រយៈពេល៧ថ្ងៃយុទ្ធនាការ «១ម៉ឺនរៀល ១ម៉ឺននាក់» ជួយមន្ទីរពេទ្យគន្ធបុប្ផា ទទួលបានថវិកាជាង ៤,៣ លានដុល្លារពីសប្បុរសជន

ភ្នំពេញ៖ ពាក់ព័ន្ធនឹងយុទ្ធនាការ «១ម៉ឺនរៀល ១ម៉ឺននាក់» ដែលបានផ្តួចផ្តើម​គំនិត​ដោយ​លោក​ជំទាវ ពេជ ចន្ទមុន្នី ហ៊ុន ម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា គឺមកដល់ពេលនេះ ទទួល​បានថវិកាប្រមាណជាង៤លាន៣សែនដុល្លារហើយ ត្រឹមតែរយៈពេល​ប្រមាណ​១​សប្តាហ៍​ប៉ុណ្ណោះ ដែលចំនួននេះបានច្រើនជាងរយៈពេល១ខែក្នុងយុទ្ធនាការឆ្នាំមុនទៅទៀត។

ក្នុងយុទ្ធនាការធ្វើនៅផ្លូវថ្មើរជើង លោក ឃាន តួក ប្រធានផ្នែក​ទំនាក់​ទង​សាធារណៈ​នៃ​មូល​និធិ​មន្ទីរ​គន្ធបុប្ផាកម្ពុជា បានប្រាប់ថា ក្នុងរយៈពេលប្រមាណ១សប្តាហ៍ នៃយុទ្ធនាការ១ម៉ឺនរៀល ១​ម៉ឺន​នាក់ មានប្រជាពលរដ្ឋបានចូលរួមមានប្រមាណជាង២៤ម៉ឺន៥ពាន់នាក់ និងទទួល​បាន​ថវិកា​ប្រមាណ​៤​លាន៣សែនដុល្លារ ហើយចំនួននេះបើ​ប្រៀបធៀប​នឹង​ឆ្នាំ​មុន​ក្នុង​រយៈ​ពេលមួយ​ខែ​ពេញ មានបងប្អូនប្រជាពលរដ្ឋបានចូលរួម មានត្រឹម២៤ម៉ឺននាក់ប៉ុណ្ណោះ និងទទួល​បាន​ថវិកា​ត្រឹម​តែ​៣លាន៣សែនដុល្លារ ប៉ុន្តឺឆ្នាំនេះត្រឹមរយៈពេល១សប្តាហ៍ ទទួលបានចំនួនមនុស្ស និង​ចំនួន​ថវិកាច្រើនជាងឆ្នាំមុនទៅទៀត មានន័យថា បងប្អូន​ប្រជាពលរដ្ឋ​យល់​ច្បាស់​ពី​តម្លៃ​នៃ​មន្ទីរ​ពេទ្យ​គន្ធបុប្ផា។

ចំណែកលោកជំទាវ ប៉ែន សុបភា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធាន​ប្រតិបត្តិ នៃក្រុមប្រឹក្សាបរធនបាលរបស់មូលនិធិគន្ធបុប្ផាកម្ពុជាបានប្រាប់ដែរថា យុទ្ធនាការនេះ នៅ​តែ​ត្រូវការឱ្យបងប្អូនប្រជាពលរដ្ឋចូលរួម ដើម្បីបន្តជួយមន្ទីរពេទ្យគន្ធបុប្ផា ជាក់ស្តែង​នៅ​ក្នុង​ចុង​សប្តាហ៍​ទី១ខែមិថុនា ក្រុមការងារបានរៀបចំធ្វើយុទ្ធនាការនៅផ្លូវថ្មើរជើង ចុងសប្តាហ៍ទី​២​ធ្វើ​យុទ្ធនា​ការ​នៅខេត្តសៀមរាប ចុងសប្តាហ៍ទី៣ធ្វើតាមបណ្តាសហគមន៍ខ្មែរនៅបរទេស ហើយចុង​សប្តាហ៍​ទី៤។

ដោយឡែកសម្រាប់បងប្អូនប្រជាពលរដ្ឋបានប្រាប់ដែរថា ពួកគាត់ពេញចិត្ត ចំពោះយុទ្ធនាការ «១ម៉ឺនរៀល ១ម៉ឺននាក់» ព្រោះយុទ្ធនាការមួយនេះ នឹងជួយធ្វើឱ្យមន្ទីរពេទ្យគន្ធបុប្ផា កាន់​​តែ​មាន​លទ្ធភាពក្នុងការព្យាបាលជំងឺជូនកុមារ និងស្ត្រីមានផ្ទៃពោះ ដោយសារមន្ទីរពេទ្យទេវតាមួយនេះ បាន​ចំណាយថវិកាជាច្រើនក្នុងមួយឆ្នាំៗ ដើម្បីព្យាបាលជំងឺជូនកុមារ និងស្ត្រីមានផ្ទៃពោះ ពិសេស​ការ​ព្យាបាល​ទំាងអស់​មិន​យក​ថវិកា​ពី​អ្នក​ជំងឺ​ណា​ម្នាក់​ឡើយ​ហើយ​ពួក​គាត់​នឹង​ចូល​រួម​ជា​មួយ​នឹង​យុទ្ធនាការ​នេះ។

ចំពោះលោក​សាស្ត្រាចារ្យវេជ្ជបណ្ឌិត គី សាន់ទី នាយកមន្ទីរពេទ្យគន្ធបុប្ផារាជធានីភ្នំពេញ ក៏​បាន​ថ្លែង​អំណរគុណដល់សប្បុ រសជននានាដែលបានជួយដល់មន្ទីរពេទ្យគន្ធបុប្ផា ក្នុងនេះលោក​សាស្ត្រា​ចារ្យ​វេជ្ជបណ្ឌិតបានថ្លែងអំណរគុណដល់លោកជំទាវ ពេជ ចន្ទមុន្នី ហ៊ុន ម៉ាណែត ជា​ប្រធាន​កិត្តិយសនៃមូលនិធិគន្ធបុប្ផាកម្ពុជាដែលបានផ្តួចផ្តើមគំនិតជួយមន្ទីរពេទ្យគន្ធបុប្ផា ហើយ​សង្ឃឹម​ថា នឹងមានបងប្អូនប្រជាពលរដ្ឋ និងសប្បុរសជននានាចូលរួមបរិច្ចាគបន្តទៀត ដើម្បី​មន្ទីរ​ពេទ្យ​គន្ធបុប្ផា។

សូមបញ្ជាក់ថា មន្ទីរពេទ្យគន្ធបុប្ផាជារៀងរាល់ថ្ងៃ មានកុមារមក​ទទួល​សេវា​ព្យាបាល​មាន​ប្រមាណ​៣៥០០​នាក់ ហើយក្នុងចំណោមកុមារ៣៥០០នាក់ ដែលមកទទួលសេវាព្យាបាល ក៏មានកុមារ​ប្រមាណ​៥០០នាក់ ដែលមានអារៈធ្ងន់ធ្ងរ ត្រូវសម្រាកព្យាបាលនៅមន្ទីរពេទ្យ ដោយឡែកសម្រាប់​ស្ត្រី​មាន​ផ្ទៃ​ពោះវិញ មានប្រមាណ៥០០នាក់ ដែលមកពិនិត្យផ្ទៃពោះ និងសម្រាលកូន ដោយ​សរុប​ជា​រួម​មានប្រមាណ៤ពាន់នាក់ ហើយតែង​មាន​អ្នក​ជំងឺ​នៅ​គេង​ក្នុង​ពេទ្យ​រាល់​ថ្ងៃ​មាន​ប្រមាណ​​២ពាន់នា​ក់ និងបានចំណាយថវិកាក្នុងការព្យាបាលអស់ប្រមាណជាង១២ម៉ឺនដុល្លារក្នុងមួយថ្ងៃៗ ហើយ​បើគិតការចំណាយក្នុងរយៈពេលមួយឆ្នាំអស់ថវិកាប្រមាណជាង៤២លានដុល្លារ៕ អត្ថបទ៖ គង់ រ៉េន