ឯកឧត្តម ហ៊ុន ម៉ានី ថ្លែងអំណរគុណជនរួមជាតិចូលរួមដើរថ្មើរជើងដោយស្មារតីរួបរួមសាមគ្គីនៃមហាគ្រួសារខ្មែរ

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) បានថ្លែងអំណរគុណដល់ទឹកចិត្ត ស្មារតី ឆន្ទៈ បងប្អូនជនរួមជាតិ ព្រះសង្ឃ តំណាគណបក្សនយោបាយ និងយុវជនពីគ្រប់ទិសទីដែលបានមកជួបជុំគ្នាដើរថ្មើរជើង «Solidarity March» ដោយស្មារតីមោទនភាពជាតិខ្មែរ ស្មារតីរួបរួមសាមគ្គីគ្នាជាធ្លុងមួយគ្រប់និន្នាការនយោបាយ ក្នុងនាមខ្មែរតែមួយ ដើម្បីគាំទ្ររាជរដ្ឋាភិបាល និងលើកទឹកចិត្តកងទ័ពជួរមុខដែលកំពុងឈរជើងការពារបូរណភាពទឹកដី។

ឯកឧត្តម ហ៊ុន ម៉ានី បានថ្លែងបញ្ជាក់បែបនេះ ក្នុងឱកាសពិធីដំណើរថ្មើរជើង “Solidarity March“ គាំទ្រដល់រាជរដ្ឋាភិបាល និងកងកម្លាំងជួរមុខកម្ពុជា (សាលមហោស្រពកោះពេជ្រ ឆ្ពោះទៅកាន់វិមានឯករាជ្យ) ព្រឹកថ្ងៃទី១៨ ខែមិថុនា ឆ្នាំ២០២៥នេះ។

ឯកឧត្តមបានថ្លែងថា ពិធីបានបញ្ចប់ដោយជោគជ័យ គួរជាទីមោទនៈ។ យើងទាំងអស់គ្នាបានសម្តែងនូវការដឹងគុណដល់សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ដែលជាអគ្គមគ្គទេសក៍ដ៏ឆ្នើម ក្នុងការការពារអធិបតេយ្យ បូរណភាពដែនដី កិត្យានុភាពជាតិ និងដែលតែងតែផ្តល់ភាពកក់ក្តៅ និងសេចក្តីសុខសាន្តដល់ប្រជាជនខ្មែរគ្រប់រូប។ យើងគ្រប់ៗរូបបេ្តជ្ញាបន្តជឿជាក់ និងចូលរួមគ្រប់កាលៈទេសៈទាំងអស់ជាមួយរាជរដ្ឋាភិបាល ក្រោមការដឹកនាំប្រកបដោយគតិបណ្ឌិតក្នុងបុព្វហេតុជាតិមាតុភូមិ។

សូមជម្រាបថា តាមរយៈព្រឹត្តិការណ៍ជាប្រវត្តិសាស្រ្ដ ដំណើរថ្មើរជើង «Solidarity March» នៅព្រឹកនេះ មានប្រជាជន ជនរួមជាតិ និងព្រះសង្ឃប្រមាណ ១៥ ម៉ឺននាក់បានចូលរួមការធ្វើដំណើរថ្មើរជើងដើម្បីបង្ហាញការរួមគ្នាជាធ្លុងមួយគាំទ្រដល់រាជរដ្ឋាភិបាល និងកងកម្លាំងជួរមុខកម្ពុជា ចាប់ពីសាលមហាស្រពកោះពេជ្រ ដល់វិមានឯករាជ្យ។ ការចូលរួមនេះ បានបង្ហាញយ៉ាងច្បាស់អំពីការរួមគ្នាជាធ្លុងមួយគាំទ្រដល់រាជរដ្ឋាភិបាល និងកងកម្លាំងជួរមុខកម្ពុជាក្នុងកាលៈទេសៈកម្ពុជាកំពុងប្រឈមមុខវិវាទព្រំដែនជាមួយប្រទេសថៃ៕អត្ថបទ៖ វ៉ន ដារ៉ា