ឯកឧត្តម ប៉ែន បូណា៖ ក្នុងស្ថានភាពការប្រឈមមុខរវាងកម្ពុជា-ថៃ ព័ត៌មានក្លែងក្លាយ គឺគ្រោះថ្នាក់ណាស់

ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធាន​អង្គភាព​អ្នក​នាំពាក្យ​រាជ​រដ្ឋាភិបាល តាមរយៈកិច្ចសម្ភាសន៍ជាមួយ BTV បានបញ្ជាក់ថា ក្នុងកាលៈទេសៈ កម្ពុជាកំពុង​មាន​កម្ដៅ​ប្រឈម​ជាមួយថៃបែបនេះ ព័ត៌មានក្លែងក្លាយ គឺគ្រោះថ្នាក់ណាស់ វាអាចរុញ​ឱ្យ​ឆាប​ឆេះ​ហើយ​ក៏​អាចជួយពន្លត់ស្ថានការណ៍បានដែរ ដូច្នេះអ្នកសារព័ត៌មានទាំងនៅកម្ពុជា និង​ជុំវិញ​ពិភព​លោក​តែង​តែប្រកាន់គំនិតសន្ដិភាពនិយមនៅក្នុងកាលៈទេសៈបែបនេះ គេមិនយកសាំង​ទៅ​ចាក់​ថែម​នោះ​ទេ។

ឯកឧត្តម ប៉ែន បូណា បញ្ជាក់បន្ថែមថា ក្នុងស្ថានភាពកំពុងឡើងកម្ដៅប្រឈមមុខដាក់គ្នា រវាង​កម្ពុជា​-ថៃបែបនេះ គ្រប់ប្រព័ន្ធផ្សព្វផ្សាយ និងអ្នកប្រើប្រាស់បណ្ដាញសង្គម គួរធ្វើការផ្សព្វផ្សាយ និង​ចែករំលែក ព័ត៌មាន ដោយមានការប្រុងប្រយ័ត្នខ្ពស់ ពាក់ព័ន្ធនឹងបញ្ហាវិវាទនៅព្រំដែន កម្ពុជា-ថៃ ខណៈក្រុមជ្រុលនិយមទាំងនៅកម្ពុជា នៅថៃ និងនៅក្រៅប្រទេសមួយចំនួនទៀត កំពុង​យក​ឱកាស​នេះ​កេងចំណេញនយោបាយរបស់ពួកគេ ដោយមិនខ្វល់ពីផលប៉ះពាល់ដល់ប្រជាជន និង​ប្រទេស​ជាតិ​ឡើយ។

ឯកឧត្តមអំពាវនាវដល់ប្រជាពលរដ្ឋ សូមស្ងប់ចិត្ត កុំអន្ទះសារ និងរង់ចាំចំណាត់​ការ​ជា​បន្ត​បន្ទាប់​របស់​រាជ​រដ្ឋាភិបាល ដោយត្រូវប្រកាន់ខ្ជាប់នូវឥរិយាបថនឹងនរ អត់ធ្មត់ ហើយប្រើបញ្ញា​ជា​ជាង​ប្រើ​អារម្មណ៍ ជាពិសេសកុំនាំគ្នាកញ្ជ្រោលតាមការញុះញង់របស់ក្រុមជ្រុលនិយមជិតខាង ដែលចង់​បាន​ទឹក​ដី​យើងឱ្យសោះ។ សូមបងប្អូនពិចារណាសារសម្តេចធិបតី លើកយក​ទស្សនៈ​របស់​កំពូល​អ្នក​ប្រាជ្ញ​ចិន ឡៅ ជឺ មកសរសេរក្នុងហ្វេសប៊ុកថា «រក្សាភាពស្ងៀមស្ងាត់ ផ្តោតជានិច្ច​លើ​គោល​ដៅ​ធំ ​ពេលមានឱកាសកុំរារែកក្នុងការវាយលុក»។

សូមបញ្ជាក់ថា សម្តេចធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់កាលពីថ្ងៃទី២ ខែមិថុនា និង​ដោយមានការគាំទ្រយ៉ាងពេញទំហឹងពីសម្តេចតេជោ ហ៊ុន សែន ប្រធានព្រឹទ្ធសភា និង​អង្គ​សមាជ រដ្ឋសភា និងព្រឹទ្ធសភា ឥឡូវនេះសម្ដេច​ធិបតី​បាន​សម្រេច​បង្កើត​គណៈ​កម្មការ​រៀប​ចំ​ឯកសារ​ដើម្បី​ប្តឹងទៅតុលាការយុត្តិធម៌អន្តរជាតិ (ICJ) ករណីតំបន់មុំបី ប្រាសាទតាមាន់ធំ ប្រាសាទ​តាមាន់តូច និងប្រាសាទតាក្របី ដែលនេះជាការប្តេជ្ញាចិត្តមិនមែនត្រឹមតែពាក្យសម្តី ប៉ុន្តែគឺជាសកម្មភាពជាក់ស្តែង៕ អត្ថបទ៖ វ៉ន ដារ៉ា