកផ្ដល់ជូនមន្ទីរពេទ្យគន្ធបុប្ផា ដើម្បីរួមចំណែក ក្នុងការលើកកម្ពស់សុខភាពរបស់កុមារកម្ពុជា ដែលជាទំពាំងស្នងឫស្សី ដោយធ្វើឲ្យយ៉ាងណាឲ្យពួកគេ មានសុខភាពល្អ បានចូលរៀនគ្រប់ៗគ្នា ។

លោកបានបន្ថែមថា ដោយមានការគាំទ្រពីក្រុមហ៊ុន វី វ៉ាយ ផ្លាស់ ឯ.ក មូលនិធិ វី អា វ័ន ធីម តែងតែធ្វើសកម្មភាពជួយដល់សង្គម មានដូចជាវិស័យសុខាភិបាល អប់រំ និងបរិស្ថាន ហើយសមាជិកក៏បានបរិច្ចាកឈាម ក្នុងមួយឆ្នាំចំនួន៣ដង ដល់មជ្ឈមណ្ឌលផ្ដល់ឈាមកម្ពុជាផងដែរ ។ ជាមួយនេះ តំណាងឲ្យមូលនិធិ វី អា វ័ន ធីម បានប្ដេជ្ញាបន្តចូលរួមក្នុងសកម្មភាពជួយសង្គម ជាបន្តទៀត ក៏ដូចជាការរួមចំណែក ដើម្បីកសាងនូវធនធានមនុស្ស និងគាំពារសុខភាពសង្គម តាមរយៈសកម្មភាពផ្សេងៗ ។

គួរបញ្ជាក់ថា ត្រឹមថ្ងៃទី១ ខែមិថុនា ឆ្នាំ២០២៥ មានប្រជាពលរដ្ឋខ្មែរប្រមាណជាង ២៤ម៉ឺននាក់ បាននាំគ្នាបរិច្ចាកថវិកា ក្នុងយុទ្ធនាការ ១ម៉ឺនរៀល ១ម៉ឺននាក់ ដើម្បីស្វែងរកថវិកាជួយមន្ទីរពេទ្យគន្ធបុប្ផា ខណៈមន្ទីរពេទ្យមួយនេះ ក្នុងមួយឆ្នាំៗបានជួយសង្គ្រោះអាយុជីវិតកុមារកម្ពុជា នៅទូទាំងប្រទេសរាប់ម៉ឺននាក់ ដោយឥតគិតថ្លៃ ៕