កម្ពុជាចូលរួមសន្និសីទស្តីពីចីរភាពទីក្រុងហាំប៊ួគ ដើម្បីពន្លឿនគោលដៅអភិវឌ្ឍន៍ប្រកបដោយចីរភាព

ហាំប៊ួគ: មន្រ្តីជាន់ខ្ពស់ក្រុមប្រឹក្សាអភិវឌ្ឍន៍កម្ពុជា បានចូលរួមសន្និសីទស្តីពីចីរភាព ទីក្រុងហាំប៊ួគ (Hamburg) លើការស្វែងរកដំណោះ ស្រាយ សម្រាប់ពន្លឿនការអនុវត្តគោលដៅអភិវឌ្ឍន៍ប្រកបដោយចីរភាព ដោយផ្តោតសំខាន់លើនិម្មាបនកម្មហិរញ្ញប្បទានអន្តរជាតិ និង ការវិនិយោគសម្រាប់គោលដៅអភិវឌ្ឍន៍ប្រកបដោយចីរភាព។

ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី២ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី ២-៣ ខែមិថុនា ឆ្នាំ២០២៥ នេះ បានអញ្ជើញចូលរួមក្នុងសន្និសីទស្តីពីចីរភាព ទីក្រុងហាំប៊ួគ ២០២៥ (Hamburg Sustainability Conference 2025) សន្និសីទនេះមានគោលដៅចម្បង ដើម្បីបន្តកិច្ចសន្ទនាកម្រិតគោលនយោបាយ និងស្វែងរកដំណោះស្រាយជាក់ ស្តែង សម្រាប់ពន្លឿនការអនុវត្តគោលដៅអភិវឌ្ឍន៍ប្រកបដោយចីរភាព (SDGs) ដោយផ្តោតសំខាន់លើនិម្មាបនកម្មហិរញ្ញប្បទាន អន្តរជាតិ និងការវិនិយោគសម្រាប់គោលដៅអភិវឌ្ឍន៍ប្រកបដោយចីរភាព។

ក្នុងសន្និសីទនោះ ឯកឧត្តមទេសរដ្ឋមន្ត្រី ក៏បានចូលរួមក្នុងកិច្ចប្រជុំចង្អៀតកម្រិតខ្ពស់ ស្ដីពីប្រព័ន្ធសេដ្ឋកិច្ចដែលសមស្រប សម្រាប់ពិភពលោកពហុប៉ូល និងបានថ្លែងសុន្ទរកថាគន្លឹះ ក្នុងវេទិកាពិភាក្សា ស្ដីពីអនាគតនៃកិច្ចសហប្រតិបត្តិការអភិវឌ្ឍន៍ ក្នុងនោះ ឯកឧត្តមទេសរដ្ឋមន្ត្រី បានរំលេចពីអាទិភាពអភិវឌ្ឍន៍របស់រាជរដ្ឋាភិបាលកម្ពុជា និងសារៈសំខាន់នៃភាពជាដៃគូប្រកបដោយបរិយាបន្ន និងកិច្ចសហប្រតិបត្តិការជាសកល ក្នុងការសម្រេចបាននូវគោលដៅអភិវឌ្ឍន៍ប្រកបដោយចីរភាព។ ចំពោះការចូលរួមរបស់ឯកឧត្តម ទេសរដ្ឋមន្ត្រីក្នុងសន្និសីទនេះ បានបញ្ជាក់នូវការប្តេជ្ញារបស់កម្ពុជា ក្នុងការបន្តជំរុញការអនុវត្តគោលដៅអភិវឌ្ឍន៍ប្រកបដោយចីរភាព កម្ពុជា និងសកល ព្រមទាំងបន្តលើកកម្ពស់ភាពជាដៃគូ, គណនេយ្យភាពទ្វេទិស និងស័ក្តិសិទ្ធភាពនៃកិច្ចសហប្រតិបត្តិការអភិវឌ្ឍន៍។

ឆ្លៀតក្នុងឱកាសអញ្ជើញចូលរួមក្នុងសន្និសីទនេះដែរ, ឯកឧត្តម ឈៀង យ៉ាណារ៉ា បានទទួលជួបពិភាក្សាការងារ ជាមួយ លោកជំទាវ Bärbel Kofler រដ្ឋលេខាធិការនៃក្រសួងសហប្រតិបត្តិការសេដ្ឋកិច្ច និងអភិវឌ្ឍន៍ និងជាសមាជិកសភាអាល្លឺម៉ង់ ក្នុងគោល បំណងនៃជំនួបនេះ គឺដើម្បីពិភាក្សាអំពីវឌ្ឍនភាពនៃកិច្ចសហប្រតិបត្តិការអភិវឌ្ឍន៍រវាងកម្ពុជា និងសាធារណរដ្ឋសហព័ន្ធអាល្លឺម៉ង់ ក៏ដូចជាផ្លាស់យោបល់ និងបទពិសោធន៍ ដើម្បីបន្តពង្រឹងកិច្ចសហប្រតិបត្តិការ និងភាពជាដៃគូនាពេលអនាគត និងជាពិសេសការ ត្រៀមសម្រាប់កិច្ចចរចារ ស្តីពីកិច្ចសហប្រតិបត្តិការអភិវឌ្ឍន៍រវាងរដ្ឋាភិបាលប្រទេសទាំងពីរនាពេលខាងមុខ៕ អត្ថបទ៖ សុន រ៉ាឌី