សម្តេចតេជោ ហ៊ុន សែន លើកទឹកចិត្តឱ្យមានការបង្កើតកម្មវិធីប្រឡងប្រណាំងមន្ត្រីកសិកម្មឃុំរវាងកសិករ

ភ្នំពេញ៖សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានសមាជរដ្ឋសភា និងព្រឹទ្ធសភា នៅថ្ងៃទី៣ ខែមិថុនា ឆ្នាំ២០២៥នេះ បានស្នើទៅរដ្ឋមន្រ្ដីក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឌិត ទីណា គួរតែបង្កើតកម្មវិធីប្រលងប្រណាំង មន្ត្រីកសិកម្មឃុំដែលមានការងារសកម្ម ជាគំរូល្អ ដើម្បីជាការលើកទឹកចិត្តដល់ប្រជាកសិករ។

សម្ដេតេជោ ហ៊ុន សែន មានប្រសាសន៍លើកឡើងបែបនេះ ក្នុងឱកាសសម្ដេច បន្ដដឹកនាំសមាជរដ្ឋសភា និងព្រឹទ្ធសភានៅថ្ងៃទី២ លើប្រធានបទ លើវិស័យកសិកម្មរបស់កម្ពុជា ដឹកនាំដោយរាជរដ្ឋាភិបាលអាណត្តិទី៧។

សម្តេចតេជោបានបញ្ជាក់ថា៖«រដ្ឋមន្ដ្រីកសិកម្ម គួរតែពិនិត្យមើល អំពីចលនាប្រឡងប្រណាំង ទាក់ទិនជាមួយនឹងក្រុមមន្ដ្រីកសិកម្ម ដែលយើងពង្រាយ…… គួរតែត្រូវមានលក្ខខណ្ឌវិនិច្ឆ័យ ហើយឲ្យមានការប្រឹងប្រែងប្រឡងប្រណាំង»។

ក្នុងឱកាសនោះ សម្តេចតេជោ បានបញ្ជាក់ាថ ការប្រលងប្រណាំងកសិកម្មឃុំនេះ គួរតែបង្កើតឱ្យមានពីរថ្នាក់ ដោយថ្នាក់ទី១ គឺក្នុងមួយខេត្ដ ប្រឡងយកម្នាក់ដែលឆ្នើម ហើយនៅក្នុងខេត្ដទាំងអស់ និងថ្នាក់ជាតិ គួរតែមានចំនួនជាក់លាក់ ក្នុងការជ្រើសរើស ដើម្បីឲ្យចលនាប្រឡងប្រណាំង រៀនសូត្រ ហើយធ្វើការសកម្មជាមួយនឹងកសិករ។

សូមជម្រាបថា ដើម្បីធានាតម្លៃកសិផលរបស់ប្រជាកសិករ រាជរដ្ឋាភិបាល តាមរយៈក្រសួងកសិកម្ម បានជ្រើសរើសមន្ត្រីបង្គោលផ្នែកកសិកម្មឬហៅថា មន្រ្ដីកសិកម្មឃុំ ដើម្បីពង្រាយតាមឃុំ ជួយកសិករដែលមានបញ្ហា ផ្នែកបច្ចេកទេស លើការដាំដុះ និងចិញ្ចឹមសត្វ៕