លោកអ្នកឧកញ៉ាបណ្ឌិត ទ្រី ភាព និងលោកជំទាវ ចាត់តំណាង​ផ្ដល់​អំណោយ​ដល់​កង​ទ័ព​ឈរ​ជើង​នៅ​ព្រំដែនកម្ពុជា-ថៃ ស្ថិតក្នុងឃុំថ្មដា​ ស្រុកវាលវែង ខេត្តពោធិ៍សាត់

ពោធិ៍សាត់៖ នៅថ្ងៃទី០៩ ខែមិថុនា ឆ្នាំ២០២៥ នេះ លោកអ្នកឧកញ៉ា បណ្ឌិត ទ្រី ភាព អគ្គ​នាយក​ក្រុមហ៊ុន ទ្រី ភាព គ្រុប និងលោកជំទាវ អ្នកឧកញ៉ា គៀន ស្រីនាង បាន​ចាត់​តាំង​ក្រុម​ការងារ​ដែលដឹកនាំដោយ លោក ឃៀង សុជីវ័ន្ត អគ្គនាយករង នាយកគ្រប់​គ្រង​ទី​ស្នាក់​ការ​កណ្ដាល​ ជាតំណាងដ៏ខ្ពង់ខ្ពស់របស់លោកទាំងពីរ ឱ្យចុះទៅសួរសុខទុក្ខ និងនាំយក​អំណោយ​ទៅ​ជូន​កង​ទ័ព​ជួរមុខដែលឈរជើងនៅតាមបណ្ដោយព្រំដែនកម្ពុជា-ថៃ ស្ថិតក្នុងឃុំថ្មដា​ ស្រុក​វាល​វែង​ ខេត្តពោធិ៍សាត់ ដែលអំណោយទាំងនោះរួមមាន អង្ករ មី ត្រីខ ត្រីងៀត ឆៃប៉ូវផ្អែម សាប៊ូ​ដុស​ខ្លួន​ តង់ការពារភ្លៀង ថ្នាំពេទ្យ ថ្នាំមូស ក្រមា និងចង្រ្កានហ្គាស ព្រមទាំង​ថវិ​កា​មួយ​ចំនួន​ផ្សេង​ទៀត​ ដែលសរុបជាទឹកប្រាក់អស់ប្រមាណ​ ១៨៤​ ​លានរៀល។

ក្នុងដំណើរចុះសួរសុខទុក្ខនេះ ក៏មានការអញ្ជើញចូលរួមពីក្រុមប្រឹក្សាខេត្ដ និងអភិបាលរងខេត្ដ ព្រម​ទាំង​អាជ្ញាធរមូលដ្ឋាន ជាច្រើនរូបផងដែរ។

សូមបញ្ជាក់ជូនបន្ថែមថា កាលពីថ្ងៃទី៦ ខែមិថុនា កន្លងទៅនេះ លោកអ្នកឧកញ៉ា បណ្ឌិត ទ្រី ភាព និងលោកជំទាវ អ្នកឧកញ៉ា គៀន ស្រីនាង ក៏បានចូលរួមជាមួយរាជរដ្ឋាភិបាលនូវថវិកាចំនួន ២០០.​០០០ (ម្ភៃម៉ឺន) ដុល្លារអាមេរិក ដើម្បីឧបត្ថម្ភជូនកងទ័ពជួរមុខដែលឈរជើង នៅតាម​បណ្ដោយ​ព្រំដែន​កម្ពុជា-ថៃផងដែរ។