សម្តេចកិត្តិព្រឹទ្ធបណ្ឌិត ចាត់មន្ត្រីចុះពិនិត្យ​ស្ថានភាព​ជីវភាព​រស់នៅ​លោកយាយ​ម្នាក់​ជួប​ការ​លំបាក​នៅ​បាត់ដំបង

បន្ទាប់ពីបានឃើញព័ត៌មានក្នុងបណ្តាញសង្គម មានគ្រួសារមួយក្នុងស្រុកថ្មគោល មាន​ជីវភាព​ខ្វះ​ខាត​ខ្លាំង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា កាល​ពី​ថ្ងៃ​ទី​១១ ​ខែមិថុនា ២០២៥ បានចាត់មន្ត្រីទីស្នាក់ការកណ្តាល សហការជាមួយ សាខាកាក​បាទ​ក្រហម​កម្ពុជា ខេត្តបាត់ដំបង អនុសាខាស្រុកថ្មគោល និងអាជ្ញាធម៌មូលដ្ឋានចុះពិនិត្យជាក់ស្តែង អំពី​ស្ថានភាពគ្រួសារលោកយាយ ឯក យិន អាយុ៦៥ឆ្នាំ រស់ភូមិកណ្តាលជើង ឃុំគោកឃ្មុំ ស្រុក​ថ្ម​គោល ខេត្តបាត់ដំបង។

លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា និងសហការី ព្រមទាំង​មាន​ចូល​រួម​ពី​ឯកឧត្តម​ ផេង សិទ្ធី សមាជិកគណៈកម្មាធិការ សាខាខេត្តបាត់ដំបង អនុសាខាស្រុកថ្មគោល បាន​ចុះ​សួរ​សុខទុក្ខ និងនាំយកអំណោយជូន លោកយាយ ឯក យិន ហើយខណៈនោះដែរ បាន​ផ្តល់​អំណោយ​ជូនលោកយាយ អឿន យាន អ្នកជិតខាង ដែលមានជីវភាពខ្វះខាតផងដែរ។ លោក​ជំទាវ​បាន​បន្ត​ថា “ការចុះមកដល់ខ្នងផ្ទះនាពេលនេះ គឺអនុវត្តតាមអនុសាសន៍ដ៏ខ្ពង់ខ្ពស់ថ្មីបន្ថែម របស់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដោយ​ណែនាំ​ដល់​មន្ត្រី​ក្រោម​ឱវាទធ្វើយ៉ាងណា នាំយកអំណោយទៅចែកជូនដោយផ្ទាល់ដៃ និងដល់ខ្នងផ្ទះតែម្តង ហើយ​ការ​យកអំណោយមកដល់ខ្នងផ្ទះនេះ គឺជាការលើកទឹកចិត្ត និងបញ្ជាក់ថា ពួកគាត់​មិន​នៅ​ឯកោ​ និងមិនទទួលបានការយកចិត្តទុកដាក់ ដែលបណ្តាលឱ្យដាច់ស្បៀងនោះទេ ជាងនេះ​ទៅទៀ​ត ការចុះមកដល់ខ្នងផ្ទះនេះ ក៏ដើម្បីបានដឹងពីស្ថានភាព ជីវភាព និងការរស់នៅ​កាន់​តែ​ច្បាស់​បន្ថែម​ទៀត។ ជាពិសេស ក្នុងឱកាសចុះមកដោយផ្ទាល់នេះ ឃើញថាស្ថាន​ភាព​រស់​នៅ​របស់​លោក​យាយ ឯក យិន ពិតជាលំបាកពិតមែន មានមុខរបរធ្វើលំអងចេកលក់ ចិញ្ចឹម​ចៅ​ប្រុស​រហូត​២​នាក់​ថែមទៀត។

លោកយាយ ឯក យិន និងលោកយាយ អឿន យាន មានក្តីរំភើបក្តុកក្តួលឥតឧបមា ដោយ​ទទួល​បាន​ការ​យកចិត្តទុកដាក់ ជាពិសេសការលើកទឹកចិត្តពីសំណាក់ អ្នកម្តាយមនុស្សធម៌ ដែល​លោក​តែង​តែ​គិត​គូរដល់សុខទុក្ខ និងប្រជាជនងាយរងគ្រោះបំផុត គ្រប់ពេលវេលា និងគ្រប់ទីកន្លែង។ សូម​គោរពជូនពរ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងក្រុមការងារទាំងអស់ សូម​ជួប​ប្រទះ​តែនឹ​ងសេចក្តីសុខ សុភមង្គល សុខភាពល្អរឹងមាំ ជន្មាយុយឺនយូរ កុំបីឃ្លៀងឃ្លាតឡើយ៕