៤ខែដើមឆ្នាំ២០២៥នេះ ការនាំចេញវិស័យកាត់ដេររបស់កម្ពុជាសម្រេចបាន ៤,៥​ពាន់​លាន​ដុល្លារ

គិតចាប់ពីខែមករា រហូតត្រឹមខែមេសា ឆ្នាំ២០២៥នេះ ការនាំចេញក្នុងវិស័យកាត់ដេររបស់កម្ពុជា នៅ​តែមានភាពល្អប្រសើរ ដោយមានកើនឡើងចំនួនប្រមាណ ៤,៥ពាន់លានដុល្លារអាម៉េរិក ឬ​​ស្មើ​នឹង ២១.៩% បើទោះបីជាបរិបទសេដ្ឋកិច្ចសកលមានភាពមិនច្បាស់លាស់។

យោងតាម ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បាន​មាន​ប្រសាសន៍​ឱ្យ​ដឹងថា កំណើននៃការនាំចេញដ៏រឹងមាំនៅទូទាំងទីផ្សារសំខាន់ៗ មានដូចជា ការ​នាំ​ចេញ​ទៅកាន់សហរដ្ឋអាម៉េរិក បានកើនឡើង ២៦,៧%, ទៅជប៉ុន កើនឡើង ២១,៨% , អឺរ៉ុប កើន​ឡើង ២១,៧% , ទៅអាស៊ាន កើនឡើង ១៩,១% និងការនាំចេញទៅចក្រភពអង់គ្លេស កើន​ឡើង ១១,៤%។ ជាមួយនេះ ឯកឧត្តម បានបង្ហាញការអបអរសាទរដល់កម្មករ និង​និយោជក​ក្នុង​ស្រុកទាំងអស់ ដែលបានរួមគ្នាយ៉ាងល្អជាមួយរាជរដ្ឋាភិបាល និងក្រសួងការងារ ដើម្បី​សម្រេចកិច្ចការងារដ៏ប្រពៃសម្រាប់សង្គមជាតិ មាតុភូមិមួយនេះ។

ឯកឧត្តម ក៏បានស្នើឱ្យកម្មករនិយោជិត និងភាគីនិយោជក បន្តជឿជាក់លើក្រសួងការងារ ដែល​ជា​សេនា​ធិការរបស់រាជរដ្ឋាភិបាលក្នុងការសម្របសម្រួល និងឈរនៅជាមួយបងប្អូនគ្រប់ពេលវេលា ព្រម​ទាំងគិតគូរប្រយោជន៍ជូនបងប្អូនកម្មករ និងនិយោជកជានិច្ច។

ពាក់ព័ន្ធការ​នាំ​ចេញនេះដែរ ឯកឧត្តមបានពន្យល់ពីហេតុផលនៃកំណើននាំចេញថា កម្លាំង​ពលកម្ម គឺជាចំណុចសំខាន់មួយ ដែលជួយជ្រោមជ្រែងសេដ្ឋកិច្ចកម្ពុជា ដែល​ជា​ហេតុ​ធ្វើ​ឱ្យ​រាជ​រដ្ឋាភិបាល​បាន​គិតគូរៀបចំឱ្យមានទិវាអប់រំបណ្តុះបណ្តាលជំនាញបច្ចេកទេស និង​វិជ្ជា​ជីវៈ​ជា​រៀង​រាល់​ឆ្នាំ ខណៈឆ្នាំនេះ នឹងប្រព្រឹត្តទៅនាថ្ងៃទី១៥ និង១៦ ខែមិថុនាខាងមុខនេះ នៅមជ្ឈ​មណ្ឌល​ពិព័រណ៍​កោះពេជ្រ។ ឯកឧត្តមបានបន្ថែម ទិវានេះ ជាកម្មវិធីមួយដ៏សំខាន់​ដើម្បី​លើក​កម្ពស់​ការ​យល់​ដឹងការផ្សព្វផ្សាយ និងជាការរម្លឹកទៅដល់ការកសាងកម្លាំងពលកម្មប្រកបដោយគុណភាព និង​មានប្រសិទ្ធភាពខ្ពស់ ហើយដើម្បីបម្រើឱ្យទីផ្សារការងារនៅក្នុងស្រុក និងទីផ្សា​រ​ក្រៅ​ស្រុក​ផង​ដែរ​។

គិតក្នុងរយៈពេល២០ខែ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋ​មន្រ្តី​នៃ​កម្ពុជា ​រោងចក្រ សហគ្រាសមានការកើនឡើងចំនួនប្រមាណ ៥ ០៨៦រោងចក្រ សហគ្រាស ដោយកើនពី ៤០ ៣០០ ទៅដល់ ៤៥ ៣៨៦រោងចក្រ សហគ្រាស ។ កម្លាំងពលកម្មនៅកម្ពុជា បាន​កើន​ឡើងចំនួន ១លាន ៦សែន ៥ម៉ឺន ទៅដល់ ១លាន ៨សែន ៧ម៉ឺននាក់ ។

ក្នុងនោះ​វិស័យកាត់ដេរ មានរោងចក្រចំនួន ១ ៦៥៧រោងចក្រ ដោយមាន​កម្មករ​និយោជិត​ប្រមាណ ​៩៧ម៉ឺននាក់ ក្នុងនោះប្រាក់​ដែល​កម្មករ​និយោជិត​ទទួល​បាន​ពី​វិស័យ​នេះ​សរុប​ចំនួន​ប្រមាណ ៣ ១០០លានដុល្លារសហរដ្ឋអាម៉េរិក គិតជាមធ្យមក្នុងរយៈពេល១ឆ្នាំៗ៕អត្ថបទ​៖ ឈិត បូរ៉ាវី