ពលរដ្ឋខ្មែរផ្តើមដូប្រូហ្វាល់ហ្វេសបុក ប្រកាសគាំទ្ររាជរដ្ឋាភិបាលយកបញ្ហាព្រំដែនកម្ពុជា-ថៃ​ប្តឹង​ទៅ​តុលាការ ICJ

បងប្អូនប្រជាពលរដ្ឋខ្មែរ មន្រ្តីរាជការ កងកម្លាំងប្រដាប់អាវុធគ្រប់ប្រភេទ បាន​នាំ​គ្នាចា​ប់​ផ្តើម​ដូរ​ប្រូហ្វាល់​ ហ្វេសបុកជាបន្តបន្ទាប់របស់ខ្លួន ដោយប្រកាសគាំទ្ររាជរដ្ឋាភិបាលកម្ពុជា ដែលយក​បញ្ហា​ប្រាសាទ​តាមាន់ធំ ប្រាសាទតាមាន់តូច ប្រសាទតាក្របី និងតំបន់មុំ៣ ទៅ​កាន់​តុលាការ​យុត្តិធម៌​អន្តរជាតិ​ទីក្រុងឡាអេ ដែលហៅកាត់ថា ICJ។

ចលនាមហាជនខ្មែរ មកពីគ្រប់ទិសទី ដែលបាន​ដូរ​ប្រូហ្វាល់​ប្រកាស​គាំទ្រ​រាជ​រដ្ឋាភិបាល​យក​បញ្ហា​ព្រំដែន​កម្ពុជា និងថៃជា​ពិសេស​តំបន់​ទាំង​បួន​ខាង​លើ​នេះ​ប្តឹង​ទៅ​តុលាការ​ICJ នោះ​គឺ​បាន​ធ្វើ​ឡើង​ភ្លាម​ៗ បន្ទាប់ពីសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បាន​ចេញ​សារ​បញ្ជាក់​ថា ​រាជរដ្ឋាភិបាលកម្ពុជានឹងយកបញ្ហានៅមុំ៣ បញ្ហាប្រាសាទតាមាន់ធំ ប្រាសាទតាមាន់តូច និង​តាក្របី​ទៅ​កាន់​តុលាការយុត្តិធម៌អន្តរជាតិ (ICJ) នាពេលខាងមុខនេះ។

តាមរយៈប្រូហ្វាល់ របស់បងប្អូនប្រជាពលរដ្ឋខ្មែរ មន្រ្តីរាជការ និង​កង​កម្លាំង​ប្រដាប់​អាវុធ​គ្រប់​ប្រភេទ​ ដែលបានដូរហើយបង្ហោះតាមបណ្តាញហ្វេសបុក និងតេលេក្រាមជាបន្តបន្ទាប់ និង​ដាច់​ដោយ​ឡែក​ពី​គ្នានោះបានលើកឡើងថា«ខ្ញុំគាំទ្ររាជរដ្ឋាភិបាលកម្ពុជា ដែលយក​បញ្ហា​ប្រាសាទ​តា​មាន់​ធំ ប្រាសាទតា មាន់តូច ប្រាសាទតាក្របី និងតំបន់មុំ៣ ទៅកាន់​តុលាការ​យុត្តិធម៌​អន្តរជាតិ​ICJ​»​។

ក្រៅពីចលនាមហាជនដូរប្រូហ្វាល់ហ្វេសបុក គាំទ្រ​រាជ​រដ្ឋាភិបាល​ប្តឹង​ទៅ​តុលាការ​ឡាអេ​លើ​បញ្ហា​តំបន់​ខាង​លើនេះ​ស្ថាប័ននីតិបញ្ញាតិ និងនីតិប្រតិបត្តិក្នុងជួររាជរដ្ឋាភិបាលទាំងអស់ រួម​ទាំង​បណ្តា​គណបក្ស​នយោបាយនានា អង្គការ-សមាគមន៍នៅ​កម្ពុជា​ក៏​បាន​ប្រកាស​គាំទ្រ​យ៉ាង​ពេញទំ​ហឹង​ផង​ដែរ​ចំពោះចំ​ណាត់ការរបស់រាជរដ្ឋាភិបាលនេះ។ ដោយពួក​គេបាន​លើក​ឡើង​ស្រដៀង​ៗ​គ្នា​ថា​«កា​រ​ដោះស្រាយបញ្ហាព្រំដែនកម្ពុជា-ថៃ ដោយសន្តិវិធី និងតាមយន្តការការទូត និង​ច្បាប់​អន្តរជាតិ​របស់​រាជ​រដ្ឋាភិបាលកម្ពុជា គឺជាចំណាត់ការប្រកបដោយភាពចាស់ទុំខាងនយោបាយ ក្នុង​កិច្ច​ការពារ​ឯករាជ្យ អធិបតេយ្យភាព និងបូរណភាពទឹកដី នៃព្រះរាជាណាចក្រកម្ពុជា»។

ទាក់ទងនឹងបញ្ហាខាងលើនេះដែរ ក្នុងឱកាសដឹកនាំសមាជរដ្ឋសភា និង​ព្រឹទ្ធសភា​នៃ​ព្រះរាជា​ណា​ចក្រ​កម្ពុជា​កន្លងទៅថ្មីៗនេះសម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា និង​ជា​ប្រធាន​ព្រឹទ្ធសភា​កម្ពុជារួមទាំងអង្គសមាជទាំងមូលក៏បានប្រកាសគាំទ្រយ៉ាងពេញទំហឹង ចំពោះ​ចំណាត់​ការ​របស់​រាជរដ្ឋាភិបាលផងដែរ ដោយក្នុងអង្គសមាជនោះ សម្តេចតេជោ ហ៊ុន សែន បាន​សង្កត់​ធ្ងន់​ថា​យើង​នៅ​តែ​បន្តប្រកាន់ជំហរនៃការចចារដោយសន្តិវិធី ប៉ុន្តែការចចារលើកនេះ យើង​នឹង​បបួល​ភាគីថៃ យកចំណុចរសើបទាំងបួនកន្លែងដូចជាប្រាសាទតាក្របី តាមាន់តូច តាមាន់ធំ និង​តំបន់​មុំបី​ទៅកាន់តុលាការយុត្តិធម៌អន្តរជាតិក្រុងឡាអេ( ICJ)ដោយ​សម្តេច​បាន​លើក​ឡើង​ទៀត​ថា ​«តំបន់ទាំងបួនខាងលើនេះ បើមិនឆាប់កាត់ក្តី និង ដោះស្រាយឲ្យបានទាន់ពេលវេលាទេនោះ ​វា​ប្រៀបបា​នដូចជាតំបន់ហ្កាសា រវាងប៉ាឡេស្ទីន និងអ៊ីស្រាអែលយ៉ាងដូច្នេះដែរ នឹងមានការ​បាញ់​គ្នា​រហូត​»។

សូមបញ្ជាក់ថា នៅថ្ងៃទី៤ ខែមិថុនា ឆ្នាំ២០២៥នេះដែរ រាជរដ្ឋាភិបាលកម្ពុជា ក៏បាន​ចេញ​សេចក្តី​ថ្លែង​ការណ៍បញ្ជាក់ពីគោលជំហរមិនដកថយការបញ្ជូនបញ្ហាតំបន់មុំ៣ ប្រាសាទតាមាន់ធំ ប្រាសាទ​តាមាន់តូច និងប្រាសាទតាក្របី ទៅកាន់តុលាការយុត្តិធម៌អន្តរជាតិឡើយ ហើយ​សង្ឃឹម​ថា ភាគីថៃ នឹងសហការជាមួយ​កម្ពុជា​ក្នុង​ការ​នាំ​យក​សំណុំ​រឿង​នេះ​ទៅ​តុលាការ​អន្តរជាតិ​នេះ​ដែរ​។ ជាមួយគ្នានេះ រាជរដ្ឋាភិបាលកម្ពុជាបានគូសបញ្ជាក់ជាថ្មីម្តងទៀតផងដែរថា កង​ទ័ព​ថៃ​ជា​អ្នក​បើក​ការ​បាញ់ប្រហារបណ្តាលឲ្យ​កងទ័ពកម្ពុជាម្នាក់បានស្លាប់កាលពីព្រឹកថ្ងៃទី២៨ ខែឧសភា ឆ្នាំ​២០២៥​កន្លង​ទៅដូច្នេះ។ សេចក្តីថ្លែងការណ៍របស់ កម្ពុជានេះគឺបានឆ្លើយ​តបភ្លាម​ៗ​បន្ទាប់​ពី​ភាគី​ថៃ​ចង់​ធ្វើការចចារជាមួយភាគីកម្ពុជាដោយទ្វេភាគីលើបញ្ហា តំបន់ទាំងបួនខាងលើនេះ៕​ អត្ថបទ៖ បាន ចក់