ការបណ្តុះបណ្តាលមូលធនមនុស្សល្អពេញលេញ គ្រប់សាលារៀនត្រូវអនុវត្តគោលដៅ​សំខាន់ៗ​មួយ​ចំនួន​ សម្រាប់ចក្ខុវិស័យក្នុងវិស័យអប់រំ

កំពង់ឆ្នាំង៖ ឯកឧត្តម ពេជ សោភ័ន ទេសរដ្ឋមន្ត្រី ទទួលបន្ទុកបេសកកម្មពិសេស និង​ជា​ប្រធាន​លេខា​ធិការ​ដ្ឋាន គណៈកម្មាធិការជាតិជម្រុញការអនុវត្តវិធានការគន្លឹះក្នុងវិស័យអប់រំ មាន​ប្រសាសន៍​ថា ការបណ្តុះបណ្តាលបាននូវមូលធនមនុស្សល្អពេញលេញតាមសាលារៀនត្រូវអនុវត្ត គឺ​បណ្ដុះ​ទឹកចិត្ត ឆន្ទៈ សុជីវធម៌ សីលធម៌ គុណធម៌ ថែទាំ និងលើកកម្ពស់​សុខភាព​ល្អទាំង​ផ្លូវ​កាយ​ផ្លូវ​ចិត្ត អនាម័យ សិល្បៈ កីឡា និងសមាធិ កសាងមូលដ្ឋានសុភមង្គល សុខដុមនីយកម្ម ការ​ងារ​មនុស្សធម៌ ការចែករំលែក និងជួយយកអាសារគ្នា។ ឯកឧត្តមបានមានប្រសាសន៍បែបនេះ ក្នុង​ពិធី​ប្រជុំ​ឆ្លុះបញ្ចាំង និងចែករំលែកបទពិសោធន៍នៃឧត្តមានុវត្តន៍ ដល់គណៈគ្រប់គ្រង និង​គ្រូ​បង្រៀន​នៅ​តាមសាលារៀនគោលដៅនាព្រឹកថ្ងៃទី១១ ខែមិថុនា ឆ្នាំ២០២៥ នៅ​សាលា​ខេត្ត​កំពង់ឆ្នាំង​។

ឯកឧត្តម ពេជ សោភ័ន ទេសរដ្ឋមន្ត្រីបានបញ្ជាក់ថា វិធីសាស្ត្រនៃការជ្រើសរើស និង​ប្រើ​ប្រាស់​មូល​ធន​មនុស្សជាអតីតនាយក នាយិកា និងគ្រូបង្រៀនឆ្នើមដែលបានចូលនិវត្តន៍ហើយ ឱ្យ​មក​ជួយ​បំពេញកិច្ចការជាគ្រូបង្គោលនេះ គឺជាគំនិតផ្តួចផ្តើមដ៏ឈ្លាសវៃបំផុត របស់សម្តេចធិបតី ហ៊ុន ម៉ាណែត ដែលតែងតែផ្តល់តម្លៃ កោតសរសើរស្នាដៃ និងអនុញ្ញាតឱ្យនិវត្តន៍ជន ដែល​មាន​ឆន្ទៈ​ការងារ​ខ្ពស់ អាចបន្តចូលរួមបម្រើប្រទេសជាតិ បានកាន់តែយូរថែមទៀត។ គោល​បំណង​នៃ​កិច្ច​ប្រជុំ​នេះ គឺទី១-ផ្សព្វផ្សាយបញ្ជ្រាបការយល់ដឹង អំពីវិធានការគន្លឹះ ចក្ខុវិស័យ នៃការកែទម្រង់ វិស័យ​អប់រំរបស់រាជរដ្ឋាភិបាល នៃសាលារៀនគោលដៅ ក្នុងខេត្តទាំង២។ ទី២-ពង្រឹង​កិច្ច​សហការ កៀរគរចូលរួមពីគ្រប់ភាគីពាក់ព័ន្ធ បង្កើតឱកាសជួបជុំគ្នាជាផ្លូវការរវាងភាគីគ្រូបង្គោល ជំរុញ​លើក​ទឹកចិត្ត ដល់ការអនុវត្តវិធានការគន្លឹះដោយទំនុកចិត្ត។ ទី៣-ពង្រឹង និង​បំពាក់​នូវ​គោល​ជំហរ​រឹងមាំដល់ក្រុមគ្រូបង្គោល នាយក និងគ្រូបង្រៀន ព្រមទាំងបង្ហាញការគាំទ្រពេញទំហឹង និង​គ្រប់​ដំណាក់កាល។ ទី៤-ការបណ្តុះឆន្ទៈគណៈគ្រប់គ្រងសាលា គ្រូបង្រៀន និង​សហគមន៍​នៃ​សាលា​គោលដៅ ដែលបានចូលរួមក្នុងកម្មវិធីចាប់ផ្តើមយុទ្ធនាការនេះ មានក្តីសប្បាយរីករាយ និង​គាំ​ទ្រ​ពេញទំហឹងចំពោះវិធានការគន្លឹះ ក្នុងវិស័យអប់រំរបស់រាជរដ្ឋាភិបាល ដែល​បាន​អនុវត្ត​នៅ​តាម​សាលា​រៀន​ក្នុងខេត្តទាំងអស់ នៃខេត្តពោធិ៍សាត់ និងខេត្តកំពង់ឆ្នាំង។ ទី៥-ការ​គាំទ្រ​​សាលា​រៀន​គោល​ដៅ មានន័យថាការនាំយកវិធានការគន្លឹះក្នុងវិស័យអប់រំ ទៅអនុវត្ត​នៅ​តាម​សាលា​គោល​ដៅ ដែលបានជ្រើសរើសរួច ដោយមានគ្រូបង្គោលជាអ្នកជួយផ្តល់យោបល់ គាំទ្រ​ផ្នែក​បច្ចេក​ទេស វិធីសាស្ត្រ និងការសហការ ជំរុញវិធានការគន្លឹះ ឱ្យអនុវត្តបានដោយរលូន។

ឯកឧត្តមបានសំណូមពរឱ្យសាលារៀនគោលដៅផ្តោតការយកចិត្តទុកដាក់ខ្ពស់ អំពី​ការ​បណ្ដុះ​ទឹក​ចិត្ត​ ឆន្ទៈ សុជីវធម៌ សីលធម៌ និងគុណធម៌ ថែទាំ និងលើកកម្ពស់សុខភាពល្អ ទាំងផ្លូវកាយ ផ្លូវចិត្ត អនាម័យ សិល្បៈ កីឡា និងសមាធិ កសាងមូលដ្ឋានសុភមង្គល សុខដុមនីយកម្ម ការងារ​មនុស្ស​ធម៌ ការចែករំលែក និងជួយយកអាសារគ្នា៕ កាំង ហុងវាស្នា