ឯកឧត្តម ហេង សួរ អញ្ជើញប្រកាសមុខតំណែងប្រធានមន្ទីរការងារ និងបណ្តុះបណ្តាលវិជ្ជាជីវៈ ខេត្តឧត្តរមានជ័យ

ឧត្តរមានជ័យ៖ នៅរសៀលថ្ងៃទី១០ ខែមិថុនា ឆ្នាំ២០២៥ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំពិធីប្រកាសជាផ្លូវការចូលកាន់មុខតំណែងជាប្រធានមន្ទីរការងារ និងបណ្តុះបណ្តាលវិជ្ជាជីវៈដោយលោក ម៉ូត សុខមេសា ជាប្រធានមន្ទីការងារ និងបណ្តុះបណ្តាលវិជ្ជាជីវៈខេត្តឧត្តរមានជ័យ ជំនួសលោក ស៊ុន ហ៊ាយ ដែលបានចូលនិវត្តន៍ទៅអង្គភាពទីប្រឹក្សាក្រសួង។

ពិធីនេះបានធ្វើឡើងក្រោមអធិបតីភាពឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដែលមានការអញ្ជើញចូលរួមពីឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ, ឯកឧត្តម ស៊ី ប្រសិទ្ធ ប្រធានក្រុមប្រឹក្សាខេត្ត និងមន្ត្រីជាន់ខ្ពស់ជាច្រើនពីមន្ទីររដ្ឋបាលក្នុងខេត្ត។

លោក ម៉ូត សុខមេសា បានថ្លែងប្តេជ្ញាចិត្តថា នឹងអនុវត្តការងារជាដំណើរការដោយស្មោះត្រង់ ស្របតាមគោលនយោបាយ និងយុទ្ធសាស្ត្ររបស់ក្រសួងក៏ដូចជាស្ថាប័ន​រាជរដ្ឋាភិបាលថ្នាក់​ក្រោមជាតិ ​ដើម្បីជួយឲ្យវិស័យការងារ និងបណ្តុះបណ្តាលវិជ្ជាជីវៈក្នុងខេត្តមានភាពរីកចម្រើន និងមានប្រសិទ្ធភាព។

ឯកឧត្តម មាន ចាន់យ៉ាដាអភិបាលខេត្តឧត្តរមានជ័យ បានសម្តែងការអបអរសាទរ និងផ្តល់​អនុសាសន៍​ដល់ប្រធានមន្ទីរថ្មីថា ជាការទទួលខុសត្រូវដ៏សំខាន់មួយក្នុងការជំរុញ​វិស័យ​ការងារផ្ទៃក្នុងខេត្ត។ឯកឧត្តម បានបញ្ជាក់ថា ការ​តែងតាំង​នេះជាសក្ដានុពល​នៃការទុកចិត្ត​ពី​សំណាក់ឯកឧត្តមរដ្ឋមន្ត្រី ចំពោះសមត្ថភាព និងសុចរិតភាពក្នុងការដឹកនាំ។

ក្នុងឱកាសនោះ ​ឯកឧត្តម ហេង សួរ រដ្ឋមន្ត្រីក្រសួងការងារ បានធ្វើសំណេះសំណាលផ្ទាល់ និង​ផ្តល់អនុសាសន៍ ដល់ប្រធានមន្ទីរការងារ និងបណ្តុះបណ្តាលវិជ្ជាជីវៈថ្មី​ត្រូវបន្តខិតខំប្រឹង​ប្រែង​ធ្វើការងារដោយមានភាពសាមគ្គី​ក្នុងមន្ទីរ និងធ្វើឲ្យកិច្ចការទាំងមូលរីកចម្រើន​សមស្របតាម​បំណងនយោបាយរដ្ឋាភិបាល។

យ៉ាងម៉ិញ​ឯកឧត្ដមរដ្ឋមន្ត្រី ក៏បានផ្ដាំផ្ញើដល់ប្រធានមន្ទីរការងារ និង បណ្តុះបណ្តាលវិជ្ជាជីវៈ ខេត្តឧត្ដរមានជ័យថ្មី ត្រូវរក្សានិងបង្កើនសាមគ្គីភាពឯកភាពផ្ទៃក្នុង ជាមួយថ្នាក់ដឹកនាំគ្រប់លំដាប់​ថ្នាក់ ក្នុងជួរក្រសួងសមី ជួររដ្ឋបាលខេត្ត ក៏ដូចជាបង្កើនទំនាក់ទំនងល្អ​ជាមួយបណ្តាអង្គភាព សមាគម និងអង្គការនានា ​ដើម្បីរួមចំណែកសម្រេចបានជោគជ័យគ្រប់ផែនការការងារ និង​បង្កើតជំនឿចិត្តពីសំណាក់ប្រជាពលរដ្ឋផងដែរ ៕ ឃិនសារិទ្ធ