ក្រសួង-ស្ថាប័ន ពិភាក្សាគ្នាលើការធ្វើសមាហរណកម្ម អគ្គាធិការដ្ឋាន/អធិការដ្ឋាន និងអង្គភាពសវនកម្មផ្ទៃក្នុង របស់ក្រសួង ស្ថាប័ន

អនុវត្តតាមយុទ្ធសាស្រ្តបញ្ចកោណដ៏មុតស្រួច របស់រាជរដ្ឋាភិបាលនីតិកាលទី៧ នៃរដ្ឋសភា លើការងារកំណែទម្រង់រដ្ឋបាលសាធារណៈ និងបន្ទាប់ពីបានដំណើរការ ការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង ស្ថាប័នរួចមក ក្រសួង ស្ថាប័ននានាបានជួបជុំពិភាក្សាគ្នាទៅលើការធ្វើសមាហរណកម្មលើមុខងារ អគ្គាធិការដ្ឋាន/អធិការដ្ឋាន និងអង្គភាពសវនកម្មផ្ទៃក្នុង នៅក្នុងរចនាសម្ព័ន្ធរបស់ក្រសួង ស្ថាប័ន។ ឈរលើស្មារតីជវភាពនៃប្រព័ន្ធតួអង្គតែមួយ និងអភិក្រម «រៀបចំផ្ទះឱ្យរៀបរយ» និង «ពង្រឹង ជាជាងពង្រីក» ក្រសួង ស្ថាប័ន បានពិភាក្សាគ្នាលើការច្របាច់បញ្ចូលគ្នាទៅជា អង្គភាពសវកម្មផ្ទៃក្នុង តែមួយ ឬបែងចែកមុខងារឱ្យបានដាច់ស្រេចរវាងការងារអធិការកិច្ច និងការងារសវនកម្មផ្ទៃក្នុង ផ្អែកលើតាមស្ថានភាព ប្រភេទវិស័យ និងវិសាលភាពនៃក្រសួង ស្ថាប័ននីមួយៗ។

កិច្ចប្រជុំនារសៀលថ្ងៃទី៤ ខែមិថុនា ឆ្នាំ២០២៥ ត្រូវបានដឹកនាំដោយ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជាប្រធានអនុគណៈកម្មាធិការប្រតិបត្តិនៃ គ.វ.រ. មានការអញ្ជើញចូលរួមពីតំណាងក្រសួង ស្ថាប័នចំនួន១៣។ គំនិតផ្តួចផ្តើមនេះ ទទួលបានគាំទ្រពីសំណាក់ក្រសួង ស្ថាប័ន ហើយទទួលបានការចូលរួមមតិយោបល់យ៉ាងច្រើនផុលផុស ព្រមទាំងបានចាត់ទុកថា ជានវានុវត្តន៍ក្នុងការកែលម្អ និងលើកកម្ពស់ប្រសិទ្ធភាពការងារផង ការរៀបចំមុខងារសមស្របតាមស្ថានភាពជាក់ស្តែងផង និងស្របតាមចក្ខុវិស័យរបស់ប្រមុខរាជរដ្ឋាភិបាល ក្នុងការកែទម្រង់រដ្ឋបាលសាធារណៈ ដើម្បីរៀបចំប្រព័ន្ធរដ្ឋបាលសាធារណៈ ប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ។ កិច្ចប្រជុំ សម្រេចបានជាជម្រើសមួយចំនួនសម្រាប់ការបន្តគិតគូរ។