ស្នងការរាជធានីភ្នំពេញប្រគល់ម៉ូតូនិងសម្ភារៈប្រើសម្រាប់ ជាអំណោយរបស់អគ្គស្នងការនគរបាល ដល់មន្រ្តីក្រោមឱវាទ

ភ្នំពេញ៖ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ បានអញ្ជើញប្រគល់មធ្យោបាយម៉ូតូសម្ភារ មួយចំនួនជូនដល់ការិយាល័យនគរបាលចរាចរណ៍ផ្លូវគោក កម្លាំងនគរបាលអន្តរាគមន៍ពិសេស និងតាមបណ្តាអធិការដ្ឋាននគរបាលខណ្ឌទាំង១៤ ដែលជាអំណោយដ៍ថ្លៃថ្លារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នារសៀលថ្ងៃទី១៧ខែមិថុនាឆ្នាំ២០២៥ នេះ។

ឯកឧត្តម អគ្គស្នងការរងនិងជាស្នងការនគរបាលរាជធានីភ្នំពេញ ក៏បានសំណេះសំណាលនិងផ្តាំផ្ញើការសាកសួរសុខទុក្ខពីសំណាក់ឯកឧត្តម នាយឧត្តមសេនីយ៍អគ្គស្នងការនគរបាលជាតិ ជូនដល់កងកម្លាំងនគរបាលរាជធានីភ្នំពេញដែលជានិច្ចជាកាលឯកឧត្តម នាយឧត្តមសេនីយ៍តែងតែគិតគូរពីសុខទុក្ខនិងជួយសម្រួលដោះស្រាយការលំបាកនានាទាំងមធ្យោបាយសម្ភារ ក៏ដូចជាស្បៀងអាហារដើម្បីលើកទឹកចិត្តជូនដល់បងប្អូនកងកម្លាំងដែលបានលះបង់សព្វបែបយ៉ាងបំពេញភារកិច្ចការពារថែរក្សាសន្តិសុខ សណ្តាប់ធ្នាប់សុវត្ថិភាពសង្គមគ្រប់ពេលវេលានិងគ្រប់ទីកន្លែងដោយមិនគិតនឿយហត់។

ជាងនេះថែមទៀតនៅថ្ងៃនេះ ផងដែរ ឯកឧត្តមនាយឧត្តមសេនីយ៍អគ្គស្នងការបានបន្តឧបត្ថម្ភអំណោយមធ្យោបាយម៉ូតូចំនួន១៤គ្រឿង ជូនអង្គភាពការិយាល័យនគរបាលចរាចរណ៍ផ្លូវគោក និងអាវភ្លៀង អំពូលសូឡាមួយចំនួនទៀតជូនដល់ ការិយាល័យនគរបាលចរាចរណ៍ផ្លូវគោក កម្លាំងអន្តរាគមន៍ពិសេសនិងកម្លាំងតាមបណ្តាអធិការដ្ឋាននគរបាលខណ្ឌទាំង១៤ ដើម្បីយកទៅប្រើប្រាស់បំពេញភារកិច្ចប្រចាំថ្ងៃបង្កើនប្រសិទ្ធភាពការងារការពារសន្តិសុខ រក្សាសណ្តាប់ធ្នាប់ សុវត្ថិភាពសង្គមកាន់តែល្អប្រសើរ។

ជាមួយគ្នានោះ ឯកឧត្តមស្នងការបានផ្តាំផ្ញើដល់កងកម្លាំងដែលទទួលបានសម្ភារយកទៅប្រើប្រាស់នៅពេលនេះតទៅ គឺត្រូវចេះថែរក្សាឲ្យបានល្អ ធានារក្សាការប្រើប្រាស់ឲ្យបានយូរអង្វែងនិងក៍បានណែនាំកងកម្លាំងទាំងអស់បន្តយកចិត្តទុកដាក់បំពេញកិច្ចការងារតាមតួនាទីភារកិច្ចរបស់ខ្លួនប្រកបដោយស្មារតីទទួលខុសត្រូវនិងមានឆន្ទៈខ្ពស់ បម្រើប្រជាពលរដ្ឋដ៍ស្មោះត្រង់ តាមរយៈការគោរពវិន័យកងកម្លាំងនគរបាលជាតិឲ្យបានខ្ជាប់ខ្ជូន គោរពក្រមសីលធម៌វិជ្ជាជីវៈជំនាញ និងជាពិសេសត្រៀមទទួលបទបញ្ជាថ្នាក់លើកិច្ចការងារការពារបូរណភាពទឹកដីបើសិនមានសត្រូវប៉ុនប៉ងឈ្លានពានទឹកកម្ពុជាយើង៕

អត្ថបទ៖ កុម្ភៈ