ឯកឧត្តម ហេង រតនា៖កសិករ១នាក់ស្លាប់លើដីស្រែចម្ការខ្លួនឯងដោយសារសំណល់យុទ្ធភណ្ឌពីសង្គ្រាម នៅស្រុកសាលាក្រៅ ខេត្តប៉ៃលិន

ប៉ៃលិន ៖ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ នៅល្ងាចថ្ងៃទី១០ ខែមិថុនានេះ បានឱ្យដឹងថា នៅថ្ងៃទី ១០ ខែមិថុនា ឆ្នាំ២០២៥នេះ មានករណីផ្ទុះមីនតោនស្ថិតនៅចំណុចចំការល្មើរ ក្នុងភូមិភូមិអូរដីស្អិត ឃុំស្ទឹងត្រង់ ស្រុកសាលាក្រៅ ខេត្តប៉ៃលិន បណ្តាលឱ្យអ្នកបើកបរត្រាក់ទ័រស្លាប់នៅកន្លែងកើតេហតុ និងខូចខាតត្រាក់ទ័រភ្ជួរដីប្រភេទគូបូតាមួយគ្រឿង។

ឯកឧត្តមថ្លែងថា៖«នេះជាករណី កសិករស្លាប់លើដីស្រែចម្ការខ្លួនឯងដោយសារសំណល់យុទ្ធភណ្ឌសង្គ្រាម»។

ឯកឧត្តម ហេង រតនា បានចូលរួមរំលែកទុក្ខជាមួយគ្រួសារសពនិងសូមវិញ្ញាណខន្តជនរងគ្រោះបានទៅកាន់ឋានសុគតិភពកុះបីឃ្លៀងឃ្លាតឡើយ។

ឯកឧត្តម ហេង រតនា បញ្ជាក់ថា នេះជាសំណល់យុទ្ធភណ្ឌសង្គ្រាម ដែលនៅតែបន្តគម្រាមកំហែងដល់សេចក្តីសុខសុវត្ថិភាពរបស់ប្រជាពលរដ្ឋ បើទោះបីជាសង្គ្រាមបានបញ្ចប់ជាង២៥ឆ្នាំហើយក៏ដោយ។

ឯកឧត្តមបន្តថា រាជរដ្ឋាភិបាលក្រោមការដឹកនាំរបស់សម្តចធិបតី ហ៊ុន ម៉ាណែត នាយករដ្ឋមន្រ្ដី បានបន្តខិតខំកិច្ចប្រតិបត្តិការបោសសម្អាតសំណល់គ្រាប់មីន និងគ្រាប់យុទ្ធភណ្ឌមិនទាន់ផ្ទុះយ៉ាងសកម្ម ដើម្បីរំដោះទឹកដីសុវណ្ណភូមិពីឃាតករលាក់មុខទាំងនេះ៕