ជនសង្ស័យ០៣នាក់ជាមុខសញ្ញាចាស់ ធ្វើសកម្មភាពឆក់យ៉ាងសកម្មក្នុងរាជធានីភ្នំពេញ ត្រូវនគរបាលខណ្ឌ៧មករា ឃាត់ខ្លួន

ភ្នំពេញ៖ ជនសង្ស័យចំនួន០៣នាក់ជាមុខសញ្ញាចាស់ ធ្វើសកម្មភាពឆក់យ៉ាងសកម្មក្នុងភូមិសាស្រ្តរាជធានីភ្នំពេញ ដែលធ្វើឲ្យជនរងគ្រោះជាច្រើននាក់បានរងរបួស និងបាត់បង់ទ្រព្យសម្បិត្ត ដូច្នេះក្រោយបន្តធ្វើសកម្មភាពឆក់ ត្រូវនគរបាលខណ្ឌ៧មករា ឃាត់ខ្លួន។

ប្រតិបត្តិការនេះបានធ្វើឡើង វេលាម៉ោង ១៣និង៤៥នាទីរសៀលនៅថ្ងៃទី១០ ខែមិថុនា ឆ្នាំ២០២៥ ដោយមានបទបញ្ជាពីឯកឧត្តម ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដឹកនាំបញ្ជាផ្ទាល់ដោយលោកវរសេនីយ៍ទោ ជុន ប៊ុនណាន អធិការនគរបាលខណ្ឌ៧មករា ចុះស្រាវជ្រាវរហូតកំណត់មុខសញ្ញា ឈានដល់ការឃាត់ខ្លួនបានភ្លាមៗ។

ជនសង្ស័យ ០៣នាក់ មានឈ្មោះទី ១-ហោ វណ្ណ ហៅ ពេជ្រ ភេទប្រុស អាយុ ១៧ឆ្នាំ ។ទី២-សុខ ខេង ហៅ ហេង ភេទប្រុស អាយុ ១៨ឆ្នាំ ។និងទី៣-មាស សុវណ្ណរ័ត្ន ភេទប្រុស អាយុ ១៨ឆ្នាំ ។

ក្រោយឃាត់ខ្លួនក្រុមជនសង្ស័យបានសារភាពថា កាលពីរសៀលថ្ងៃទី១០ ខែមិថុនា ឆ្នាំ២០២៥ ក្រុមខ្លួនពិតជាបានធ្វើសកម្មភាពឆក់ ទូរស័ព្ទដៃប្រជាពលរដ្ឋនៅចំណុចមុខស្តាតអូឡាំពិក ស្ថិតក្នុងភូមិ៧ សង្កាត់វាលវង់ ខណ្ឌ៧មករា រាជធានីភ្នំពេញ ពិតប្រាកដមែន។

នគរបាលជំនាញនៃអធិការនគរបាលខណ្ឌ៧មករា បានបញ្ជាក់ថា ក្រុមជនសង្ស័យទាំង០៣នាក់នេះជាមុខសញ្ញាចាស់ធ្លាប់ជាប់ ធ្លាប់ជាប់ពន្ធនាគារ ចេញមកវិញ អំឡុងឆ្នាំ២០២២និង២០២៣ បានបន្តធ្វើសកម្មភាពឆក់យ៉ាងសកម្មភាពក្នុងរាជធានីភ្នំពេញ សរុបចំនួន០៨ករណី រួមមានក្នុងមូលដ្ឋាន ៖ ក្នុងមូដ្ឋាន៧មករា ០៣ ករណី, ដូនពេញ ០១ ករណី, ទួលគោក ០២ ករណី, ⁠ចំការមន ០១ ករណីនិងឬស្សីកែវ ០១ ករណី។

សូមបញ្ជាក់ថា ក្រោយធ្វើការបង្ក្រាបជនសង្ស័យទាំងនេះបាន ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ បានបន្តឧបត្ថម្ភថវិកា២លានរៀលលើកទឹកចិត្តដល់កម្លាំងជំនាញនៃអធិការដ្ឋាននគរបាលខណ្ឌ៧មករាដែលបានបង្រ្កាបបានដោយជោគជ័យ។

បច្ចុប្បន្ន ជនសង្ស័យត្រូវបាននគរបាល ឃាត់ខ្លួនបណ្ដោះអាសន្ននៅអធិការដ្ឋានខណ្ឌ៧មករា កសាងសំណុំរឿងដើម្បីបញ្ជូនទៅកាន់សាលាដំបូងរាជធានីភ្នំពេញ អនុវត្តតាមនិតិវិធី៕ អត្ថបទ៖ កុម្ភៈ