គណៈប្រតិភូអន្តរក្រសួងអភិវឌ្ឍន៍ជនបទ ចុះពិនិត្យវាយតម្លៃផ្លូវលំក្រាលគ្រួសក្រហមមួយខ្សែ ក្នុងស្រុកបន្ទាយអំពិល

ឧត្តរមានជ័យ៖ នៅថ្ងៃទី២ ខែមិថុនា ឆ្នាំ២០២៥នេះ ក្រុមការងារមន្ទីរ តំណាងឲ្យលោកប្រធានមន្ទីរ នៃមន្ទីរអភិវឌ្ឍន៍ជនបទខេត្តឧត្តរមានជ័យ អមដំណើរជាមួយគណៈប្រតិភូអន្តរក្រសួងរួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ដឹកនាំដោយឯកឧត្តម សាន វិសាល រដ្ឋលេខាធិការ និងជាសមាជិកគណៈកម្មាធិការលទ្ធកម្ម (គ.ល) ដើម្បីត្រួតពិនិត្យ និងវាយតម្លៃបញ្ចប់សុពលភាពលើលទ្ធផលការងារថែទាំខួបផ្លូវចំនួន ១ខ្សែ (ផ្លូវភូមិប្រសាទបី-កន្ទុយជូន-វល្លិ៍យាវ) ដោយក្រាលល្បាយក្រួស ប្រវែងសរុប ១២ ៨០០ម៉ែត្រ ទទឹង ៥,៥ម៉ែត្រ កម្រាស់ ០,១៥ម៉ែត្រ ស្ថិតក្នុងឃុំបេង ស្រុកបន្ទាយអំពិល ខេត្តឧត្តរមានជ័យ (គម្រោងលេខ DRR-PM-2024-No.021) ដែលទទួលការអនុវត្តដោយ មន្ទីរអភិវឌ្ឍន៍ជនបទខេត្តឧត្តរមានជ័យ។

បន្ទាប់ពីបានត្រួតពិនិត្យ និងប្រជុំពិភាក្សាជាមួយក្រុមការងារមន្ទីរអ្នកបច្ចេកទេស និង​គណៈកម្មការអន្តរក្រសួងរួចមក​ គណៈកម្មាធិការបានឯកភាព និងទទួលយកការអនុវត្តការងារ​បញ្ចប់​រយៈពេលធានាសុពលភាពនេះផងដែរ។

ក្នុងការចុះត្រួតពិនិត្យផ្លូវនាពេលនោះដែរ គណៈកម្មាធិការអន្តរក្រសួងបានណែនាំដល់ ក្រុមការ​ងារមន្ទីរ ​និងបងប្អូនប្រជាពលរដ្ឋ ឱ្យជួយថែទាំផ្លូវនេះឱ្យបានដិតដល់ ដើម្បីធានាថាផ្លូវនេះ​អាចប្រើប្រាស់បានយូរអង្វែង ដើម្បីបម្រើផលប្រយោជន៍ជូនប្រជាពលរដ្ឋ ក្នុងមូលដ្ឋាន​នេះ​បានជាប់រឹងមាំ​បានយូរអង្វែងផងដែរ៕ ដោយ ឃិន សារិទ្ធ