មន្រ្តីជំនាញអគ្គនាយកដ្ឋាន ក.ប.ប. ចុះត្រួតពិនិត្យម្ហូបអាហាររកសារធាតុគីមី

ភ្នំពេញ៖ មន្រ្តីជំនាញអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និង​បង្រ្កាប​ការ​ក្លែង​បន្លំ​ (ក.ប.ប.) នៃក្រសួងពាណិជ្ជកម្ម សហការជាមួយអាជ្ញាធរមូលដ្ឋាន និងគណៈកម្មធិការ ផ្សារដើមគរ និងផ្សារនាគមាស នៅព្រឹកថ្ងៃទី៥ ខែមិថុនា ឆ្នាំ២០២៥នេះ បានចុះត្រួតពិនិត្យ ចំណី​ម្ហូបអាហារ​នៅ​ក្នុងផ្សារ ជាពិសេស ផ្លែធុរេន ដើម្បីធានាការពារសុខុមាលភាពប្រជាពលរដ្ឋ។

ក្នុងប្រតិបត្តិការនោះ មន្រ្តីជំនាញ បានធ្វើការណែនាំឱ្យ អាជីវករលក់ដូរ ត្រូវត្រួត​ពិនិត្យ​ជា​ប្រចាំ​លើ​ផលិត​ផល​ទំនិញ​ដែលដាក់លក់ ឱ្យបានសមស្របតាម​បទ​ប្បញ្ញតិ​បច្ចេក​ទេស​ជា​ធរមាន​ដើម្បី​ធានា​ថា​មិនប៉ះពាល់សុខភាពអ្នកប្រើប្រាស់។

ជាមួយគ្នានេះ មន្រ្តីជំនាញបានផ្សព្វផ្សាយច្បាប់ និងបទប្បញ្ញតិ្ត​ពាក់​ព័ន្ធ​នឹង​សុវត្ថិភាព​ម្ហូប​អាហារ​ជូន​អាជីវករ​ដែលលក់ដូរក្នុងផ្សារ និងតាមផ្ទះអំពីសុវត្ថិភាពម្ហូបអាហារ ធ្វើយ៉ាងណា​ត្រូវ​លក់​តែ​ទំនិញ និងម្ហូបអាហារដែលមានគុណភាព ពុំមានសារធាតុគីមីហាមឃាត់ និង​មិន​ប៉ះ​ពាល់​សុខ​ភាព​អ្នក​ប្រើប្រាស់៕