វិទ្យាស្ថានបច្ចេកទេសឧស្សាហកម្ម ត្រៀមដាក់បង្ហាញឧបករណ៍ទំនើបធ្វើដោយស្នាដៃសិស្ស-និស្សិតកូនខ្មែរ យ៉ាងហោច៥ប្រភេទ នៅក្នុងទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ លើកទី៨ ឆ្នាំ២០២៥

ភ្នំពេញ៖វិទ្យាស្ថានបច្ចេកទេសឧស្សាហកម្ម (ITI) ត្រៀមដាក់បង្ហាញឧបករណ៍ទំនើប ដែលផលិតដោយស្នាដៃសិស្ស-និស្សិតកូនខ្មែរ យ៉ាងហោចចំនួន ៥ប្រភេទ នៅក្នុងឱកាសទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ (TVET Day) លើកទី៨ ឆ្នាំ២០២៥ ក្រោមប្រធានបទ «ការអប់រំបណ្តុះបណ្តាលបច្ចេកទេសនិងវិជ្ជាជីវៈ បង្កើតឱកាសការងារ សាងក្តីសង្ឃឹមដល់យុវជន» ដែលនឹងធ្វើឡើងនៅមជ្ឈមណ្ឌលសន្និបាត និងពិព័រណ៍កោះពេជ្រ ថ្ងៃទី១៥-១៦ ខែមិថុនា ឆ្នាំ២០២៥នេះ។

លោក ជិន តារ៉ា នាយកវិទ្យាស្ថានបច្ចេកទេសឧស្សាហកម្ម បានឱ្យដឹងថា ឧបករណ៍ទំនើបទាំងនោះរួមមាន ម៉ាស៊ីនផលិតទឹកកក រថយន្តអគ្គិសនីសម្រាប់បូមសំរាម ប្រព័ន្ធស្មាតស៊ីធី ប្រព័ន្ធស្រោចស្រពស្វ័យប្រវត្តិ និងឧបករណ៍សម្ភារៈសម្រាប់ការបណ្តុះបណ្តាលលើជំនាញឯកទេសកម្ម ជាដើម។

និសិ្សត ម៉ោល ចាន់វិភាវីន រៀនបរិញ្ញាបត្របច្ចេកទេសជំនាញបរិក្ខារត្រជាក់ ឆ្នាំទី១ នៃវិទ្យាស្ថានបច្ចេកទេសឧស្សាហកម្ម (ITI) បានប្រាប់ថា គាត់ពិតជាចង់ឱ្យថ្ងៃបង្ហាញស្នាដៃរបស់គាត់ឆាប់មកដល់ ដើម្បីបង្ហាញដល់មហាជន ជាពិសេសសិស្សានុសិស្ស ដែលកំពុងសិក្សានៅថ្នាក់វិទ្យាល័យ ដើម្បីឱ្យពួកគាត់ បានស្វែងយល់បន្ថែមពីជំនាញបរិក្ខារត្រជាក់នេះ។

និស្សិត ភាវីន បាននិយាយថា៖ «សម្រាប់បងប្អូនដែលមានចំណាប់អារម្មណ៍ និងស្រលាញ់ជំនាញបច្ចេកទេស គួរតែចូលរួម ទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈនេះ ព្រោះមានស្នាដៃរបស់និស្សិតពីសាលាផ្សេងៗជាច្រើនទៀត ដែលនឹងយកមកដាក់តាំងបង្ហាញឱ្យទស្សនា ព្រមទាំងបានជួបសំណេះសំណាលផ្ទាល់ជាមួយលោកគ្រូអ្នកគ្រូជំនាញទៀតផង»។

និស្សិត រិន គីអេង រៀនបរិញ្ញាបត្របច្ចេកទេសជំនាញបរិក្ខារត្រជាក់ម្នាក់ទៀត បានលើកឡើងថា ការសិក្សាជំនាញនៅទីនេះបានអភិវឌ្ឍន៍សមត្ថភាពរបស់គាត់ជាច្រើន ព្រោះវិទ្យាស្ថានមានកម្មវិធីសិក្សាសម្បូរបែបដូចជា គោលការណ៍តម្រូវឱ្យនិស្សិតមានការចុះកម្មសិក្សា និងការសិក្សាបែបអនុវត្តច្រើនជាងទ្រឹស្តីជាដើម ដែលជួយឱ្យ រូបគាត់សម្រេចបានសមិទ្ធផលទាំងនេះ។

គីអេង បានប្រាប់ថា៖ «ខ្ញុំពេញចិត្តរាជរដ្ឋាភិបាលក្នុងការរៀបចំឱ្យមាន ទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ ណាស់ព្រោះនិស្សិតមកពីវិទ្យាស្ថានដទៃទៀត នឹងបានបង្ហាញសមត្ថភាព ស្នាដៃសម្រាប់បងប្អូនយើងទស្សនា»។

ទន្ទឹមគ្នានេះ លោក ពៅ ថានៈ ជាគ្រូបច្ចេកទេសជំនាញបរិក្ខារត្រជាក់ បានរំលេចថា លោកមានមោទនភាពនឹងសិស្សរបស់លោកជាខ្លាំង ដែលបានបន្សល់ទុកនូវសមិទ្ធផល និងស្នាដៃ ជាច្រើនរៀងរាល់ឆ្នាំ។

លោកបញ្ជាក់ថា៖ «ជារៀងរាល់ឆ្នាំវិទ្យាស្ថាន តែងតែយកស្នាដៃរបស់និស្សិតទៅដាក់បង្ហាញ។ ស្នាដៃទាំងនោះមានការវិវត្តកាន់តែប្រសើរឡើងពីមួយឆ្នាំទៅមួយឆ្នាំ ទៅតាមសម័យកាល នៃបច្ចេកវិទ្យា ដែលធានាថានិស្សិតគ្រប់រូបបានស្រូបយកចំណេះវិជ្ជាទាំងនេះទៅអភិវឌ្ឍខ្លួន និងប្រើប្រាស់ឱ្យសមស្របទៅនឹងទីផ្សារការងារបច្ចុប្បន្ន»៕