ក្រុមនិស្សិតចិន៣៣រូប ធ្វើការធ្លាស់ប្ដូរការសិក្សាមកកម្ពុជារយៈពេល ២សប្ដាហ៍

ក្រុមនិស្សិតមកពីខេត្ត គួយចូវ ប្រទេសចិន បានមកដល់កម្ពុជា ដើម្បីធ្វើការផ្លាស់ប្ដូរការសិក្សា រយៈពេល ២សប្ដាហ៍។ ការផ្លាស់ប្ដូរការសិក្សានេះ គឺជាលើកទី ២ នៃកម្មវិធីផ្លាស់ប្ដូរនិស្សិតចិន នៃខេត្តគួយចូវ ដែលធ្វើឡើងក្រោមប្រធានបទ «ផែនការនិស្សិតឆ្នើម ទៅសិក្សានៅបរទេសរាប់ពាន់នាក់»។

ជាផ្នែកមួយនៃការពង្រឹងទំនាក់ទំនង និងជំរុញការអប់រំរវាងប្រទេសកម្ពុជា និងប្រទេសចិន ការផ្លាស់ប្ដូរការសិក្សារបស់និស្សិតមកពីសាកលវិទ្យាល័យ Quiannan Normal University of Nationalities នៃខេត្ត គួយចូវ ប្រទេសចិន បានរៀបចំឡើងជាឡើងជាលើកទី ២។

ក្នុងពិធីបើកទទួលស្វាគមន៍និស្សិតចិនទាំង ៣៣រូបនេះ ឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងជាការជឿជាក់ថាការផ្លាស់ប្ដូរការសិក្សានេះ បានដើរតួនាទីយ៉ាងសំខាន់ក្នុងការបណ្ដុះបណ្ដាលធនធានមនុស្ស ពង្រឹងចំណងមិត្តភាព និងស្វែងយល់ពីវប្បធម៌គ្នាទៅវិញទៅមក ដើម្បីរួមចំណែកក្នុងការកសាងអនាគតរបស់ប្រទេសទាំងពីរ។

ក្នុងពិធីបើកទទួលស្វាគមន៍នេះដែរ លោក សរ រិទ្ធី ប្រធានសមាគមសហប្រតិបត្តិការដើម្បីជំរុញការអប់រំ កម្ពុជា-អាស៊ាន-ចិន លើកឡើងឱ្យដឹងដែរថា ក្រុមនិស្សិតចិននឹងមានសកម្មភាពជាច្រើនក្នុងរយៈពេល ១៤ថ្ងៃនេះ។ ពួកគេនឹងធ្វើទស្សនកិច្ចនៅតាមបណ្ដាសាកលវិទ្យាល័យនៅកម្ពុជា ទស្សនាតំបន់ទេសចរណ៍មួយចំនួន ក៏ដូចជាទៅទស្សនានៅខេត្តសៀមរាប ផងដែរ។

លោក ស្រេង វង្សហៀង ប្រធានកិត្តិយស សាលាស្ទេបហ្វរវើដ អន្តរជាតិ ដែលជាភាគីសំខាន់ក្នុងការសម្របសម្រួលរៀបចំឱ្យមានការផ្លាស់ប្ដូរការសិក្សារបស់និស្សិតចិន និងនិស្សិតកម្ពុជានេះ ក៏លើកឡើងដែរថាបច្ចុប្បន្ន គឺមាននិស្សិតកម្ពុជាជាច្រើនរួចមកហើយទទួលបានអាហារូបករណ៍ និងកំពុងសិក្សានៅប្រទេសចិន។ លោកនឹងភាគីពាក់ព័ន្ធនឹងបន្តកិច្ចការសំខាន់នេះ ដើម្បីជំរុញការផ្លាស់ប្ដូរការសិក្សានៃនិស្សិតប្រទេសទាំងពីរ ឱ្យកាន់តែច្រើន។

ការផ្លាស់ប្ដូរនិស្សិតនេះដែរ ក៏ស្របគ្នាទៅនឹងឆ្នាំ ២០២៥ ដែលជាខួបលើកទី ៦៧ នៃការបង្កើតទំនាក់ទំនងការទូតរវាងប្រទេសទាំងពីរ និងជាឆ្នាំទេសចរណ៍កម្ពុជា-ចិន។

បច្ចុប្បន្ន ប្រទេសកម្ពុជា និងប្រទេសចិន គឺជាដៃគូយុទ្ធសាស្ត្រគ្រប់ជ្រុងជ្រោយ នៃកិច្ចសហប្រតិបត្តិការ ដើម្បីវិបុលភាព សន្តិភាព និងការអភិវឌ្ឍលើគ្រប់វិស័យ ថែមទាំងជា «មិត្តភាពដែកថែប» ដែលមិនអាច បំបែកបាន និងតែងជួយគាំទ្រគ្នាទាំងក្នុងក្របខ័ណ្ឌជាតិ និងអន្តរជាតិ៕ អត្ថបទ៖ គឹមហុក