អ្នកនាំពាក្យក្រសួងការពារជាតិ ស្នើឲ្យសមត្ថកិច្ចចាត់វិធានការផ្លូវច្បាប់លើជនដែលក្លែងជាយោធា ហើយ​បង្ហោះព័ត៌មានមិនពិតតាមព្រំដែន

នាយឧត្តមសេនីយ៍ ឈុំ សុជាត អ្នកនាំពាក្យរបស់ក្រសួងការពារជាតិកម្ពុជា បាន​ស្នើ​ឲ្យ​ក្រសួង​មាន​សមត្ថកិច្ច​ចាត់វិធានការឲ្យបានម៉ឺងម៉ាត់បំផុត ចំពោះសកម្មជនក្រុមប្រឆាំង មានឈ្មោះថា អែម ពិសិដ្ឋ ដែលបានក្លែងបន្លំជាយោធា ហើយបានផ្សព្វផ្សាយព័ត៌មានមិនពិត ទាក់​ទង​នឹ​ង​ទាហាន​ជួរ​មុខដែលកំពុងការពារព្រំដែន។

តាមរយៈបណ្តាញសង្គមហ្វេសបុក និងឆាណែលតេលេក្រាម នារសៀលថ្ងៃទី១០ ខែមិថុនា ឆ្នាំ ២០២៥នេះ នាយឧត្តមសេនីយ៍ ឈុំ សុជាតិ បានលើកឡើងថានាថ្មីៗនេះ មានការក្លែង​ធ្វើ​ជា​ទាហាន​ជួរ​មុខដោយបុគ្គលឈ្មោះ អែម ពិសិដ្ឋ ភេទប្រុស អាយុ៣៧ឆ្នាំ ហើយបានផលិត​វីដេអូ​បង្ហោះ​តាម​គណនី TIKTOK ឈ្មោះ «AMY RICHARD310» និងហ្វេសប៊ុកឈ្មោះ «PISETH PG EM» ដើម្បីញុះញង់បំបាក់ទឹកចិត្តកងទ័ព ធ្វើឱ្យសាធារណជនជាច្រើនមានការយល់ច្រឡំ។ ជាក់​ស្តែង​ បុគ្គលឈ្មោះ អែម ពិសិដ្ឋ នេះ មិនមែនជាយោធិននោះទេ។ រូបគេគឺជា​សកម្ម​ជន​ក្រុម​ប្រឆាំង​ ដែលមានតួនាទីជាប្រធានបណ្តាញយុវជនកម្ពុជាប្រចាំប្រទេសថៃ ហើយមាន​ស្រុក​កំណើត​នៅ​ភូមិ​ចំការអណ្តូង ឃុំចំការអណ្តូង ស្រុកចំការលើខេត្តកំពង់ចាម។

អ្នកនាំពាក្យរបស់ក្រសួងការពារជាតិរូបនេះ បានលើកឡើងទៀតថា ការ​សម្តែង​គ្រង​ឯក​សណ្ឋាន​កង​ទ័ព​ក្លែង​ក្លាយ និងសកម្មភាពនានារបស់បុគ្គលនេះ ដែលធ្វើឱ្យប៉ះពាល់ដល់កងទ័ព គឺជា​ទង្វើ​ខុស​ច្បាប់​ដ៏​ធ្ងន់ធ្ងរបំផុត ដែលត្រូវតែមានវិធានការ មិនអាចលើកលែងបាន ជាពិសេសក្នុង​ពេល​ដែល​កង​ទ័ព​កម្ពុជាកំពុងប្រឈមមុខនឹងកងទ័ពថៃ នៅចំណុចព្រំដែនរវាងប្រទេសទាំងពីរ។ «ខ្ញុំ​សូម​ស្នើ​ឱ្យ​ក្រសួងមានសមត្ថកិច្ច ចាត់វិធានការផ្លូវច្បាប់លើជននេះ ឱ្យបានម៉ឺងម៉ាត់បំផុត»។

តាមរយៈបណ្តាញសង្គមនេះដែរ នាយឧត្តមសេនីយ៍ ឈុំ សុជាតិ ក៏សូម​អំពាវ​នាវ​ដល់​អ្នក​ប្រើ​ប្រាស់​បណ្តាញ​សង្គម និងប្រជាពលរដ្ឋទាំងអស់ កុំជឿលើការឃោសនាបោកបញ្ឆោត ដូច​ករណី​ខាង​លើ​នេះ និងសូមមានការប្រុងប្រយ័ត្ន កុំចែកចាយព័ត៌មាន​ទាំង​ឡាយ​ដែល​ប៉ះ​ពាល់​ដល់​កង​ទ័ព​ និងសូមតាមដានព័ត៌មានផ្លូវការដែលចេញពីរាជរដ្ឋាភិបាលកម្ពុជា និងក្រសួងការពារជាតិ ដែល​ជា​ប្រភពព័ត៌មានមានភាពត្រឹមត្រូវ ពិតប្រាកដ និងអាចជឿទុកចិត្តបានផងដែរ៕ អត្ថបទ៖ បាន ចក់