សម្ដេច​ធិបតី៖ កម្ពុជា-បារាំង កំពុងឈានទៅការដំឡើងកម្រិតនៃទំនាក់ទំនងការទូត ទៅជាភាពជាដៃគូយុទ្ធសាស្ត្រ

នៅល្ងាចថ្ងៃទី១០ ខែមិថុនា ឆ្នាំ ២០២៥នេះ ម៉ោងនៅប្រទេសបារាំង សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានអញ្ជើញជួបជាមួយ ឯកឧត្តម Emmanuel MACRON ប្រធានាធិបតីបារាំង ក្នុងជំនួបទ្វេភាគី និងពិភាក្សាការងារ នៅទីក្រុងនីស ប្រទេសបារាំង។

តាមរយៈជំនួបនេះ សម្ដេចធិបតី នាយករដ្ឋមន្រ្ដីបានសរសេរនៅលើបណ្ដាញសង្គមផ្លូវការរបស់សម្ដេចថា បារាំងជាមិត្តល្អរបស់កម្ពុជា ហើយប្រទេសយើងទាំងពីរកំពុងធ្វើការជាមួយគ្នាដើម្បីឈានទៅការដំឡើង កម្រិតនៃទំនាក់ទំនងការទូតទៅជា ភាពជាដៃគូយុទ្ធសាស្ត្រ (Strategic Partnership) នៅពេលឆាប់ៗខាងមុខ។

ក្នុងឱកាសនោះ សម្ដេចធិបតី នាយករដ្ឋមន្រ្ដី បានអរគុណមិត្តបារាំងដែលបានគាំទ្រកម្ពុជាធ្វើជាម្ចាស់ផ្ទះ សម្រាប់កិច្ចប្រជុំកំពូល ហ្វ្រង់កូហ្វូនី លើកទី២០ នៅឆ្នាំ២០២៦។

សម្ដេចមានប្រសាសន៍ថា សម្ដេចនឹងរង់ចាំស្វាគមន៍វត្តមានរបស់ឯកឧត្តម ប្រធានាធិបតីបារាំង Emanuel Macron នៅកម្ពុជានៅពេលនោះផងដែរ។

សូមជម្រាបថា តបតាមការអញ្ជើញរបស់ ឯកឧត្តម Emmanuel Macron ប្រធានាធិបតីនៃសាធារណរដ្ឋ បារាំង និង ឯកឧត្តម António Guterres អគ្គលេខាធិការ អ.ស.ប. សម្តេចធិបតី ហ៊ុន ម៉ាណែត នាយករដ្ឋនិងលោកជំទាវបណ្ឌិត បានដឹកនាំគណៈប្រតិភូជាន់ខ្ពស់កម្ពុជា អញ្ជើញចូលរួម សន្និសីទ អ.ស.ប. ស្តីពីមហាសមុទ្រ លើកទី៣ (UNOC3) ដែលប្រព្រឹត្តទៅនៅទីក្រុងនីស ប្រទេសបារាំង ចាប់ពីថ្ងៃទី៩-១១ ខែមិថុនា ឆ្នាំ២០២៥។ ក្រោយបញ្ចប់កិច្ចប្រជុំនេះ សម្ដេចធិបតី និងលោកជំទាវបណ្ឌិត និងអញ្ជើញដឹកនាំគណៈប្រតិភូជាន់ខ្ពស់កម្ពុជានិវត្តន៍មកមាតុប្រទេសវិញ នៅថ្ងៃទី១១ ខែមិថុនានេះនឹងអញ្ជើញដល់ភ្នំពេញនៅព្រឹកថ្ងៃទី១២ មិថុនា ឆ្នាំ២០២៥នេះ៕