ក្រុមប្រឹក្សាច្បាប់រំពឹងថា ច្បាប់អាកាសចរណ៍ស៊ីវិលនឹងទាក់ទាញធុរកិច្ច ពាណិជ្ជកម្ម និង​ការ​វិនិយោគ​បន្ថែម

ប្រធានក្រុមប្រឹក្សាអ្នកច្បាប់ ថ្លែងថា ការររៀបចំច្បាប់ស្តីពីអាកាសចរណ៍ស៊ីវិល ជា​ការ​បង្ហាញ​នូវ​ការ​ប្ដេជ្ញា​ចិត្តខ្ពស់របស់កម្ពុជា ឆ្លើយតប ទៅនឹងស្ដង់ដារបស់អង្គការអាកាសចរណ៍ស៊ីវិលអន្តរជាតិ និង​ច្បាប់អន្តរជាតិ និងជាចំណុចដ៏សំខាន់ក្នុងការទាក់ទាញការវិនិយោគ ធុរកិច្ច និង​ការ​ធ្វើ​ពាណិជ្ជ​កម្ម ដែលជាចន្ទល់ដ៏សំខាន់នៃសេដ្ឋកិច្ចជាតិ។

ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និង​ជា​ប្រធាន​ក្រុមប្រឹក្សាអ្នកច្បាប់ នៅក្នុងកិច្ចប្រជុំអន្ដរក្រសួង ដើម្បីពិនិត្យ និង​ពិភាក្សា​លើ​សេចក្តី​ព្រាង​ច្បាប់ ស្តីពីអាកាសចរណ៍ស៊ីវិលនៃព្រះរាជាណាចក្រកម្ពុជា នៅថ្ងៃទី៥ ខែមិថុនា ឆ្នាំ២០២៥ ម្សិល​មិញ​នេះ, ឯកឧត្តមបានវាយតម្លៃខ្ពស់ ចំពោះតំណាងគ្រប់ក្រសួង-ស្ថាប័នទាំងអស់ ក៏​ដូច​ជា​ថ្នាក់​ដឹក​នាំ និង មន្រ្តីជំនាញពាក់ព័ន្ធ នៃរដ្ឋលេខាធិការដ្ឋានអាកាសចរណ៍ស៊ីវិល ក្រុមប្រឹក្សា​អ្នក​ច្បាប់ និងក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ នៃទីស្តីការគណៈរដ្ឋមន្រ្តី ដែលបាន​រៀបចំ និង​ចូល​រួមកិច្ចប្រជុំពិនិត្យ និងពិភាក្សាលើសេចក្តីព្រាងច្បាប់លើកទី២ ដើម្បីធានាឱ្យបាននូវ សង្គតិភាព គុណភាព និងប្រសិទ្ធភាពនៃច្បាប់ ដើម្បីបង្កើនកិច្ចសហការល្អ និងការយល់គ្នា ពី​គ្រប់​ក្រសួង​-ស្ថាប័នរបស់រាជរដ្ឋាភិបាល ពិសេសចៀសវាងការជាន់សមត្ថកិច្ចគ្នា ដើម្បីបំពេញ​មុខងារ​ឱ្យ​បាន​ត្រឹមត្រូវ ដោយផ្អែកលើទិដ្ឋភាពច្បាប់ ដើម្បីជាប្រយោជន៍ទៅដល់ការ អនុវត្តច្បាប់នេះ ឱ្យ​មាន​ប្រសិទ្ធភាពខ្ពស់។

ឯកឧត្តមឧបនាយករដ្ឋមន្រ្តីប្រចាំការ បន្តថា សេចក្តី​ព្រាង​ច្បាប់​ស្តីពី​អាកាស​ចរណ៍​ស៊ីវិល​នៃ​ព្រះ​រា​ជា​ណា​ចក្រកម្ពុជានេះ គឺជា សេចក្តីព្រាងច្បាប់ដ៏មានសារៈសំខាន់មួយ ហើយមិន​ត្រឹម​តែ​មាន​សារៈ​សំខាន់​តែក្នុងជ្រុងនៃទិដ្ឋភាពសេដ្ឋកិច្ចប៉ុណ្ណោះទេ តែក៏បានបង្ហាញ នូវការប្ដេជ្ញា​ចិត្ត​ខ្ពស់​របស់​កម្ពុជា ក្នុងការឆ្លើយតបទៅនឹងស្ដង់ដារបស់អង្គការអាកាសចរណ៍ស៊ីវិលអន្តរជាតិ (ICAO) និ​ង​ការអនុលោមតាម បទប្បញ្ញត្តិសំខាន់ៗ នៃច្បាប់អន្តរជាតិផ្សេងទៀត ដែល​ជា​ចំណុច​ដ៏​សំខាន់​ និង​ចាំ​បាច់​មួយ ក្នុងការទាក់ទាញការវិនិយោគ ធុរកិច្ច និងការ ធ្វើពាណិជ្ជកម្ម ដែលជា​ចន្ទ​ល់​ដ៏​សំខាន់​មួយ​នៃការទ្រទ្រង់កំណើនសេដ្ឋកិច្ចកម្ពុជា។

សូមបញ្ជាក់ថា នៅក្នុងកិច្ចប្រជុំនេះ, អង្គប្រជុំបានបន្តធ្វើការពិនិត្យ និង​ពិភាក្សា​លើ​ខ្លឹមសារ​លើ​មា​ត្រា​នីមួយៗ ដើម្បីធានានូវអនុលោមភាព តាមច្បាប់ជាតិ និងច្បាប់អន្ដរជាតិ ទាក់ទិន​នឹង​សុវត្ថិភាព និងសន្ដិសុខ ក្នុងវិស័យអាកាសចរណ៍ស៊ីវិល ក៏ដូចជាការធានាដល់ការប្រកួត ប្រជែង ការរួម​ចំណែកការពារបរិស្ថាន និងផលប្រយោជន៍របស់អ្នកប្រើប្រាស់ និងអ្នកផ្ដល់​សេវា​កម្ម​ដឹក​ជញ្ជូន​តាម​ផ្លូវអាកាស ពិសេសការ ជំរុញអភិវឌ្ឍការដឹកជញ្ជូនតាមផ្លូវអាកាសនៅកម្ពុជា ប្រកប​ដោយ​ប្រសិទ្ធភាព និរន្តរភាព និងភាពធន់ ស្របតាមគោលនយោបាយជាតិ ស្តីពីការដឹក​ជញ្ជូន​តាម​ផ្លូវ​អាកាសឆ្នាំ២០២៥-២០៣៥ និងយុទ្ធសាស្ត្រ​បញ្ចកោណ​ដំណាក់​កាល​ទី​១​របស់​រាជ​រដ្ឋាភិបាល នីតិកាលទី៧ នៃរដ្ឋសភា៕ អត្ថបទ៖ សុន រ៉ាឌី